ދިވެހިރާއްޖޭގައި މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނަށް ޢަމަލުކުރަން ފެށިފަހުން، ފުރަތަމަ ފަހަރަށް ރައީސުލްޖުމްހޫރިއްޔާގެ އޮފީހާއި ހުރިހާ ވުޒާރާތަކަކުން މަޢުލޫމާތު ހާމަކުރުމުގައި 100 އިންސައްތަ ކާމިޔާބީ ހޯދާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާން ކުރައްވައިފިއެވެ.
މިއަދު އެކްސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ، 2014 ވަނަ އަހަރު މައުލޫމާތު ހޯދައި ލިބިގަތުމުގެ ހައްގުގެ ގާނޫނު ވުޖޫދުވި ފަހުން، ސަރުކާރުގެ ހުރިހާ އިދާރާތަކަކުން އިސްނަގައިގެން މައުލޫމާތު ހާމަކުރުމުގެ މިންގަނޑުތަކަށް ފުރިހަމައަށް އަމަލުކުރި މިއީ ފުރަތަމަ ފަހަރު ކަމަށެވެ. މީގެ ކުރިން އާންމުންނަށް ލިބުން ދަތިވެފައިވާ ގިނަ މައުލޫމާތުތަކެއް މިހާރު ވަނީ އާންމުކޮށް ހުޅުވާލާފައެވެ.
ރައީސް ވިދާޅުވި ގޮތުގައި، ދެފުށް ފެންނަ ގޮތަށް ކަންކަން ކުރުމަކީ ހަމައެކަނި ސިޔާސަތެއް ނޫނެވެ. ނަމަވެސް އެއީ މި ސަރުކާރުން ރައްޔިތުންގެ އިތުބާރު ހޯދުމަށާއި، ޑިމޮކްރެޓިކް ނިޒާމު ހަރުދަނާކުރުމަށްޓަކައި ގެންގުޅޭ އެންމެ މުހިންމު އެއް ތަނބެވެ. މިއީ ސަރުކާރުގެ ޒިންމާދާރުކަން އިތުރުކުރުމަށް އެޅުނު ވަރަށް މުހިންމު ފިޔަވަޅެއްގެ ގޮތުގައި އެމަނިކުފާނު ފާހަގަކުރެއްވިއެވެ.
Advertisement
"މި ކާމިޔާބީއަކީ ހުޅުވާލެވިފައިވާ، ޖަވާބުދާރީވާ، އަދި ރައްޔިތުން މަރުކަޒުކޮށްގެން ހިންގާ ސަރުކާރެއް ބިނާކުރުމަށް އަޅުގަނޑުމެން ކުރާ މަސައްކަތުގެ ހެއްކެއް،"
ރައީސް ޑރ. މުހައްމަދު މުއިއްޒު
މި މުހިންމު ލަނޑުދަނޑި ހާސިލުކުރުމަށް މަސައްކަތްކުރި ހުރިހާ މުއައްސަސާތަކަކަށާއި ސަރުކާރުގެ މުވައްޒަފުންނަށް ރައީސުލްޖުމްހޫރިއްޔާ ވަނީ ޝުކުރު އަދާކުރައްވާފައެވެ. އަދި ކުރިއަށް އޮތް ތަނުގައިވެސް ޑިޖިޓަލް ވަސީލަތްތައް މެދުވެރިކޮށް، ސަރުކާރުގެ ނިންމުންތަކުގައާއި ހަރަކާތްތަކުގައި ރައްޔިތުންގެ ބައިވެރިވުން އިތުރުކޮށް، މަޢުލޫމާތު ހޯދުމުގެ ފުރުސަތު ފުޅާކުރުމަށް ސަރުކާރުން ސާބިތުކަމާއެކު ދެމިއޮންނާނެކަމުގެ ޔަގީންކަން ރައީސް ދެއްވިއެވެ.
