މިއަދު ސުވިޒަލޭންޑުގައި ބޭއްވި އެމެރިކާ-އީރާނުގެ ސީދާ މަޝްވަރާތައް ކޮޅެއްގައި ނުޖެހި ނިމިއްޖެއެވެ.

ދަތިކުރުމުގެ ފިޔަވަޅުތަކަށް ލުއި ދިނުމާއި އީރާނުގެ ނިއުކްލިއާ ޕްރޮގްރާމާއި، ފްރީޒްކޮށްފައިވާ އީރާނުގެ އެސެޓްތައް ދޫކޮށްލުމާއި އަދި މެދުއިރުމަތީގެ ފިތުނަތައް ކުޑަކުރުމަށް ކުރާ މަސައްކަތްތަކާ ބެހޭ ގޮތުން ބޭއްވި މި މަޝްވަރާ ބައްދަލުވުމުގައި އެމެރިކާގެ ނައިބު ރައީސް ޖޭޑީ ވެންސް އާއި އީރާނުގެ ފޮރިން މިނިސްޓަރު އައްބާސް އަރަޣްޗީ އަދި އީރާނުގެ އިސް ވެރިން ބައިވެރިވެވަޑައިގެންނެވިއެވެ.

މިއަދުގެ ބައްދަލުވުމުގައި ލުބުނާނުގެ ހަމަނުޖެހުންތަކާ ގުޅިގެން ތެހެރާނުން ވަނީ ކަންބޮޑުވުން ފާޅުކޮށް، ހަނގުރާމަ ހުއްޓާލުމަށް ގޮވާލާފައެވެ.

އިރާނުން ބުނީ އެމެރިކާ އިން މި މަޝްވަރާގައި ކުރިއެރުންތަކެއް ހޯދަން ބޭނުންނަމަ އީރާނަށް އަޅާފައިވާ އިގްތިސާދީ ޕްރެޝަރު ލުއިކުރަން ޖެހޭ ކަމަށެވެ.

އެމެރިކާގެ ވަފުދުން ޖަވާބު ދިނީ ދަތިކުރުމުގެ ފިޔަވަޅުތަކަށް ލުއި ދީ، ތެހެރާނާއެކު ގުޅުން ރަނގަޅުކުރުމާ ބެހޭ ގޮތުން މަޝްވަރާ ކުރަން ވޮޝިންޓަން ތައްޔާރަށް އޮތް ނަމަވެސް އީރާނުން ނިއުކްލިއާ ހަރަކާތްތައް ހުއްޓާލުމުގެ ޔަޤީންކަން ނުދެނީސް ލުއިތައް ދޭން ބޭނުން ނުވާކަމަށެވެ.

އެމެރިކާގެ އޮފިޝަލުން އީރާނަށް އިލްތިމާސް ކުރީ ނިއުކްލިއާ ފެސިލިޓީތަކުގެ ބައިނަލްއަގްވާމީ އިންސްޕެކްޝަންތައް ފުޅާކުރުމުގެ ހުއްދަ ދިނުމަށާއި އެގައުމުގެ ނިއުކްލިއާ ޕްރޮގްރާމް ޚާއްސަކޮށް ސުލްހަވެރިކަމާއެކު ކުރިއަށްދާ ކަމުގެ ޔަގީންކަން ބައިނަލްއަގްވާމީ މުޖުތަމައަށް ދިނުމަށެވެ.

މަޝްވަރާތަކަށް ފަހު ނައިބު ރައީސް ވެންސް ވަނީ އެ މަޝްވަރާތަކަކީ އުފެއްދުންތެރި މަޝްވަރާތަކެއް ކަމަށް ސިފަކުރައްވައި، "ބޮޑު ކުރިއެރުމެއް" ލިބިފައިވާ ކަމަށް ވިދާޅުވެފަ އެވެ.