ފޯކްލެންޑް އައިލެންޑްސް ކައިރިން ތެޔޮ ހޯދައި ނެގުމަށް އިނގިރޭސިވިލާތުން ކުރިއަށްގެންދާ މަޝްރޫޢަކާ ގުޅިގެން، އިނގިރޭސިވިލާތާއި މި މަސައްކަތުގައި ބައިވެރިވާ ކުންފުނިތަކާ ދެކޮޅަށް ބައިނަލްއަޤްވާމީ ފެންވަރުގައި ޤާނޫނީ ފިޔަވަޅު އަޅާނެ ކަމަށް ބުނެ އާޖެންޓީނާއިން އިންޒާރު ދީފިއެވެ.
މި މައްސަލަ އުފެދިފައިވަނީ ފޯކްލެންޑްސްގެ އައްސޭރިފަށުގެ ސަރަޙައްދެއް ކަމަށްވާ "ސީ ލަޔަން" އިން ތެޔޮ ނެގުމުގެ ބޮޑު މަޝްރޫޢެއް ފެށުމަށް އިނގިރޭސި ކުންފުނިތަކަކުން ތައްޔާރުވަމުންދާތީއެވެ. މި ސަރަޙައްދުން ގާތްގަނޑަކަށް 500 މިލިއަނަށް ވުރެ ގިނަ ފީފާގެ ސާފުނުކުރާ ތެޔޮ ނެގޭނެ ކަމަށް ވަނީ ލަފާކުރެވިފައެވެ.
އާޖެންޓީނާގެ ޚާރިޖިއްޔާއިން ނެރުނު ބަޔާނެއްގައި ބުނެފައިވަނީ، މި މަޝްރޫޢަކީ އެ ޤައުމުގެ ސިޔާދަތީ ބާރު ހިނގާ ސަރަޙައްދެއްގައި ހުއްދައަކާ ނުލައި ޤަވާޢިދާ ޚިލާފަށް ހިންގާ ޙަރަކާތެއް ކަމަށެވެ. އަދި އާޖެންޓީނާގެ ޤައުމީ ޤާނޫނުތަކާއި އދ. ގެ ޤަރާރުތަކާ ޚިލާފަށް ކުރިއަށްގެންދާ މި މަސައްކަތުގައި ބައިވެރިވާ ހުރިހާ ފަރާތްތަކަކާ ދެކޮޅަށް ޤާނޫނީ އަދި އިދާރީ ފިޔަވަޅުތައް އަޅާނެ ކަމަށްވެސް އެ ބަޔާނުގައި ފާހަގަކޮށްފައިވެއެވެ. މީގެ އިތުރުން މިއީ އެ ސަރަޙައްދުގެ ޤުދުރަތީ ވަސީލަތްތައް ޚަރާބުކުރުން ކަމަށްވެސް އާޖެންޓީނާއިން ސިފަކޮށްފައިވެއެވެ.
Advertisement
ފޯކްލެންޑް އައިލެންޑްސްގެ މިލްކުވެރިކަމާ މެދު އިނގިރޭސިވިލާތާއި އާޖެންޓީނާއާ ދެމެދު ޒަމާންވީ ބޮޑު ޚިޔާލުތަފާތުވުމެއް އޮވެއެވެ. މި މައްސަލައިގައި 1982 ވަނަ އަހަރު ދެ ޤައުމުގެ ދެމެދުގައި ހަނގުރާމައެއް ވެސް ވަނީ ހިނގާފައެވެ. އެ ހަނގުރާމައަށް ފަހު ވެސް، އާޖެންޓީނާއިން އެ ރަށްތަކަކީ "މަލްވިނާސް" ގެ ނަމުގައި އެ ޤައުމުގެ ބައެއް ކަމަށް ދަޢުވާ ކުރަމުން އަންނައިރު، އިނގިރޭސިވިލާތުން ބުނަމުންދަނީ އެ ރަށްތަކުގެ މިނިވަންކަމާއި މުސްތަޤްބަލު ނިންމާނީ އެ ރަށުގެ ރައްޔިތުން ކަމަށެވެ.
މި އިންޒާރާ ގުޅިގެން އިނގިރޭސިވިލާތުން އަދި ރަސްމީކޮށް ވަކި އެއްޗެއް ހާމަކޮށްފައި ނުވި ނަމަވެސް، ފޯކްލެންޑްސް ސަރުކާރުން ބުނެފައިވަނީ އެ ސަރަޙައްދުގެ އިޤްތިޞާދީ ވަސީލަތްތައް ތަރައްޤީކުރުމުގެ ފުރިހަމަ ޙައްޤު އެ ރައްޔިތުންނަށް ލިބިގެންވާ ކަމަށެވެ.
