ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ބޭރުގެ އެކި ޚިދުމަތްތަކަށް ދައްކާ ސަބްސްކްރިޕްޝަން ފައިސާ ދެއްކުމުގައި އެއްވެސް ހުރަހެއް ނޯންނާނެ ކަމަށާއި، އެފަދަ މުއާމަލާތްތައް ދުވާލަކު ކަނޑައަޅާފައިވާ ޑޮލަރު ލިމިޓުގެ ތެރޭގައި ނުހިމެނޭނެ ކަމަށް އެ ބޭންކުން ބުނެފިއެވެ.

ބީއެމްއެލްއިން ހާމަކުރި ގޮތުގައި، ބައެއް ކަސްޓަމަރުން ބޭރުގެ ޚިދުމަތްތަކަށް ދައްކާ ސަބްސްކްރިޕްޝަން ފީތައް 'ޑިކްލައިން' ވާކަން ވަނީ ފާހަގަކުރެވިފައެވެ. ނަމަވެސް މިއީ ބޭންކުން މުއާމަލާތް ހިފަހައްޓައިގެން ވާގޮތެއް ނޫން ކަމަށާއި، އެކި ސަބަބުތަކާ ހުރެ މާޗަންޓުން ނުވަތަ ޚިދުމަތްދޭ ފަރާތްތަކުން އެ މުއާމަލާތްތައް ރިޖެކްޓް ކުރަނީ ކަމަށް ބޭންކުން ބުނެއެވެ. އެހެންކަމުން ސަބްސްކްރިޕްޝަން ފީތައް ދެއްކުމުގައި އެއްވެސް ދައްޗެއް ކުރިމަތިވާނަމަ، ބޭންކަށް ސީދާ ގުޅައިގެން އެކަން ހިއްސާކުރުމުން ވަގުތުން ހައްލެއް ހޯދައިދޭނެއެވެ.

ކާޑުތަކުގެ ލިމިޓާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ބީއެމްއެލްގެ ޑޮލަރު ލިމިޓަށް މި މަހުގެ ފަހުކޮޅު ބޮޑު ލުޔެއް ދޭނެ ކަމުގެ އިޝާރާތެއް ލިބިފައިވާ ކަމަށެވެ. ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް ވިދާޅުވީ، ބޭންކަށް ދިމާވެފައިވާ ބޭރު ފައިސާގެ ދަތިތަކާ ގުޅިގެން މިހާރު ހިފަހައްޓާފައިވާ ލިމިޓްތަކަށް "ވަރަށް ބޮޑުތަނުން" ލުޔެއް ދޭނެ ކަމަށް ބޭންކުން މައުލޫމާތު ދީފައިވާ ކަމަށެވެ.

ބީއެމްއެލްގެ ޑެބިޓް ކާޑުތަކުގެ ލިމިޓް މީގެ ކުރިން 250 ޑޮލަރުގައި އޮތުމަށްފަހު، މިދިޔަ އަހަރު 500 ޑޮލަރަށް ބޮޑުކުރިއެވެ. ނަމަވެސް ޑޮލަރު ލިބުމުގެ ދަތިކަމާ ހުރެ ފަހުން ވަނީ ލިމިޓްތަކެއް ކަނޑައަޅައި، ޑެބިޓް ކާޑުން ބޭރުގެ ބައެއް ސައިޓުތަކުން ކުރާ މުއާމަލާތްތަކުން 30 އިންސައްތައިގެ ފީއެއް ނަގަން ނިންމާފައެވެ.

ބޭންކުގެ ތަފާސްހިސާބުތައް ދައްކާ ގޮތުން، މިދިޔަ ފަސް މަސް ދުވަހު ކާޑުގެ މުއާމަލާތްތަކަށް އެކަނިވެސް 198 މިލިއަން ޑޮލަރު ވިއްކާފައިވެއެވެ. މިއީ މަހެއްގެ މައްޗަށް އެވްރެޖްކޮށް 69 މިލިއަން ޑޮލަރެވެ. މިއީ މިދިޔަ އަހަރުގެ އެވްރެޖް ކަމަށްވާ މަހަކު 47 މިލިއަން ޑޮލަރާ އަޅާބަލާއިރު 47 އިންސައްތަ އިތުރު އަދަދެކެވެ.