ރިޝްވަތު ދިނުމާއި ޓެކުމާއި ޖުވާކުޅެގެން މުދާ ހޯދާ މީހުންނަށް ގިޔާމަތް ދުވަހުގައި އޮތީ ނަރަކައިގެ އަޒާބު: ހުތުބާ

މުދާ ހޯދުމުގައި ޝަރުއީ މިންގަނޑުތަކާ ހިލާފުވުމާއި، ރިޝްވަތާއި ޖުވާ ފަދަ ކަންކަމަކީ އިސްލާމްދީނުގައި ކަނޑައެޅިގެން ހަރާމްކުރައްވާފައިވާ ކަންކަން ކަމަށް މިއަދުގެ ހުކުރު ހުތުބާގައި ހަނދާންކޮށްދީފި އެވެ.

މިއަދު ރާއްޖޭގެ މިސްކިތްތަކުގައި އިއްވި ހުތުބާ ބިނާކޮށްފައިވަނީ "ހޭދަކުރުމުގައި އިގްތިސާދުކުރުން" މި މައުޟޫއުގެ މައްޗަށެވެ.

ހުތުބާގައި ބަޔާންކޮށްފައިވާ ގޮތުގައި، ދުނިޔޭގައިވާ އެންމެހައި މުދަލަކީ މާތް ﷲ އަޅުތަކުންނަށް ދެއްވާފައިވާ އަމާނާތެކެވެ. އެ މުދަލުގެ ހަގީގީ މިލްކުވެރިއަކީ މާތް ﷲ ކަމަށްވީހިނދު، މުދާ ހޯދުމާއި ހޭދަކުރުމުގައި ޝަރުއީ ހަމަތަކަށް ރިއާޔަތްކުރުމަކީ ކޮންމެ މުސްލިމެއްގެ މައްޗަށް ލާޒިމު ކަމެކެވެ.

މުދާ ހޯދުމުގައި ގެންގުޅޭ ނުރަނގަޅު އާދަތަކަށް އަލިއަޅުވާލަމުން ހުތުބާގައި ބުނީ، ހިޔާނާތްތެރިވުމާއި، ފޭރުމާއި، ވައްކަންކުރުމާއި، ރިޝްވަތު ދިނުމާއި، ޓެކުމާއި، ރިބާގެ މުއާމަލާތްތަކުގެ އިތުރުން ޖުވާކުޅުމަކީ އިސްލާމްދީނުގައި ބޮޑުވެގެންވާ ފާފަތަކެއް ކަމަށެވެ. އަދި ހައްގުނޫން ގޮތުގައި މުދާ ހޯދާ މީހުންނަށް ގިޔާމަތް ދުވަހުން އޮތީ ނަރަކައިގެ އަޒާބުކަން ކީރިތި ރަސޫލާ ﷺ ގެ ހަދީޘްފުޅުތަކުން އެނގެން އޮތްކަން ހުތުބާގައި ފާހަގަކުރި އެވެ.

މީގެއިތުރުން، ލިބޭ މުދާ ބޭކާރު ގޮތުގައި ހޭދަކުރުމާއި އިސްރާފުކުރުމުގެ ނުރައްކާތެރިކަމުގެ މައްޗަށްވެސް މިއަދުގެ ހުތުބާގައި ވަނީ ބަޔާންކޮށްފަ އެވެ. ބޭނުންވާ މިންވަރަށް ވުރެ އިތުރަށް މުދާ ގަނެ، އެ ތަކެތި ބޭނުންނުކޮށް އުކާލަންޖެހުމަކީ ދީނީ ގޮތުންނާއި އިގްތިސާދީ ގޮތުންވެސް ނުރަނގަޅު އަމަލެއްކަން ފާހަގަކުރި އެވެ.

"އަދި ތިޔަބައިމީހުން ކައިބޮއިއުޅޭށެވެ! އަދި އިސްރާފުނުކުރާށެވެ! ހަމަ ކަށަވަރުން އިސްރާފުކުރާ މީހުން ދެކެ އެކަލާނގެ ލޯބިވެވޮޑިގެނެއް ނުވެތެވެ،" ކީރިތި ގުރުއާނުގެ އާޔަތެއްގެ މާނަ ވިދާޅުވަމުން ހުތުބާގައި ހަނދާންކޮށްދިނެވެ.

ދިރިއުޅުމުގެ ހަރަދުތައް ބެލެހެއްޓުމުގައި އިގުތިސާދީ ވިސްނުން އިސްކުރުމަށް ގޮވާލަމުން ހުތުބާގައި ބުނީ، އަތްމަތި ދަތިވަނީ ގިނަ ފަހަރަށް ލިބޭ މިންވަރަށް ވުރެ އިތުރަށް ހަރަދުކުރުމުން ކަމަށެވެ. އަދި ކޮންމެހެން މަޖުބޫރު ހާލަތެއް މެދުވެރިވެގެން މެނުވީ ދަރަނި ނެގުމުގެ އާދަ ދޫކޮށްލުމަށްވެސް އިލްތިމާސްކުރި އެވެ.

ހުތުބާ ނިންމާލަމުން ވަނީ، ތިމާއަށް ލިބޭ މުދަލަކީ އޭގައި އެހެން މީހުންގެ ހައްގުތަކެއްވެސް އެކުލެވިގެންވާ އެއްޗެއްކަން ހަނދާންކޮށްދީފަ އެވެ. އެގޮތުން އަނބިދަރިންނާއި، ގާތްތިމާގެ މީހުންނާއި، ފަގީރުންނާއި މިސްކީނުންގެ ހައްގުތައް އަދާކުރުމަށް ބާރުއަޅައި، ގިޔާމަތް ދުވަހު ކޮންމެ މީހަކާވެސް އެމީހަކަށް ދެއްވި ނިއުމަތްތަކާ މެދު ސުވާލުކުރެވޭނެކަން ހަނދާންކޮށްދީފަ އެވެ.