އިނގިރޭސިވިލާތުގެ ގައުމީ ފުޓްބޯޅަ ޓީމުގެ ކުރީގެ ކެޕްޓަން އަދި ކޯޗު ކެވިން ކީގަންއަށް "ސްޓޭޖް ހަތަރެއް" ގެ ކެންސަރު ޖެހިފައިވާކަން އޭނާ ހާމަކޮށްފިއެވެ. މިއީ ކެންސަރު ބަލީގެ އެންމެ ފަހު އަދި ނުރައްކާތެރި މަރުހަލާއެވެ.

އުމުރުން 75 އަހަރުގެ ކީގަންއަށް ކެންސަރު ޖެހިފައިވާކަން އޭނާގެ އާއިލާއިން އެންމެ ފުރަތަމަ ހާމަކުރީ މިއަހަރުގެ ޖެނުއަރީ މަހުގައެވެ. އެއީ ބަނޑުގެ މައްސަލަތަކަކާ ގުޅިގެން ހޮސްޕިޓަލުގައި ފަރުވާ ހޯދަމުން ދަނިކޮށެވެ. ނިއުކާސަލްގެ ޓައިން ތިއޭޓަރ އެންޑް އޮޕެރާ ހައުސްގައި ބޭއްވި ހަފުލާއެއްގައި ވާހަކަދައްކަމުން ކީގަން ބުނީ، އޭނާއަށް ކެންސަރު ޖެހިފައިވާކަން އެނގުނީ ކާރު އެކްސިޑެންޓެއްގެ ސަބަބުން ކުރަންޖެހުނު އޮޕަރޭޝަނަކަށް ހެދި ސްކޭންތަކުން ކަމަށެވެ.

ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ނުވަތަ ބެލޮންޑިއޯ ދެ ފަހަރު ހޯދާފައިވާ ކީގަން ބުނި ގޮތުގައި، އޭނާ މިހާރު ދަނީ އާ ފަރުވާތަކެއް ހޯދަމުންނެވެ. "ޑޮކްޓަރު ބުނި މި އާ ފަރުވާއިން ރަނގަޅުވާނީ 33 އިންސައްތަ ކަމަށް. އަހަރެން ހީކުރީ 80 ނުވަތަ 90 އިންސައްތަ ކަމަށް،" ކީގަން ބުންޏެވެ. ނަމަވެސް އޭނާ ހިތްވަރުގަދަކަމާއެކު ބަލިން ރަނގަޅުވުމަށް މަސައްކަތް ކުރަމުންދާކަން ވަނީ ފާހަގަކޮށްފައެވެ.

ކީގަންއަކީ ލިވަޕޫލް، ނިއުކާސަލް ޔުނައިޓެޑް، ސައުތެމްޕްޓަން އަދި ހެމްބާގް ފަދަ މަޝްހޫރު ކްލަބްތަކަށް ކުޅެފައިވާ ކުޅުންތެރިއެކެވެ. އަދި އޭނާ ވަނީ އިނގިރޭސި ގައުމީ ޓީމުގެ އިތުރުން މެންޗެސްޓަރ ސިޓީއާއި ފުލަމްއަށްވެސް ކޯޗުކަން ކޮށްދީފައެވެ. ނިއުކާސަލްގެ ތާރީޚުގައި އޭނާއަކީ ވަރަށް މުހިންމު ޝަޚުޞިއްޔަތެކެވެ.

ކީގަންގެ ބަލީގެ ޚަބަރާއެކު ނިއުކާސަލް ޔުނައިޓެޑުން ވަނީ އޭނާއަށާއި އާއިލާއަށް ހެޔޮދުއާ ފޮނުވާފައެވެ. އެ ކްލަބުން ނެރުނު ބަޔާނެއްގައި ބުނެފައިވަނީ ކީގަންއަކީ ކްލަބުގެ ތާރީޚާއި ސަޕޯޓަރުންގެ ހިތްތަކުގައި ޚާއްޞަ މަގާމެއް ދެވިފައިވާ ފަރާތެއް ކަމަށާއި، މި ދަނޑިވަޅުގައި ކްލަބް އޮތީ އޭނާއާއެކު ކަމަށެވެ.

ފުޓްބޯޅައިގެ އިތުރުން ކީގަންއަކީ މިއުޒިކް ދާއިރާއާއި އިޝްތިހާރު ކުރުމުގެ ދާއިރާގައިވެސް މަޝްހޫރުކަން ހޯދާފައިވާ ފަރާތެކެވެ. އޭނާ ބުނި ގޮތުގައި އޭނާގެ ހަނދާނުގައި ބިނާއެއް ބެހެއްޓުމަށްވުރެ ބޮޑަށް އޭނާއަށް މުހިންމީ ސަޕޯޓަރުންގެ ފަރާތުން ލިބޭ ލޯތްބާއި އިހުތިރާމެވެ.