މަގާމުން އެއްފަރާތަށް ޖެހިވަޑައިގަތީ ސިއްހީ ހާލަތު ތަން ނުދޭތީ ކަމަށާއި، ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒާއެކު ޕާޓީ ކުރިއެރުވުމުގައި ސާބިތުކަމާއެކު ހުންނަވާނެ ކަމަށް ފިނޭންސް މިނިސްޓަރުކަމުގެ މަގާމުން އިއްޔެ އިސްތިއުފާ ދެއްވި މޫސާ ޒަމީރު ވިދާޅުވެއްޖެއެވެ.

ޒަމީރު މިހެން ވިދާޅުވީ ޕީއެންސީން މިރޭ ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުންނެވެ.

ޒަމީރުގެ ވާހަކަފުޅުގައި، 2018 ވަނަ އަހަރު ރައީސް ޔާމީންގެ ސަރުކާރު ނިމުމުން ޕާޓީގެ ކަންކަމާ ދުރަށް ޖެހިލެއްވި ސަބަބު ހާމަކުރެއްވިއެވެ. އެގޮތުން ޕާޓީ ބޮޑުވެގެން އަންނައިރު އާ ލީޑަޝިޕަކަށް ފުރުސަތު ދިނުމަކީ މުހިންމު ކަމެއް ކަމަށް ޒަމީރު ގަބޫލުކުރައްވައެވެ.

"މީގެ 20 އަހަރު ކުރިން މި ފިކުރުގައި މަސައްކަތް ކުރެއްވި އިރު ނެގި ފޮޓޯތަކުގައި އަޅުގަނޑުގެ އިސްތަށިގަނޑު ވަރަށް ދިގުކޮށް ހުންނާނެ. އުމުރުން ދުވަސްވާރަކަށް އަންނަ ބަދަލުތަކާއެކު އާ ލީޑަޝިޕަށް ފުރުސަތު ދިނުމަކީ އަޅުގަނޑުމެން ކުރަންޖެހޭ ކަމެއް،"

ކުރީގެ ފިނޭންސް މިނިސްޓަރު މޫސާ ޒަމީރު

ނަމަވެސް، ޕާޓީން ގޮވާލާ ކޮންމެ ފަހަރަކު ހިދުމަތަށް ނުކުންނަވާނެ ކަމަށާއި، ރާއްޖޭގައި އޮތީ ދެ ފިކުރެއްކަން ޒަމީރު ފާހަގަކުރެއްވިއެވެ. އޭނާ ވިދާޅުވި ގޮތުގައި ލީޑަރުންނާއި ޕާޓީތަކުގެ ނަން ބަދަލުވިޔަސް، ޑީއާރުޕީ، ޕީޕީއެމް އަދި ޕީއެންސީއަކީ އެއް ފިކުރެކެވެ. އަދި މިހާރު އެ ފިކުރުގެ ދަންމަރު ހިއްޕަވައިގެން ހުންނެވި ލީޑަރަކީ ރައީސް ޑރ. މުހައްމަދު މުއިއްޒު ކަމަށް ވިދާޅުވެ، އެމަނިކުފާނާއެކު ހުންނެވިކަން ޒަމީރު ކަށަވަރުކޮށްދެއްވިއެވެ.

ރައީސް މުއިއްޒުގެ ހާރިޖީ ސިޔާސަތަށް ތައުރީފު ކުރައްވަމުން ޒަމީރު ވިދާޅުވީ، ކުރީގެ ލީޑަރުންގެ ވިސްނުމުގައި އެހެން ގައުމެއް އިސްކުރުމުގެ ސިޔާސަތެއް އޮތް ނަމަވެސް، ރައީސް މުއިއްޒު ވެރިކަމަށް ވަޑައިގެން ގާއިމްކުރެއްވީ "މޯލްޑިވްސް ފަސްޓް" ނުވަތަ ދިވެހިރާއްޖެ އިސްކުރުމުގެ ސިޔާސަތު ކަމަށެވެ. މީގެ އިތުރުން އިސްލާމްދީނާއި ގައުމިއްޔަތާއި ރައްޔިތުންގެ ތަނަވަސްކަމަށް ރައީސް ކުރައްވާ މަސައްކަތްޕުޅުތައް ވެސް އޭނާ ފާހަގަކުރެއްވިއެވެ.

ފިނޭންސް މިނިސްޓަރުކަމުން ވަކިވެވަޑައިގަތުމާ ގުޅޭގޮތުން ޒަމީރު ވިދާޅުވީ، ވޭތުވެދިޔަ ހަ މަސްދުވަހަކީ ދުނިޔޭގެ މަސްރަހު އޮތްގޮތުން ފިނޭންސް މިނިސްޓަރަކަށް ވަރަށް ބޮޑު ޒިންމާއެއް އުފުލަންޖެހުނު ދުވަސްތަކެއް ކަމަށެވެ. އެގޮތުން ތެލުގެ އަގަށް އަންނަ ބަދަލުތައް ބަލައި، އަދާހަމަކުރުމަށް ގިނަ ވަގުތު ހޭދަކުރަންޖެހޭއިރު، ސިއްހީ ހާލަތު ހުރިގޮތުން އެ މަގާމުގައި ދެމިހުރުމަކީ ޕާޓީއަށް އެންމެ ރަނގަޅު ގޮތް ނޫން ކަމަށް ޒަމީރު ވިދާޅުވިއެވެ.

"ސިއްހީ ހާލަތު ތަން ނުދޭއިރު ވެސް އެ މަގާމުގައި ބައްދައިގެން ހުރުމަކީ ޕާޓީއަށް ކޮށްދެވޭނެ ރަނގަޅު ކަމެއް ނޫން. ގާބިލު ބޭފުޅުންނަށް ފުރުސަތު ދިނުމުގެ ގޮތުން އެއްފަރާތަށް ޖެހިލީ،"

ކުރީގެ ފިނޭންސް މިނިސްޓަރު މޫސާ ޒަމީރު

ޒަމީރުގެ ވާހަކަފުޅު ނިންމަވާލެއްވީ، މަގާމުން ވަކިވެވަޑައިގަތް ނަމަވެސް ރައީސް މުއިއްޒާއެކު "ގަދަކޮށް" ހުންނެވި ކަމަށާއި، ޕާޓީއާއި ފިކުރު ކުރިއެރުވުމަށް ހަވާލުކުރައްވާ ކޮންމެ ޒިންމާއެއް އުފުލަން ތައްޔާރަށް ހުންނެވި ކަމުގެ ޔަގީންކަން ދެއްވަމުންނެވެ.