ޕާކިސްތާނުގެ ހުޅަނގު ދެކުނު ބަލޮޗިސްތާން ޕްރޮވިންސްގެ ވެރިރަށް ކުވެޓާގައި، ސިފައިން ގޮވައިގެން ދަތުރުކުރި ރޭލަކަށް އަމާޒުކޮށް ދިން ވަރުގަދަ ޖާނުން ފިދާވުމުގެ ކާރު ބޮމުގެ ހަމަލާއެއްގައި މަދުވެގެން 24 މީހުން މަރުވެ، 50 އަށްވުރެ ގިނަ މީހުން ޒަޚަމްވެއްޖެއެވެ.
އާދީއްތަ ދުވަހު ދިން މި ނުރައްކާތެރި ހަމަލާގެ ޒިންމާ އުފުލާފައިވަނީ އެ ސަރަހައްދުގެ މިނިވަންކަމަށް މަސައްކަތްކުރާ ހަނގުރާމަވެރި ޖަމާއަތެއް ކަމަށްވާ ބަލޮޗިސްތާން ލިބަރޭޝަން އާމީ (ބީ.އެލް.އޭ) އިންނެވެ.
މި ހާދިސާ ހިނގި ސަރަހައްދުން ރިޕޯޓްކުރި ގޮތުގައި، ރޭލު ދަތުރުކުރާ ދަގަނޑު މަގުގެ ކައިރީގައި ހުރި ބައެއް ގެތަކަށާއި އިމާރާތްތަކަށް ބޮޑެތި ގެއްލުންތަކެއް ވަނީ ލިބިފައެވެ. ގޮވުމުގެ ބާރުގަދަކަމުން ރޭލުގެ ބައެއް ބޮގީތައް ފުރޮޅާލައި، އޭގައި ވަނީ އަލިފާން ރޯވެފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، އަނދާފައިވާ އުޅަނދުތަކާއި ފުރޮޅާލާފައިވާ ރޭލު ބޮގީތަކުން ކަޅު ދުން އަރަމުންދެއެވެ.
މި ހާދިސާއާ ގުޅިގެން ކުވެޓާގެ ސަރުކާރު ހޮސްޕިޓަލްތަކުގައި ވަނީ ކުއްލި ނުރައްކަލުގެ ހާލަތު އިއުލާނުކޮށްފައެވެ. އަދި ހުރިހާ ޑޮކްޓަރުންނާއި މެޑިކަލް ސްޓާފުން ޑިއުޓީއަށް ނުކުތުމަށް ވަނީ އަންގާފައެވެ.
ފަހަކަށް އައިސް ޕާކިސްތާނުގައި ވަކިވެގަންނަން މަސައްކަތްކުރާ ޖަމާއަތްތަކުގެ ހަމަލާތައް ވަނީ އިތުރުވެފައެވެ. ޚާއްޞަކޮށް ބަލޮޗިސްތާނުގައި ހިންގާ ޗައިނާގެ އިންފްރާސްޓްރަކްޗާ މަޝްރޫއުތަކާ ދެކޮޅަށް އެ ގައުމުގެ މަސައްކަތްތެރިންނަށް އަމާޒުކޮށް ދޭ ހަމަލާތައް ވަނީ ވަރުގަދަވެފައެވެ. ޗައިނާ-ޕާކިސްތާން އިކޮނޮމިކް ކޮރިޑޯގެ ދަށުން ޗައިނާގެ ޒިންޖިއާންގް ސަރަހައްދު ޕާކިސްތާނުގެ ގްވަދަރު ބަނދަރާ ގުޅާލުމަށް ކުރިއަށްގެންދާ މަޝްރޫއުތަކަށް މި ޖަމާއަތްތަކުން ދަނީ ދެކޮޅު ހަދަމުންނެވެ.
ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ އެކްސްގައި ކުރެއްވި ޕޯސްޓެއްގައި މި ހަމަލާ ހަރުކަށި އިބާރާތުން ކުށްވެރިކުރައްވާފައެވެ.
"ޓެރަރިޒަމްގެ މިފަދަ ފިނޑި އަމަލުތަކުން ޕާކިސްތާނުގެ ރައްޔިތުންގެ އަޒުމެއް ނުގުޑުވޭނެ. ޓެރަރިޒަމްގެ ހުރިހާ ބާވަތެއްގެ އަމަލުތައް ނައްތާލުމުގައި އަޅުގަނޑުމެން ސާބިތުކަމާއެކު ދެމިތިބޭނަން،" ބޮޑުވަޒީރު ވިދާޅުވިއެވެ.
