ކުރިޔަށް އޮތް ދެއަހަރުތެރޭ ރާއްޖޭގައި މީހުން ދިރިއުޅޭ ހުރިހާ ރަށެއްގައި ޒަމާނީ ކުނިކޮށިތައް ޤާއިމުކުރުމާއި، ހުރިހާ ރަށެއްގެ ގޮނޑުދޮށް ޙިމާޔަތްކުރުމަކީ އަމާޒެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އެވަގުތެއްގައި ރައްޔިތުންގެ ވިންދު އެކަމަކާ ގުޅިފައިވާ ދާއިރާއަކަށް ޚާއްސަކޮށްގެން، "ދަ ޕަލްސް" ނަމުގައި ރައީސް އޮފީހުން ގެނެސްދޭ ޕްރޮގްރާމެއްގައި ވާހަކަފުޅު ދައްކަވަމުންނެވެ.
ރާއްޖޭގެ 144 ރަށެއްގައި ކުނި މެނޭޖްކުރާ މަރުކަޒުތައް ވަނީ ގާއިމް ކޮށްފައެވެ. އޭގެތެރެއިން ގިނަ ތަންތަން ހުރީ ޒަމާނާއި އެކަށީގެން ނުވާ ގޮތަށެވެ. އެހެންކަމުން އިތުރު ހިދުމަތްތައް ފުޅާކުރުމަށް ކުނި މެނޭޖްކުރުމުގެ އިތުރު 88 މަޝްރޫއު ކުރިއަށްދާ އިރު، “މަގޭ ސާފު ރާއްޖެ” ޕްރޮގްރާމްގެ ދަށުން 109 ރަށެއްގައި ކުނި މެނޭޖްކުރުމުގެ މަސައްކަތް ކޮށްފައި ވެއެވެ.
ސަރުކާރުގެ އަމާޒަކީ ކުނި މެނޭޖްކުރުމުގެ ވަސީލަތްތައް ހުރިހާ ރަށެއްގައި ޤާއިމްކޮށް ތިމާވެށި ތަޣައްޔަރުވުން ކުޑަކޮށް، ދުނިޔެއަށް ނަމޫނާ ދެއްކުމެވެ.
Advertisement
ރައީސް ވިދާޅުވީ މި ސަރުކާރުން މަޝްރޫޢުތައް ކުރިއަށް ގެންދަނީ ތަރައްޤީ އާއި ތިމާވެށި ގުޅިލާމެހިގެން ދާނެ ގޮތަކަށް ކަމަށާއި، މީގެ ސަބަބުން ތިމާވެށި ޙިމާޔަތް ކުރުމުގައި ދުނިޔޭގެ އެހެން ޤައުމުތަކަށް ނަމޫނާ ދައްކާނެ ޤައުމަކަށް ރާއްޖެ ވާނެ ކަމަށެވެ.
ރައީސް ޑރ. މުޢިއްޒަކީ ތިމާވެށީގެ މައްސަލައިގައި މުޅި ދުނިޔޭގައި ވެސް އެންމެ ވަރުގަދަޔަށް ވަކާލާތު ކުރައްވަމުން ގެންދަވާ ލީޑަރެވެ. ކޮޕްސަމިޓުގައްޔާއި އދ.ގެ ޚާއްޞަ ބައްދަލުވުންތަކުގައި އެމަނިކުފާނު ވަނީ ތިމާވެށީގެ މައްސަލަތަކުގައި ވަރަށް ބޮޑަށް ކަންބޮޑުވެ ވަޑައިގެން ވާހަކަފުޅު ދައްކަވާފައެވެ.
“ދަ ޕްލަސް” ގައި ރައީސް ވިދާޅުވީ ތިމާވެށި ޙިމާޔަތް ކުރުމުގެ މަސައްކަތް ކުރައްވާނީ ވަށާޖެހޭ ގޮތަށް ކަމަށާއި މިހާތަނަށް އެކަން އެގޮތަށް ނުވެ އޮތީ ކުރިން އަޅާފައިވާ ބިންގާ ގޯސްވުމުންނެވެ.
”ތިމާވެށި ހިމާޔަތްކުރުމުގެ ވާހަކަ އަޅުގަނޑު ދައްކަނީ، މިސަރުކާރުން ވަރަށް ޕްރެކްޓިކަލްކޮށް ނަތީޖާ ނެރެވޭނެ ގޮތަށް ވަށާޖެހޭ ގޮތަކަށް. މީގެ ކުރީގައި އެސަމާލުކަން އެގޮތަށް ދެވިފައި ނެތީ. ހަމައެކަނި ތަރައްޤީގެ މަސައްކަތްތަކަށް ނުވަތަ ތިމާވެށި ހިމާޔަތްކުރުމުގެ މަސައްކަތްތަކަށް، މީގެންވެސް އެއްބައި ކުރިއަށް ގެންދެވެނީ. ވަށާޖެހޭ ގޮތަކަށް އެކަންތައްތައް ކުރިއަށް ގެންދެވިފައެއް ނުއެއް ނެތީމަ އެކަން އެއޮތީ ނުވެފައި." ރައީސް ވިދާޅުވިއެވެ.
