ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ހުސްވުމާ ގުޅިގެން ބާއްވާ ބައި-އިލެކްޝަންގެ ވޯޓުލުން މާދަމާ އޮންނާނެ އެވެ.

އިލެކްޝަންސް ކޮމިޝަނުން މައުލޫމާތު ދިންގޮތުގައި، މި ބައި-އިލެކްޝަންގެ ވޯޓުލުން ކުރިއަށްދާނީ މާދަމާ ހެނދުނު 8:00 އިން ފެށިގެން ހަވީރު 4:00 އާ ހަމައަށެވެ. މި އިންތިހާބާ ގުޅޭ ކެމްޕެއިން ކުރުމުގެ ހަރަކާތްތައް މިއަދު އިރުއޮއްސި 6:00 އިން ފެށިގެން އާދިއްތަ ދުވަހުގެ ހެނދުނު 6:00 އާ ހަމައަށް މަނާވާނެ އެވެ.

މި އިންތިހާބުގައި ވޯޓުލުމުގެ ހައްގު ޖުމްލަ 4,121 މީހުންނަށް ލިބިގެންވާއިރު، ވޯޓުލުމަށްޓަކައި މާލެ އާއި އައްޑޫ ސިޓީގައި ޖުމްލަ 7 ވޯޓު ފޮއްޓެއް ބެހެއްޓުމަށް ވަނީ ހަމަޖެހިފަ އެވެ. އޭގެ ތެރޭގައި ހިމެނެނީ މާލޭގެ ދަރުމަވަންތަ ސްކޫލުގައި ބަހައްޓާ 2 ފޮށްޓާއި، އައްޑޫ ސިޓީ ހިތަދޫ ސްކޫލުގައި ބަހައްޓާ 5 ފޮށްޓެވެ.

ވޯޓު ފޮށި ބަހައްޓާ ތަންތަން:

1. މާލެ، ދަރުމަވަންތަ ސްކޫލް (ދެކުނު އިމާރާތް، ލައިބްރަރީ އިރުމަތި އަދި ހުޅަނގު)
2. އައްޑޫ ސިޓީ، ހިތަދޫ ސްކޫލް (ހޯލުގެ ދެކުނު، މެދު، އަދި ކްލާސްރޫމް 1 އާއި 2)

އިލެކްޝަންސް ކޮމިޝަނުން ބުނީ މި ބައި-އިލެކްޝަނަށް އެ ކޮމިޝަނުން ފުރިހަމައަށް ތައްޔާރުވެފައިވާ ކަމަށެވެ. އެގޮތުން ވޯޓުލުމަށް ބޭނުންވާ އޮފިޝަލުން ހަމަޖައްސައި، އެ ފަރާތްތަކަށް ބޭނުންވާ ތަމްރީނުތައް މިހާރު ވަނީ ނިންމާފަ އެވެ. އަދި އިންތިހާބަށް ބޭނުންވާ 4,154 ވޯޓު ކަރުދާހާއި ވޯޓު ފޮށިތައް މިހާރު ވަނީ އައްޑޫ ސިޓީއަށް ގެންގޮސްފަ އެވެ. ކެންޑިޑޭޓުންގެ ފަރާތުން ވޯޓުލާ މީހުންގެ ރަޖިސްޓަރީގައި ސޮއިކުރުމުގެ ކަންކަން ވެސް މިހާރު ވަނީ ނިމިފަ އެވެ.

މި ބައި-އިލެކްޝަންގައި ވާދަކުރައްވަނީ ދެ ކެންޑިޑޭޓުންނެވެ. އެއީ ސަރުކާރު ހިންގާ ޕީއެންސީގެ ފަރާތުން ވާދަކުރައްވާ އަހްމަދު ސައީދާއި، އިދިކޮޅު އެމްޑީޕީގެ ފަރާތުން ވާދަކުރައްވާ އަބްދުﷲ ސާދިގެވެ.

ހިތަދޫ އުތުރު ދާއިރާގެ ގޮނޑި ހުސްވީ، 2024 ވަނަ އަހަރު އެ ދާއިރާއަށް އިންތިހާބުވި މުހައްމަދު ސިނާންގެ މައްޗަށް ސާބިތު ދަރަންޏެއް އޮތް މައްސަލައެއްގައި، ސުޕްރީމް ކޯޓުން އޭނާގެ މެންބަރުކަމުގެ ޝަރުތު އުނިވެފައިވާ ކަމަށް ކުރި ހުކުމާ ގުޅިގެންނެވެ.