އީރާނުން މިރޭ އިސްރާއީލަށް މިސައިލް ހަމަލާއެއް ދީފިއެވެ.

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)އިން ބުނީ ބެލިސްޓިކް މިސައިލްތަކުން އިސްރާއީލުގެ ވައިގެ ސިފައިންގެ މަރުކަޒަށް ޙަމަލާ ދީފައިވާ ކަމަށެވެ.

މަސްދަރުތައް ބުނާ ގޮތުގައި އީރާނުން ވަނީ އިސްރާއީލުގެ އުތުރުގެ ހައިފާ ސިޓީއާ ގާތްގަނޑަކަށް 20 ކިލޯމީޓަރު ދުރުގައި އޮންނަ ރަމަތު ޑޭވިޑް އެއާ ބޭސްއަށް ބެލިސްޓިކް މިސައިލުން ހަމަލާ ދީފައެވެ.

އިސްރާއީލުގެ ވައިގެ މަރުކަޒަކީ ލުބުނާނުގެ ދެކުނާއި ބެއިރޫތުގެ ދެކުނު ސަބަރބްތަކާ ދެކޮޅަށް ފެށި “އުދުވާނީ ހަމަލާތަކުގެ މަސްދަރު” ކަމަށް ވެއެވެ. އީރާނުން ވަނީ ލުބުނާނުގައިވާ ހިޒްބުاللهގެ މައި ހަބުތަކަށް ޙަމަލާ ދޭނަމަ އިޒުރޭލު ނަރަކަޔަކަށް ހަދާލާނެ ކަމަށް ބުނެ މީގެކުރިން އިންޒާރު ވެސް ދީފައެވެ.

އީރާނުބް މިރޭ ބުނީ މި ހަމަލާއަކީ ހިޒްބުالله އާއި ގުޅުން ހުރި ސަރަހައްދުތައް ހިމެނޭ ގޮތަށް ބެއިރޫތުގެ ދެކުނަށް އަމާޒުކޮށްގެން އިސްރާއީލުން ދެމުންދާ ވައިގެ ހަމަލާތަކުގެ ބަދަލު ހިފުމުގެ ހަމަލާއެއް ކަމަށެވެ.

އިސްރާއީލުން ލުބުނާނުގައި އަސްކަރީ އޮޕަރޭޝަންތައް ކުރިއަށް ގެންދާނަމަ އިތުރު ހަމަލާތަކެއް އަތުވެދާނެ ކަމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އިންޒާރު ދީފައިވެ އެވެ. އަދި ހަމަނުޖެހުން ފުޅާވެއްޖެނަމަ އެ ސަރަހައްދުގައި ހުރި އެމެރިކާގެ އަސްކަރީ މުދާތައް އަމާޒަކަށް ވެދާނެ ކަމުގެ އިންޒާރު ވެސް އީރާނުގެ އޮފިޝަލުން ވަނީ ދީފަ އެވެ.

މިރޭގެ މިސައިލް ހަމަލާ އާއި ގުޅިގެން އީރާނާއި އިސްރާއީލާއި ހިޒްބުالله އަދި އެހެނިހެން ފަރާތްތައް ބައިވެރިވާ ފުޅާ ސަރަހައްދީ ހަނގުރާމައެއް އަލުން ފެށިދާނެ ކަމުގެ ބިރު ވަނީ އުފެދިފަ އެވެ. އިސްރާއީލުގެ އަސްކަރިއްޔާގެ ތަރުޖަމާނުން ވަނީ މިހަމަލާއަކީ ސީރިއަސް ހަމަލާއެއް ކަމަށް ސިފަކުރައްވައި، އީރާނަށް ހަމަލާ ދޭނެ ކަމުގެ އިޝާރާތެއް ދީފައެވެ.

އަނެއްކޮޅުން އެމެރިކާގެ ރައީސް ޑޮނަލްޑް ޓްރަމްޕް ވަނީ މަޝްވަރާ އަށް އީރާނަށް ގޮވާލާފައެވެ.