އައްޑޫ ސިޓީ ހިތަދޫ އުތުރު ދާއިރާގެ ބައި-އިލެކްޝަނުން ފެނިގެންދިޔަ ނަތީޖާއަކީ، ރާއްޖޭގައި މަލްޓި-ޕާޓީ ސިސްޓަމް ތައާރަފްވި ފަހުން ޕީއެންސީ، ޕީޕީއެމް އަދި ޑީއާރުޕީ ފިކުރުގެ ކެންޑިޑޭޓަކަށް އެ ދާއިރާއިން އެންމެ މަތީ އިންސައްތައަކުން ވޯޓު ލިބުނު ފަހަރު ކަމަށް ތަފާސްހިސާބުތަކުން ދައްކައިފިއެވެ.

އިއްޔެ ބޭއްވުނު ހިތަދޫ އުތުރު ދާއިރާގެ ބައި-އިލެކްޝަނުގެ ވަގުތީ ނަތީޖާ ދައްކާގޮތުން، މި އިންތިހާބު ކާމިޔާބު ކުރެއްވީ އައްޑޫ ސިޓީގެ ކުރީގެ މޭޔަރު އަދި އެމްޑީޕީގެ ކެންޑިޑޭޓް އަބްދުﷲ ސޯދިގު (ސޯބެ) އެވެ. އޭނާ އިންތިހާބު ކާމިޔާބު ކުރެއްވީ 1,375 ވޯޓުންނެވެ. އެއީ ވޯޓުލީ މީހުންގެ 51.15 އިންސައްތައެވެ. ސަރުކާރު ހިންގާ ޕީއެންސީގެ ކެންޑިޑޭޓް އަހްމަދު ސައީދު (ސޮޑާ) އަށް ލިބިވަޑައިގަތީ 1,313 ވޯޓެވެ. އެއީ 48.85 އިންސައްތަ ވޯޓެވެ. ސޯބެ އިންތިހާބު ކާމިޔާބު ކުރެއްވީ އެންމެ 62 ވޯޓުގެ ތަފާތުންނެވެ.

މި ނަތީޖާއާއެކު، މީގެ ކުރިން މި ފިކުރުގެ ޕާޓީތަކުން އެ ދާއިރާގައި ހޯދާފައިވާ ނަތީޖާތަކަށް ބަލާއިރު ބޮޑު ކުރިއެރުމެއް ލިބިފައިވާކަން ފާހަގަކުރެވެއެވެ. ތަފާސްހިސާބުތަކަށް ބަލާއިރު:

2008 ރިޔާސީ އިންތިހާބު: ޑީއާރުޕީގެ ކެންޑިޑޭޓް ރައީސް މައުމޫނަށް ލިބިވަޑައިގަތީ 34 އިންސައްތައެވެ.

2009 މަޖިލިސް އިންތިހާބު: ޑީއާރުޕީގެ ކެންޑިޑޭޓަށް ލިބިވަޑައިގަތީ 26 އިންސައްތައެވެ.

2013 ރިޔާސީ އިންތިހާބު: ޕީޕީއެމްގެ ކެންޑިޑޭޓް ރައީސް ޔާމީނަށް ލިބިވަޑައިގަތީ 29 އިންސައްތައެވެ.

2014 މަޖިލިސް އިންތިހާބު: ޕީޕީއެމްގެ ކެންޑިޑޭޓަށް ލިބިވަޑައިގަތީ 47 އިންސައްތައެވެ.

2018 ރިޔާސީ އިންތިހާބު: ރައީސް ޔާމީނަށް ލިބިވަޑައިގަތީ 26 އިންސައްތައެވެ.

2019 މަޖިލިސް އިންތިހާބު: ޕީޕީއެމްގެ ކެންޑިޑޭޓަށް ލިބުނީ އެންމެ 5 އިންސައްތައެވެ.

2023 ރިޔާސީ އިންތިހާބު: ރައީސް ޑރ. މުއިއްޒަށް ފުރަތަމަ ބުރުގައި 31 އިންސައްތަ އަދި ދެވަނަ ބުރުގައި 38 އިންސައްތަ ލިބިވަޑައިގަތެވެ.

2024 މަޖިލިސް އިންތިހާބު: ޕީއެންސީގެ ކެންޑިޑޭޓް ސިނާނަށް ލިބިވަޑައިގަތީ 39 އިންސައްތައެވެ.

މީގެ އިތުރުން މިއަހަރު ބޭއްވުނު ކައުންސިލް އިންތިހާބުގައި ޕީއެންސީގެ ކެންޑިޑޭޓަށް 38 އިންސައްތަ ލިބުނުއިރު، އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އިންތިހާބުގައި ލިބުނީ 35 އިންސައްތައެވެ.

ނަމަވެސް، އިއްޔެ ބޭއްވުނު ބައި-އިލެކްޝަނުގައި ޕީއެންސީގެ ކެންޑިޑޭޓް ސޮޑާ ވަނީ 49 އިންސައްތައާ ގާތްކުރާ މިންވަރަކަށް ވޯޓު ހޯއްދަވައި، އެ ދާއިރާގައި މި ފިކުރުގެ މަގުބޫލުކަން އާ އުސްމިނަކަށް ގެންގޮސްދެއްވާފައެވެ. އިންތިޚާބުން ކާމިޔާބީ ނުލިބުނު ކަމުގައިވިޔަސް، މިއީ އެ ދާއިރާގައި ޕީއެންސީގެ ސަޕޯޓަރުން އުފާފާޅުކުރަން ހައްގުވާ ފަދަ ތާރީހީ ނަތީޖާއެކެވެ.