ދިވެހި ވަޠަނީ ޚިދުމަތުގެ ތަމްރީނަށް ހުޅުވާލި ދެވަނަ ފުރުސަތުގައި ކުރިމަތިލި ޒުވާނުންގެ ތެރެއިން، ނޭޝަނަލް ސަރވިސް ޓްރޭނިންގ ގެ ތިންވަނަ ބެޗުގެ ތަމްރީނުތަކުގައި ބައިވެރިވާ 352 ޒުވާނުން މިއަދު ތަމްރީނަށް ފުރައިފިއެވެ.
މިކަމާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ދިވެހި ވަތަނީ ހިދުމަތުގެ ތަމްރީނަށް ހުޅުވާލި ދެވަނަ ފުރުސަތުގައި ޖުމްލަ 1785 ޒުވާނުން ކުރިމަތިލާފައިވާ ކަމަށެވެ. މީގެ ތެރެއިން މިހާރު ފުރާފައިވަނީ ފުރަތަމަ 352 ބައިވެރިން ކަމަށް ރައީސް ފާހަގަކުރެއްވިއެވެ.
Advertisement
ޅ. މާފިލާފުށީގައި ހުންނަ އެމްއެންޑީއެފް ކޮމްޕޮސިޓް ޓްރޭނިންގ ސެންޓަރުގައި ތިން މަސް ދުވަހުގެ މުއްދަތަށް ކުރިއަށްގެންދާ މި ތަމްރީނު ޕްރޮގްރާމުގައި، ދިވެހި ގައުމިއްޔަތާއި، ޒިންމާދާރު ރައްޔިތަކަށް ވުމާއި، ދީނީ ތަރުބިއްޔަތާއި އަހްލާގުގެ އިތުރުން ލީޑަރޝިޕް އަދި ހަށިހެޔޮކަމުގެ ދާއިރާއިން ބައިވެރިން ތަމްރީނު ކުރެވޭނެއެވެ. މީގެ އިތުރުން އާންމު ދިރިއުޅުމުގެ މައިދާނުގައި ބޭނުންވާނެ ތަފާތު އެތައް ދާއިރާއެއްގެ ހުނަރުތައް މި ޒުވާނުންނަށް ދަސްކޮށްދެވޭނެއެވެ.
ނޭޝަނަލް ސަރވިސް ޓްރޭނިންގ ގެ މި ބެޗުގައި ރާއްޖޭގެ 20 އަތޮޅަކުން، 115 ރަށަކަށް ނިސްބަތްވާ ޒުވާނުން ހިމެނެއެވެ. އޭގެ ތެރޭގައި ހިމެނެނީ 64 އަންހެން ބައިވެރިންނާއި 288 ފިރިހެން ބައިވެރިންނެވެ.
ސަރުކާރުން ހާމަކުރައްވާ ގޮތުގައި، އަމިއްލަ ނަފްސަށް އިތުބާރުކުރާ، އަގީދާ ވަރުގަދަ، އަދި ޖިސްމާނީ ގޮތުންނާއި ރޫހާނީ ގޮތުން ދުޅަހެޔޮ ޒިންމާދާރު ޖީލެއް ބިނާކުރުމަކީ މި ސަރުކާރުގެ އެންމެ މުހިންމު އެއް ސިޔާސަތެވެ. މި މަގްސަދު ހާސިލުކުރުމަށްޓަކައި ދިވެހި ވަތަނީ ހިދުމަތުގެ މި ހަރަކާތް ދެމެހެއްޓެނިވި ގޮތެއްގައި ކުރިއަށް ގެންދިއުމަށް ސަރުކާރުން ވަނީ ނިންމަވާފައެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވަމުން ވަނީ ތަމްރީނުގައި ބައިވެރިވާ ހުރިހާ ޒުވާނުންނަށް ކާމިޔާބީއަށް އެދިވަޑައިގެންފައެވެ.
