އައްޑޫސިޓީ ހިތަދޫ އުތުރު ދާއިރާގެ ބައި-އިލެކްޝަނަށްފަހު، ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ، ޕީއެންސީގެ ކެމްޕެއިން ޓީމަށާއި ކެނޑިޑޭޓަށް ވަރަށް ބޮޑަށް ތައުރީފު ކުރައްވައިފިއެވެ.

މިއަދު ބޭއްވުނު މި އިންތިހާބާ ގުޅޭގޮތުން އެކްސްގައި ކުރެއްވި ޕޯސްޓެއްގައި އަބްދުއްރަހީމް ވިދާޅުވީ، ޕީއެންސީގެ ކެނޑިޑޭޓް އަހްމަދު ސައީދު (ސޮޑާ) އަށް ވޯޓްދެއްވި އެ ދާއިރާގެ ލޮބުވެތި ރައްޔިތުންނަށް ނުހަނު އިހުލާސްތެރިކަމާއެކު ޝުކުރު ދަންނަވާ ކަމަށެވެ. އަދި އަހްމަދު ސައީދު ކުރެއްވި ބުރަ މަސައްކަތާއި ދެއްކެވި ހިތްވަރަށް ސާބަސް ދެއްވަމުން، ކެމްޕެއިން ޓީމުން ކުރެއްވީ ތަޢުރީފު ހައްގު މަސައްކަތެއްކަން އެމަނިކުފާނު ފާހަގަކުރެއްވިއެވެ.

މަޖިލިސް ރައީސް އިތުރަށް ވިދާޅުވީ، އައްޑޫ ސިޓީގައި ބެހެއްޓުނު ފޮށިތަކުން ޕީއެންސީގެ ކެނޑިޑޭޓް ކުރި ހޯއްދެވުމަކީ ލިބުނު ވަރަށް ބޮޑު ކާމިޔާބީއެއް ކަމަށެވެ. އަދި މިއަދުގެ ނަތީޖާއިން ހިތްވަރު ލިބިގެން، 2028 ވަނަ އަހަރުގެ ރިޔާސީ އިންތިހާބަށް ރައީސް ޑރ. މުހައްމަދު މުއިއްޒާ އެކު ތިއްބެވީ ވަރަށް ވަރުގަދަ އަމާޒެއްގައި ކަމަށްވެސް އަބްދުއްރަހީމް ވިދާޅުވިއެވެ.

ހިތަދޫ އުތުރު ދާއިރާގެ ބައި-އިލެކްޝަންގެ ވަގުތީ ނަތީޖާ ދައްކާގޮތުން، މި ގޮނޑި ކާމިޔާބު ކުރެއްވީ އިދިކޮޅު އެމްޑީޕީގެ ކެނޑިޑޭޓް އަދި ކުރީގެ އައްޑޫ މޭޔަރު އަބްދުﷲ ސޯދިގު (ސޯބެ) އެވެ. ސޯބެ އިންތިހާބު ކާމިޔާބު ކުރެއްވީ 62 ވޯޓުގެ ތަފާތުންނެވެ. ސޯބެއަށް 1375 ވޯޓު ލިބިވަޑައިގެންނެވި އިރު، ސޮޑާއަށް ލިބިވަޑައިގަތީ 1313 ވޯޓެވެ.

މި އިންތިހާބުގެ ނަތީޖާއަށް ބަލާއިރު، ވަކިވަކި ފޮށިތަކުން ޕީއެންސީ ވަނީ ބޮޑު ކުރިއެރުމެއް ހޯދާފައެވެ. އެގޮތުން ޕީއެންސީން 4 ފޮށީގެ މެޖޯރިޓީ ނެގިއިރު، އެމްޑީޕީއަށް ނެގުނީ 3 ފޮށީގެ މެޖޯރިޓީއެވެ. ހާއްސަކޮށް ހިތަދޫގައި ބެހެއްޓުނު ފޮށިތަކަކުން ކުރި ހޯއްދެވީ ސޮޑާއެވެ. ނަމަވެސް ސޯބެއަށް އިންތިހާބު ކާމިޔާބުވީ މާލޭގައި ބެހެއްޓުނު ވޯޓު ފޮށިތަކުން ލިބުނު ނަތީޖާއާ އެކުގައެވެ.