ބޯހިޔާވަހިކަމަށް ލައިފިންތަ؟ ބާކީ ދެދުވަސް؛ މުއްދަތު އިތުރެއް ނުކުރާނެ

ސަރުކާރުން މާލެ ސަރަޙައްދުގައި ކުރިޔަށް ގެންދާ ބޯހިޔާވަހިކަމުގެ ބިޔަ މަޝްރޫއުތަކަށް ފޯމު ހުށަހެޅުމަށް ދީފައިވާ މުއްދަތު ހަމަވާން ބާކީ އޮތީ އެންމެ ދެދުވަސް ކަމަށާއި، މީގެ ފަހުން އިތުރަށް މުއްދަތު އިތުރުކޮށްނުދޭނެ ކަމަށް ކަމާބެހޭ މިނިސްޓްރީން ހާމަކޮށްފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ހުޅުވާލާފައިވާ މި ފުރުސަތު އަންނަ ހޯމަ ދުވަހުގެ (15 ޖޫން 2026) ރޭގަނޑު 23:59 އަށް ހަމަވާނެއެވެ. ފޯމު ހުށަހެޅުމުގެ މުއްދަތު މި މަހުގެ 15 އަށް އިތުރުކޮށްދިނުމަށް ސަރުކާރުން ނިންމެވީ މިދިޔަ މެއި މަހުގެ 23 ވަނަ ދުވަހުއެވެ. މި ނިންމުން ނިންމާފައިވަނީ ޢީދު ބަންދާ ގުޅިގެން ގިނަ ރައްޔިތުން ރަށުން ބޭރުގައި އުޅެންޖެހުމުން، ލިޔެކިއުންތައް ހަމަކުރުމުގައި ދަތިތަކެއް ކުރިމަތިވަމުންދާތީ އެކަމަށް ލުޔެއް ދިނުމުގެ ގޮތުންނެވެ.

މިދިޔަ ޖެނުއަރީ މަހުގެ 18 ގައި ހުޅުވާލި "އާއިލީ ބޯހިޔާވަހިކަން" ޕްރޮގްރާމަކީ ރާއްޖޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯއްދަވައިދެއްވުމަށް ސަރުކާރުން ކުރިއަށްގެންދާ ވަރަށް މުހިންމު މަޝްރޫއެކެވެ. މި މަޝްރޫއުގެ ދަށުން ޖުމްލަ 7,900 ފްލެޓާއި 15,000 ގޯތި ދޫކުރުމަށް ވަނީ ނިންމަވާފައެވެ. އޭގެ ތެރޭގައި ހިމެނެނީ:

1. މާލޭގެ ރަށްވެހިންނަށް: 4,000 ފްލެޓް
2. މާލޭގައި ދިރިއުޅޭ، ނަމަވެސް ރަށްވެހިވެފައި ނުވާ ފަރާތްތަކަށް: 1,500 ފްލެޓް
3. ހާއްސަ ކެޓަގަރީތަކަށް: 2,400 ފްލެޓް

މީގެ އިތުރުން، ރައީސް ޑރ. މުއިއްޒުގެ ތަސައްވުރާ އެއްގޮތަށް ފަށްޓަވާފައިވާ ރަސްމާލެ މަޝްރޫއުން ޖުމްލަ 25,000 ގޯތި ދޫކުރުމަށް އަމާޒު ހިފާފައިވާއިރު، ފުރަތަމަ ބުރުގައި 15,000 ގޯތި ދޫކުރުމަށް ވަނީ ހަމަޖެހިފައެވެ.

މިފަހަރު މުއްދަތު އިތުރުކޮށްދީފައިވާ މުހިންމު ކެޓަގަރީތަކުގެ ތެރޭގައި ވެށިފަހި މާލެ ނުވަތަ ހިޔާ މަޝްރޫޢުގެ ދަށުން ފްލެޓް ލިބޭނެ ކަމުގެ ލިޔުން ލިބިފައިވާ ފަރާތްތަކާއި، ނުކުޅެދުންތެރިކަން ހުންނަ ފަރާތްތަކުގެ ކެޓަގަރީ ހިމެނެއެވެ. އަދި ބިންވެރިޔާ ސްކީމްގެ ދަށުން ކުރިން ޖޮއިންޓް އެޕްލިކޭޝަން ހުށަހަޅާފައިވާ ފަރާތްތަކުގެ ތެރެއިން ވަކިން ގޯއްޗަށް އެދެން ބޭނުންވާ ފަރާތްތަކަށާއި، ފްލެޓް ދޫކޮށްލުމަށްފަހު ގޯއްޗަށް އެދޭ ފަރާތްތަކަށްވެސް މި ފުރުސަތު އޮންނާނެއެވެ.

މިނިސްޓްރީން ވަނީ މި އިތުރުކުރެވުނު މުއްދަތުގެ ތެރޭގައި ހުރިހާ ފަރާތްތަކުންވެސް ޕޯޓަލް މެދުވެރިކޮށް ފޯމު ހުށަހެޅުއްވުމަށް އިލްތިމާސްކުރައްވާފައެވެ. މި މަޝްރޫޢުތަކާ ގުޅޭ އިތުރު މަޢުލޫމާތު ސާފުކުރެއްވުމަށް ބޭނުންފުޅުވާ ފަރާތްތަކުން މިނިސްޓްރީގެ ހޮޓްލައިން ނަންބަރުތައް ކަމަށްވާ 860-4004 އިން ފެށިގެން 865-4004 އާ ދެމެދުގެ ނަންބަރުތަކަށް ގުޅުއްވުމަށް ވަނީ އެދިފައެވެ.