އަމިއްލަ ނަފުސަށް އިތުބާރުކުރާ، ގައުމިއްޔަތަށް ލޯބިކުރާ ޒިންމާދާރު ޖީލެއް ބިނާކުރުމަށް ސަރުކާރުން ކުރިއަށްގެންދާ "ދިވެހި ވަތަނީ ހިދުމަތުގެ ތަމްރީނު" ޕްރޮގްރާމްގެ ފަންނީ މަރުހަލާގައި ބައިވެރިވުމަށް 77 ޒުވާނަކު މިއަދު ބ. ކިހާދޫއަށް ފުރައިފިއެވެ.

މިކަމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ އަމިއްލަ ނަފުސަށް އިތުބާރުކުރާ، އަގީދާ ވަރުގަދަ، ރޫޙާނީ އަދި ޖިސްމާނީ ގޮތުން ދުޅަހެޔޮ، ޤައުމިއްޔަތަށް ލޯބިކުރާ، ޒިންމާދާރު ރައްޔިތެއް ބިނާކުރުމަށް ސަރުކާރުން ފަށާފައިވާ މުހިންމު މަސައްކަތެއް ކަމަށެވެ.

މިއަދު ބ. ކިހާދޫއަށް ފުރާފައިވަނީ ދިވެހި ވަތަނީ ހިދުމަތުގެ ތަމްރީނުގެ ދެވަނަ ބެޗް ފުރިހަމަކުރި ޒުވާނުންގެ ތެރެއިން، ފަންނީ ތަމްރީނުތައް ހާސިލުކުރުމަށް ޝައުގުވެރިކަން ފާޅުކޮށް ކުރިމަތިލީ ކުދިންނެވެ. މި ކުދިން ތަމްރީނު ހޯދާނީ ބ. ކިހާދޫގައި ޤާއިމުކޮށްފައިވާ އެމް.އެން.ޑީ.އެފްގެ "ސްކޫލް އޮފް އިންޖިނިއަރިން އެންޑް ލޮޖިސްޓިކްސް" ގައެވެ. މި ތަމްރީނު ޕްރޮގްރާމުގައި ރާއްޖޭގެ 17 އަތޮޅެއްގެ 50 ރަށަކަށް ނިސްބަތްވާ ޒުވާނުން ބައިވެރިވެއެވެ.

އުމުރުން 16 އަހަރާއި 19 އަހަރާ ދެމެދުގެ މި 77 ޒުވާނުންނަށް، ތަފާތު 6 ފަންނީ ދާއިރާއަކުން ތަމްރީނު ފުރިހަމަކުރުމުގެ ފުރުސަތު މި މަރުހަލާގައި ލިބިގެންދާނެއެވެ. ސަރުކާރުގެ އަމާޒަކީ މިފަދަ ތަމްރީނުތަކުގެ ޒަރީޢާއިން، ރާއްޖޭގެ އެކި ކަންކޮޅުތަކުގައި ތިބި ޒުވާނުންނަކީ މަސައްކަތްތެރިކަމުގެ ދާއިރާއިން ކުރިއަށްދިއުމުގެ ހުނަރާއި ގާބިލުކަން ހުރި، ގައުމީ ލޯބި އަށަގެންފައިވާ ބަޔަކަށް ހެދުމެވެ.

މި ޕްރޮގްރާމަކީ ސަރުކާރުން ޒުވާނުން ބިނާކުރުމަށް ދެއްވާ ކުރިއަށްގެންދާ މުހިންމު މަޝްރޫއެކެވެ.