އެމެރިކާ އާއި އިޒުރޭލުގައި ކެންސަރު ޖެހޭ މީހުންގެ އަދަދު އަހަރަކަށްވުރެ އަހަރެއް އިތުރުވަމުންދާ ކަމަށް ރިޕޯޓުތައް ބުނެފިއެވެ.

އެމެރިކާގައި 2023 ވަނަ އަހަރު އަލަށް ކެންސަރު ޖެހުނު މީހުންގެ އަދަދު 1.96 މިލިއަނުގައި ހުރި އިރު، 2024 ގައި އެ އަދަދު ވަނީ 2.00 މިލިއަނަށް އަރާފައެވެ. އަދި ހުސްވި އަހަރު މި އަދަދު 2.05 މިލިއަނަށް މަތިވެފައިވާއިރު، ހިނގަމުންދާ 2026 ވަނަ އަހަރު އެމެރިކާގައި އަލަށް 2.11 މިލިއަނަށްވުރެ ގިނަ މީހުންނަށް ކެންސަރު ޖެހޭނެ ކަމަށް ލަފާކުރެވެއެވެ.

މީގެ އިތުރުން، ކުރީ އަހަރުތަކުގައި ބަލިޖެހި މިހާރުވެސް ދިރިއުޅެމުންދާ މީހުންނާއެކު އެމެރިކާގެ ކެންސަރާއި ހަނގުރާމަ ކުރަމުން ގެންދާ ޖުމްލަ އާބާދީ ވަނީ 18 މިލިއަނަށްވުރެ މަތިވެފައެވެ.

އިޒުރޭލަށް ބަލާއިރު، 2023 ވަނަ އަހަރު 29,500 މީހުންނަށް އަލަށް ކެންސަރު ބަލި ޖެހުނު އިރު ޖެހިގެން އައި 2024 ވަނަ އަހަރު 30,000 އަށް އަދި 2025 ވަނަ އަހަރު 31,000 އަށް މި އަދަދު ވަނީ މަތިވެފައެވެ. މިއަހަރު އިޒުރޭލުގައި އަލަށް 32,500 އެއްހާ މީހުންނަށް ކެންސަރު ޖެހޭނެ ކަމަށް ރިޕޯޓްތަކުން ދައްކާއިރު، އެޤައުމުގައި މިހާރުވެސް 100,000 އަށްވުރެ ގިނަ މީހުން ދަނީ ކެންސަރު ބައްޔަށް ފަރުވާތައް ހޯދަމުންނެވެ.

މަސްދަތުރަކުން ބުނާ ގޮތުގައި މި ދެ ގައުމުގައިވެސް ޒުވާނުންނާއި އަންހެނުންގެ މެދުގައި ކޮލޮރެކްޓަލް އާއި އުރަމަތީގެ ކެންސަރު ފަދަ ބަލިތައް ފެތުރޭ ނިސްބަތް ވަނީ ވަރަށް ބޮޑަށް މަތިވެފައެވެ.

އިޒުރޭލުގެ ކެންސަރު ކޭސްތަކުގެ %21 އަކީ ދުންފަތުގެ އިސްތިއުމާލުކުރުމާ ގުޅިފައިވާ ކޭސްތައް ކަމަށް ތަފާސްހިސާބުތަކުން ދައްކައެވެ.

އިޒުރޭލުގެ އަންހެނުންގެ މެދުގައި ފުއްޕާމޭގެ ކެންސަރު ޖެހޭ މިންވަރު ވެސް ވަރަށް ހަލުވިކަމާއި އެކު އިތުރުވަމުން ދެއެވެ.