އަފްޣާނިސްތާނުގެ އިރުމަތީގައި އޮންނަ ލަޣްމާން ޕްރޮވިންސްގެ ހައިވޭއެއްގައި، ޕާކިސްތާނުން އެނބުރި އައި އަފްޣާން ރައްޔިތުން ގޮވައިގެން ދަތުރުކުރި މުދާ އުފުލާ ލޮރީއެއް ފުރޮޅާލައި، އަންހެނުންނާއި ކުޑަކުދިން ހިމެނޭހެން 18 މީހުން މަރުވެއްޖެއެވެ.

ތާލިބާން ސަރުކާރުގެ ތަރުޖަމާނު ޒަބީހުﷲ މުޖާހިދު ވިދާޅުވި ގޮތުގައި، މި ނުރައްކާތެރި އެކްސިޑެންޓް ހިނގާފައިވަނީ ހޮނިހިރު ދުވަހުގެ ފަތިހު 5:30 އެހާއިރު، ލަޣްމާން ޕްރޮވިންސްގެ ޤަރްޣަޔީ ޑިސްޓްރިކްޓްގައެވެ. މި އެކްސިޑެންޓް ހިނގާފައިވަނީ ގިނަ އަދަދެއްގެ މީހުންނާއި ގޭބިސީގެ ސާމާނު ބަރުކޮށްގެން ދަތުރުކުރި ލޮރީގެ ޑްރައިވަރަށް ނިދިޖެހި، މަގުން ކަސިޔާރުވެގެން ކަނޑަކަށް ވެއްޓުމުގެ ސަބަބުންނެވެ.

މި ހާދިސާގައި މަރުވި މީހުންގެ ތެރޭގައި 10 ކުޑަކުދިން ހިމެނޭއިރު، އިތުރު 30 މީހަކަށް އެކިވަރުގެ އަނިޔާތައް ލިބިފައިވާ ކަމަށް ލަޣްމާންގެ ގަވަރުނަރުގެ ތަރުޖަމާނު އަބްދުލް މާލިކް ނިޔާޒީ ވިދާޅުވިއެވެ. އަނިޔާވި މީހުންނަށް މިހާރު ދަނީ ނަންގަރްހާރު ޕްރޮވިންސްގެ ހޮސްޕިޓަލްތަކުގައި ފަރުވާދެމުންނެވެ. އޭގެ ތެރެއިން ބައެއް މީހުންގެ ހާލު ސީރިއަސް ކަމަށް ރިޕޯޓްތައް ބުނެއެވެ.

އެކްސިޑެންޓްވި އާއިލާތަކަކީ ޕާކިސްތާނުން އެނބުރި އައުމަށްފަހު ވަގުތީ ގޮތުން ކުނާރު ޕްރޮވިންސްގައި މަޑުކޮށްގެން ތިބުމަށްފަހު، ވެރިރަށް ކާބުލްއަށް ދިއުމަށް ދަތުރުކުރި ބައެކެވެ. މި ހާދިސާއާ ގުޅިގެން ތާލިބާން ސަރުކާރުން ވަނީ ހިތާމަ ފާޅުކޮށްފައެވެ. އަދި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވަނީ ހާލުގައި ޖެހުނު އާއިލާތަކަށް އެހީތެރިވުމުގެ ގޮތުން 730،000 އަފްޣާނީ (ގާތްގަނޑަކަށް 10،000 ޑޮލަރު) ކަނޑައަޅާފައެވެ.

އަފްޣާނިސްތާނަކީ ގަރުނުތަކަކަށް ދެމިގެންދިޔަ ހަނގުރާމައިގެ ސަބަބުން މަގުތައް ހަލާކުވެ، ޓްރެފިކް ގަވާއިދުތަކަށް ބޯނުލެނބުމުގެ ސަބަބުން ނުރައްކާތެރި އެކްސިޑެންޓްތައް އާންމުކޮށް ހިނގާ ގައުމެކެވެ. އދ. ގެ ތަފާސްހިސާބުތައް ދައްކާގޮތުން، ޕާކިސްތާނުން ގަވާއިދާ ހިލާފަށް އުޅޭ މީހުން ބޭރުކުރަން ފެށި ފަހުން، މިއަހަރުގެ މިހާތަނަށް 447،000 އަށްވުރެ ގިނަ އަފްޣާން ރައްޔިތުން ވަނީ އެނބުރި ގައުމަށް ގޮސްފައެވެ. އިންސާނީ އެހީދޭ ޖަމާއަތްތަކުން ބުނާގޮތުގައި، މިގޮތަށް ބޭރުކޮށްލާ އާއިލާތަކަށް މަޖުބޫރުވަނީ ނުރައްކާތެރި ގޮތްގޮތަށް މުދާ އުފުލާ ލޮރީ ފަދަ އުޅަނދުތަކުގައި ދަތުރުކުރުމަށެވެ.