މިނިސްޓަރ އޮފް ފިނޭންސް އެންޑް ޕަބްލިކް އެންޓަރޕްރައިޒަސްގެ މަގާމަށް، މާލީ ދާއިރާގެ ތަޖުރިބާކާރު ބޭފުޅެއް ކަމަށްވާ އަލްފާޟިލް ހަސަން ޒަރީރު އައްޔަނުކުރައްވައިފިއެވެ.

މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ހާއްސަ ރަސްމިއްޔާތެއްގައި، ހަސަން ޒަރީރަށް ވަނީ މަގާމުގެ ފަތްކޮޅު އަރުވާފައެވެ. މި ރަސްމިއްޔާތުގައި ހުވައި ލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޒު މުހައްމަދު ސަލީމްއެވެ.

ފިނޭންސް މިނިސްޓަރުގެ މަގާމަށް ބޭފުޅަކު އައްޔަނުކުރެއްވީ، އެ މަގާމުގައި ކުރިން ހުންނެވި މޫސާ ޒަމީރު މިއަދުގެ ވަގުތެއްގައި މަގާމުން އިސްތިއުފާ ދެއްވުމާ ގުޅިގެންނެވެ. ނަމަވެސް، ޒަމީރު އިސްތިއުފާ ދެއްވި ސަބަބެއް ސަރުކާރުން އަދި ހާމަކޮށްފައެއް ނުވެއެވެ.

އަލަށް އައްޔަނުކުރެވުނު ފިނޭންސް މިނިސްޓަރު ހަސަން ޒަރީރަކީ މާލީ ދާއިރާއިން މަތީ ތައުލީމު ހާސިލްކުރައްވައިގެން ހުންނެވި، ފުންނާބުއުސް ބޭފުޅެކެވެ. އެގޮތުން އިންޓަނޭޝަނަލް އިސްލާމިކް ޔުނިވަރސިޓީ އޮފް މެލޭޝިއާ އިން އެކައުންޓިން ދާއިރާއިން ބެޗެލަރސް ޑިގްރީ އަދި ފިނޭންސްގެ ދާއިރާއިން މާސްޓާސް ޑިގްރީ އެމަނިކުފާނު ވަނީ ހާސިލްކުރައްވާފައެވެ.

މި މަގާމަށް އައްޔަނުކުރެއްވުމުގެ ކުރިން ޒަރީރު ހުންނެވީ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ އެންމެ އިސްވެރިޔާ، ކޮމިޝަނަރ ޖެނެރަލް އޮފް ޓެކްސޭޝަންގެ މަގާމުގައެވެ. މީގެ އިތުރުން، އެމަނިކުފާނަކީ 'ގްލޯބަލް ފޯރަމް އޮން ޓެކްސް ޓްރާންސްޕޭރެންސީ' ގެ އޭޝިއާ އިނީޝިއޭޓިވްގެ ކޯ-ޗެއަރގެ މަގާމުވެސް މިހާރު ފުރުއްވަމުން ގެންދަވާ ބޭފުޅެކެވެ.

ހަސަން ޒަރީރު ވަނީ މީގެ ކުރިން ބޭންކް އޮފް މޯލްޑިވްސް (ބީއެމްއެލް) ގެ ބޯޑު މެންބަރުކަމާއި، ފިނޭންސް މިނިސްޓްރީގެ ޑިރެކްޓަރުގެ މަގާމުވެސް ފުރުއްވާފައެވެ. އަދި 2010 ވަނަ އަހަރުން ފެށިގެން 2019 ވަނަ އަހަރާ ހަމައަށް ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމުވެސް އެމަނިކުފާނު ވަނީ އަދާކުރައްވާފައެވެ.

2006 ވަނަ އަހަރުން ފެށިގެން ފިނޭންސްއާ ގުޅުންހުރި އެކި ފަންތީގެ މަގާމުތައް އެކި މަގާމުތައް ޒަރީރު ފުރުއްވާފައިވާފައިވެއެވެ.