ރާއްޖޭގައި އުމުރުން 16 އަހަރުން ދަށުގެ ކުޑަކުދިންނަށް މީސްމީޑިއާގެ ވަކި އެޕްތަކެއް ބޭނުން ނުކުރެވޭ ގޮތް ހެދުމަށްޓަކައި ގާނޫނަށް ގެންނަން ޖެހޭ އިސްލާހުތައް ގެނައުމުގެ މަސައްކަތް ސަރުކާރުން ފަށާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިއުލާން ކުރައްވައިފިއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، 16 އަހަރު ނުފުރޭ ތުއްތު ކުދިންނާއި ޒުވާނުން މީސްމީޑިއާގައި ސައިބާ ބުލީގެ ޝިކާރައަކަށްވެ، އެހެނިހެން ނުރަނގަޅު ކަންކަމުގެ ތެރެއަށް ގޮސް ނުރައްކަލަށް ހުށަހެޅެމުންދާ ކަމަށެވެ. މިއީ މުޅި ދުނިޔޭގައި ވެސް އޮތް ބޮޑު މައްސަލައެއްކަން ފާހަގަކުރައްވަމުން ރައީސް ވިދާޅުވީ، ސައިބާ ބުލީގެ އިތުރުން އޮންލައިން ގްރޫމިންއަކީ ވެސް ކުދިންނަށް ކުރިމަތިވާ ވަރަށް ނުރައްކާތެރި ކަމެއް ކަމަށެވެ.

"އެންމެ ޒުވާން ކުދިން މީސް މީޑިއާގައި ވަރަށް ނުރަނގަޅު ކަންކަމުގެ ތެރެއަށް މިވަނީ ގޮސްފައި. ވަރަށް ހާމްފުލް ކޮންޓެންޓަށް ޒުވާން ކުދިން، ތުއްތު ކުދިން އެބަ އެކްސްޕޯސްވޭ،" ރައީސް ވިދާޅުވިއެވެ.

ރައީސް އިތުރަށް ވިދާޅުވީ ރާއްޖެއަކީ އިސްލާމީ މުޖުތަމައުއަކަށް ވާއިރު، ޒުވާނުންނާއި ތުއްތު ކުދިން މިފަދަ ނުރައްކާތަކުން ސަލާމަތްކުރުމަކީ ސަރުކާރުގެ ޒިންމާއެއް ކަމަށެވެ. މި މަސައްކަތް ކުރިއަށް ގެންދާނީ ކަމާބެހޭ މުއައްސަސާތަކާއި، ޖަމިއްޔާ ޖަމާއަތްތަކުގެ އިތުރުން އާންމު ރައްޔިތުންގެ ލަފަޔާއި މަޝްވަރާގެ މަތިން ކަމަށްވެސް އެމަނިކުފާނު ވިދާޅުވިއެވެ.

މި ފިޔަވަޅުތައް އެޅުމުގައި ރާއްޖެއިން މިސާލަކަށް ބަލާނީ އޮސްޓްރޭލިއާގައި 16 އަހަރުން ދަށުގެ ކުދިންނަށް މީސްމީޑިއާ ބޭން ކުރުމަށް އަޅާފައިވާ ފިޔަވަޅުތަކެވެ. ރައީސް ވިދާޅުވި ގޮތުގައި އެ މިންގަނޑުތައް ރާއްޖެއަށް ތައާރަފުކުރުމަށްޓަކައި އެޕްތައް ހިންގާ ބައިނަލްއަގުވާމީ ކުންފުނިތަކާއެކު ވެސް މަޝްވަރާ ކުރައްވާނެއެވެ. އަދި ކުރިއަށް އޮތް އަހަރެއްހާ ދުވަހުގެ ތެރޭގައި މި މަސައްކަތް ތަންފީޒު ކުރަން ފެށޭނެ ކަމަށް އުންމީދު ކުރައްވާ ކަމަށް ވިދާޅުވިއެވެ.

ނަމަވެސް، މީގެ މާނައަކީ ޑިޖިޓަލައިޒޭޝަނާ ދުރަށް ދިޔުން ނޫންކަން ރައީސް ސާފުކޮށްދެއްވިއެވެ. "އަޅުގަނޑުގެ މައިގަނޑު ސިޔާސަތަކީ މޯލްޑިވްސް 2.0. އަޅުގަނޑުމެންގެ ގައުމަކީ އޭއައި ޑްރިވެން ޑިޖިޓަލް ސޮސައިޓީއަކަށް ހެދުމަށް އަޅުގަނޑު ވަނީ ނިންމާފައި،" ރައީސް ވިދާޅުވިއެވެ.

އެމަނިކުފާނު ވިދާޅުވި ގޮތުގައި އިންޓަނެޓަކީ ތައުލީމު ހާސިލުކުރުމަށާއި ފަންނުވެރިކަން ކުރިއެރުވުމަށް ނުހަނު މުހިންމު ވަސީލަތެކެވެ. އެހެންކަމުން، މި ފިޔަވަޅުތައް އަޅާނީ އެފަދަ ބޭނުންތަކަށް އެއްވެސް ހުރަހެއް ނޭޅޭނެ ގޮތަށް ބަލައިގެން ކަމަށާއި، މައިގަނޑު އަމާޒަކީ ކުދިން ނުބައި ކަންކަމުން ރައްކާތެރިކުރުން ކަމަށް ރައީސް ޑރ. މުއިއްޒު ވިދާޅުވިއެވެ.