އުރަމަތީގެ ކެންސަރު ބައްޔަށް ފަރުވާ ހޯދަމުންދާ މިލިއަނުން ބަލިމީހުންނަށް، ކީމޯތެރަޕީގެ ސަބަބުން ކުރިމަތިވާ ނުރައްކާތެރި ސައިޑް އިފެކްޓްތަކާ ނުލައި ރައްކާތެރިކަމާއެކު ފަރުވާ ފުރިހަމަކުރެވިދާނެކަން އާ ދިރާސާއަކުން ދައްކައިފިއެވެ. ސައިންސްވެރިން މިހާރު ވަނީ ކީމޯތެރަޕީގެ ފައިދާ ކުރާނީ ކޮން ބަލިމީހުންނަކަށްތޯ ބަލައި، އެނޫން މީހުން ވަކިކުރެވޭނެ ޑީ.އެން.އޭ ޓެސްޓެއް އުފައްދާފައެވެ.
ޔުނިވަރސިޓީ ކޮލެޖް ލަންޑަން (ޔޫ.ސީ.އެލް) އިން އިސްނަގައިގެން ކުރިއަށްގެންދިޔަ މި ބައިނަލްއަގުވާމީ ދިރާސާގައި އިނގިރޭސިވިލާތް، ނޯވޭ، ސްވިޑަން، އޮސްޓްރޭލިއާ، ނިއުޒިލޭންޑް އަދި ތައިލެންޑް ހިމެނޭހެން 4،000 އަށްވުރެ ގިނަ ބަލިމީހުން ބައިވެރިވިއެވެ. މި ދިރާސާއިން ދެއްކި ގޮތުގައި، ބަލިމީހުންގެ ތެރެއިން ތިންބައިކުޅަ ދެބައި މީހުންނަކީ ކީމޯތެރަޕީއާ ނުލައި ހަމައެކަނި ހޯރމޯން ތެރަޕީ ބޭނުންކޮށްގެން ފަރުވާ ކުރެވިދާނެ މީހުންނެވެ.
"ޕްރޮސިގްނާ" ގެ ނަމުން ނަންދެވިފައިވާ މި ޖީން ޓެސްޓަކީ އުރަމަތީގެ ކެންސަރު ފެތުރުމުގައި ބައިވެރިވާ 50 ޖީނެއްގެ ހަރަކާތްތެރިކަން ދެނެގަނެ، ބަލި އަލުން އެނބުރި އައުމުގެ ފުރުސަތު އޮތް މިންވަރު ބަލާ ޓެސްޓެކެވެ. މި ޓެސްޓުން ދަށް މާކްސް ލިބުނު މީހުންނަށް ކީމޯތެރަޕީ ނުދީ ފަރުވާ ކުރިއަށް ގެންދިޔައިރު، ފަސް އަހަރުގެ ސަަަަަވައިވަލް ރޭޓް ހުރީ 93.7 އިންސައްތައިގައެވެ. މިއީ ކީމޯތެރަޕީ ދިން މީހުންގެ ސަވައިވަލް ރޭޓް ކަމަށްވާ 94.9 އިންސައްތައާ ވަރަށް ގާތް އަދަދެކެވެ.
Advertisement
އާންމުކޮށް އުރަމަތީގެ ކެންސަރަށް ދެވޭ މައިގަނޑު ފަރުވާއަކީ އޮޕަރޭޝަން ކޮށްގެން ގަނޑު ނެގުމެވެ. އޭގެ ފަހުން ބަލި އަލުން އައުމުގެ ފުރުސަތު ކުޑަކުރުމަށް ކީމޯތެރަޕީ ދެއެވެ. ނަމަވެސް، ކީމޯތެރަޕީގެ ސަބަބުން ވަރުބަލިވުމާއި، މޭނުބައިކުރުމާއި، އިސްތަށި ފޭބުމާއި، ދިފާއީ ނިޒާމު ބަލިކަށިވުން ފަދަ އުނދަގޫތައް ކުރިމަތިވެއެވެ.
ކެންސަރުގެ މާހިރެއް ކަމަށްވާ ޕްރޮފެސަރ ޑޭވިޑް މައިލްސް ވިދާޅުވީ، މިއީ ފަރުވާ ދިނުމުގެ އުސޫލުތަކަށް އަންނާނެ ބޮޑު ބަދަލެއް ކަމަށެވެ. ކުރިން 10 މީހަކަށް ފައިދާކުރާނެ ކަމަށް ބަލައި 100 މީހުންނަށް ކީމޯތެރަޕީ ދިން ނަމަވެސް، މިހާރު މި ޓެސްޓުގެ އެހީގައި އެކަމުން ސަލާމަތްވެވޭނެ ކަމަށް އޭނާ ވިދާޅުވިއެވެ.
މި ދިރާސާގައި ބައިވެރިވި 64 އަހަރުގެ ކޭރަން ބޮންހަމް ބުނިގޮތުގައި، މި ޓެސްޓުގެ ސަބަބުން އޭނާއަށް ކީމޯތެރަޕީއާ ނުލައި ފަރުވާ ކުރެވުމަކީ ލިބުނު ވަރަށް ބޮޑު ހިތްހަމަޖެހުމެކެވެ.
މި ހޯދުންތައް ރަސްމީކޮށް ހުށަހެޅުމަށް ހަމަޖެހިފައިވަނީ އެމެރިކާގެ ޗިކާގޯގައި ބާއްވާ ދުނިޔޭގެ އެންމެ ބޮޑު ކެންސަރު ކޮންފަރެންސްގައެވެ. ނަމަވެސް، އުމުރުން 40 އަހަރުން ދަށުގެ މީހުންނަށް މި ޓެސްޓު ބޭނުންކުރެވޭނެ މިންވަރު ދެނެގަތުމަށް އަދިވެސް އިތުރު ދިރާސާތަކެއް ބޭނުންވާ ކަމަށް ޔޫ.ސީ.އެލް އިން ފާހަގަކުރެއެވެ.
