އިނގިރޭސިވިލާތުގެ ވެރިރަށް ލަންޑަންގައި އިސްރާއީލާ ދެކޮޅަށް އަޑުއުފުލަމުންދާ "ޕަލަސްޓައިން އެކްޝަން" ގްރޫޕުގެ ސަޕޯޓަރުންތަކެއް އެގައުމުގެ ފުލުހުން ހައްޔަރުކޮށްފިއެވެ. މި ހައްޔަރުކުރުންތައް ހިނގާފައިވަނީ ލަންޑަންގެ މެޓްރޯޕޮލިޓަން ފުލުހުން ފަލަސްތީނަށް ތާއީދުކޮށް ބާއްވާ ހަރަކާތްތަކާ މެދު ގެންގުޅޭ ސިޔާސަތުތަކަށް ބަދަލުތަކެއް ގެނައުމާ ގުޅިގެންނެވެ.
ރިޕޯޓުތައް ބުނާގޮތުން، މި ހަރަކާތުގެ ބައިވެރިން ހައްޔަރުކޮށްފައިވަނީ އިސްރާއީލަށް ހަތިޔާރު ފޯރުކޮށްދޭ ކަމަށް ތުހުމަތުކުރެވޭ ކުންފުނިތަކާ ދެކޮޅަށް އިހުތިޖާޖު ކުރަމުން ދަނިކޮށެވެ. މީގެ ކުރިން މިފަދަ ހަރަކާތްތަކަށް ކޮންމެވެސް ވަރެއްގެ ލުއިތަކެއް ދީފައި އޮތް ނަމަވެސް، ފުލުހުންގެ އައު ނިންމުމާއެކު މިހާރު ވަނީ އާންމު ނިޒާމަށް ބުރޫއަރާ ފަދަ ކޮންމެ ހަރަކާތަކާ މެދު ހަރުކަށި ފިޔަވަޅު އަޅަން ފަށާފައެވެ.
"ޕަލަސްޓައިން އެކްޝަން" އިން ބުނާ ގޮތުގައި ފުލުހުންގެ މި އަމަލަކީ އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަމަލުތަކާ ދެކޮޅަށް އަޑުއުފުލާ ފަރާތްތަކުގެ އަނގަ ބަންދުކުރުމަށް ކުރާ މަސައްކަތެކެވެ. ނަމަވެސް، ފުލުހުން ހާމަކުރި ގޮތުގައި މި ބަދަލު ގެނައީ އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށާއި، ވިޔަފާރިތަކަށް ލިބޭ ގެއްލުންތައް ކުޑަކުރުމުގެ މަގްސަދުގައެވެ.
Advertisement
މި ހާދިސާ ހިނގާފައި މިވަނީ ގާޒާގައި އިސްރާއީލުން ހިންގަމުންދާ ގަތުލުއާންމާ ދެކޮޅަށް ދުނިޔޭގެ އެކި ކަންކޮޅުތަކުގައި އިހުތިޖާޖުތައް ވަރުގަދަވެފައިވާ ދަނޑިވަޅެއްގައެވެ. ފަލަސްތީނުގެ ހައްގުގައި ވަކާލާތުކުރާ ޖަމާއަތްތަކުން ވަނީ އިނގިރޭސި ފުލުހުންގެ މި ނިންމުން ކުށްވެރިކޮށް، މިއީ ހިޔާލު ފާޅުކުރުމުގެ މިނިވަންކަމަށް ހުރަސް އެޅުން ކަމަށް ސިފަކޮށްފައެވެ.
