ޖަލުގައި ބަންދުކޮށްފައި ތިބި ޝަހުޒާން އާއި ލީވާން ނަމަކަށް ކިޔާ ދެގައިދީން ތިބި ގޮޅިން މޯބައިލް ފޯނެއް ފެނުނު މައްސަލަ މޯލްޑިވްސް ޕޮލިސް ސާވިސްއިން ތަހުގީގު ކުރަން ފަށައިފިއެވެ.
ޝަހުޒާން ވިދާޅުވި ގޮތުގައި އޭނާއާއި ލީވާނު ދެ ގޮޅިއަކަށްލީ ރައީސް އަންގަވައިގެން ކަމަށެވެ. މިކަމާ ގުޅޭގޮތުން ހޯމް މިނިސްޓަރު އަލީ އިހުސާން ހާމަކޮށްފައިވާ މައުލޫމާތުތަކަށް ބަލާއިރު، ޝަހުޒާން މިކަމުގައި ދައްކަމުންދާ ވާހަކަތަކަކީ 100 އިންސައްތަ ދޮގު ވާހަކަތަކެކެވެ.
އިހުސާން ވިދާޅުވީ 15 މެއި ވަނަ ދުވަހުގެ ރޭގަނޑު 19:35 ހާއިރު، މޯލްޑިވްސް ކަރެކްޝަނަލް ސާވިސްގެ އޮފިސަރުން ވަނީ ޝަހުޒާން އާއި ލީވާން ބަންދުކޮށްފައި ތިބި ގޮޅިއަށް ވަދެ، އެ ދެމީހުންގެ ކުރިމަތީގައި އެ ގޮޅި ބަލައި ފާސްކޮށްފަ އެވެ. މި ފާސްކުރުމުގެ ތެރޭގައި އެ ގޮޅީގައި ހުރި ކަބަޑެއްގެ ތެރޭގައި ހުރި އަންނައުނުތަކުގެ ތެރެއިން މޯބައިލް ފޯނެއް ވަނީ ފެނިފަ އެވެ.
މި މައްސަލައާ ގުޅިގެން، ޖަލުގައި އަމަލުކުރާ އުސޫލުތަކުގެ ދަށުން، މި ދެމީހުން މޮނިޓާ ކުރެވޭ ގޮތަށް ވަކި ދެ ގޮޅިއަކަށް ބަދަލުކުރި ކަމަށް އިހުސާން ވިދާޅުވި އެވެ. އަދި އެ ގޮޅިތައް ވަކި އިންޓަވަލް ވަގުތުތަކުގައި ބަލައި ފާސްކުރާ ކަމަށްވެސް އިހުސާން ވިދާޅުވި އެވެ. މިއީ ވަކި ގައިދީއަކަށް އަމާޒުކޮށްގެން ނުވަތަ ވަކި ފަރާތަކުން އަންގައިގެން ކުރާ ކަމެއް ނޫން ކަމަށާއި، މިއީ ޖަލުގެ ސަލާމަތީ ކަންކަން ބެލެހެއްޓުމަށް އާންމުކޮށް އަމަލުކުރާ އުސޫލެއްކަން މިނިސްޓަރު ފާހަގަކުރެ އެވެ.
މީގެ އިތުރުން، މިނިްޓަރު ވިދާޅުވެފައިވަނީ، ޖަލުގައި ހިނގާ މިފަދަ ކަންކަމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮތް ނިންމަވާ ކަންކަން ނޫން ކަމަށެވެ. އަދި ރައީސްގެ ފަރާތްޕުޅުން ޖަލުގެ މިފަދަ ކަންކަމާ ގުޅޭގޮތުން އެއްވެސް އިރުޝާދެއް ދުވަހަކުވެސް ދެއްވާފައި ނުވާކަން މިނިސްޓަރު ކަށަވަރުކޮށްދެއްވި އެވެ.
މި މައްސަލައާ ގުޅިގެން ރާއްޖޭގެ ތިން ނޫސްވެރިއަކު މިނިސްޓަރަށް ގުޅައި ސުވާލުކުރުމުން، ކަން ހިނގާފައިވާ ގޮތުގެ ތަފްސީލީ މަޢުލޫމާތު ވަނީ ހިއްސާކޮށްފައި ކަމަށްވެސް މިނިސްޓަރު ވިދާޅުވި އެވެ. ނަމަވެސް، އެ މަޢުލޫމާތުތައް ރައްޔިތުންނަށް ސާފުކޮށްދީ، ހަގީގަތާ އެއްގޮތަށް ރިޕޯޓްކޮށްފައި ނުވާތީ މިނިސްޓަރު ވަނީ ކަންބޮޑުވުން ފާޅުކުރައްވާފަ އެވެ.
ޖަލަށް ވެއްދުން މަނާ ތަކެތި ގޮޅިން ފެނުނު މި ސީރިއަސް މައްސަލަ މޯލްޑިވްސް ޕޮލިސް ސާވިސްއިން މިހާރު ދަނީ އިތުރަށް ތަހުގީގު ކުރަމުންނެވެ.
