"ދިވެހި ވަޠަނީ ޚިދުމަތުގެ ފަންނީ ތަމްރީނު-1" ކާމިޔާބުކަމާ އެކު ނިންމާލުމުގެ އުފަލުގައި، ބ. ކިހާދޫގައި އެމްއެންޑީއެފް މިލިޓަރީ ބޭންޑުގެ ޚާއްޞަ ހަރަކާތްތަކެއް މިއަދު ބާއްވައިފިއެވެ.

މި ހަރަކާތްތައް ކުރިއަށްގެންގޮސްފައިވަނީ ދިވެހި ވަޠަނީ ޚިދުމަތުގެ ފަންނީ ތަމްރީނުތައް ހިންގާ، އެމްއެންޑީއެފް ސްކޫލް އޮފް އިންޖިނިއަރިންގ އެންޑް ލޮޖިސްޓިކްސް ހުންނަ ބ. ކިހާދޫގެ ބަނދަރު ސަރަހައްދުގައެވެ. މިއަދު ހަވީރު 16:00 އިން 18:00 އަށް ކުރިއަށްދިޔަ މި ހަރަކާތްތަކަކީ އެ ރަށުގެ ގިނަ އަދަދެއްގެ ރައްޔިތުންނާއި ކުޑަކުދިން ބައިވެރިވި ފޯރިގަދަ ހަރަކާތްތަކެކެވެ.

މި ހަރަކާތުގެ ތެރެއިން އެމްއެންޑީއެފް މިލިޓަރީ ބޭންޑުން ވަނީ ހިތްގައިމު ރީތި ރާގުތަކަށް މިއުޒިކު ކުޅުމާއި، ދިވެހި ސަގާފީ އެކި އައިޓަމްތައް ހުށަހަޅައިދީފައެވެ. މީގެ އިތުރުން، ކުޑަކުދިންނަށް އުފާވެރި މާޙައުލެއް ބިނާކޮށްދިނުމުގެ ގޮތުން ޚާއްޞަ ދެ މެސްކޮޓަކާ އެކު ތަފާތު ކުޅިވަރުތައް ކުރިއަށްގެންގޮސް، ކުޑަކުދިންނަށް ހަދިޔާ ވެސް ވަނީ ބަހާފައެވެ.

އެމްއެންޑީއެފުން ބޭއްވި މި ހަރަކާތަކީ ސިފައިންނާއި ރައްޔިތުންގެ މެދުގައި އޮންނަ ގާތް ގުޅުން އިތުރަށް ބަދަހިކުރުމުގެ މަގުސަދުގައި ބޭއްވި ހަރަކާތެކެވެ. އަދި ސިފައިން ކުރިއަށްގެންދާ ޤައުމީ ޚިދުމަތުގެ މަސައްކަތްތަކުގައި މަދަނީ މުޖުތަމައުގެ އެއްބާރުލުން ދެމެހެއްޓުމަށް ބާރުއެޅުމަކީ ވެސް މި ހަރަކާތް ބޭއްވުމުގެ އެއް ބޭނުމެއް ކަމަށް އެމްއެންޑީއެފުން މަޢުލޫމާތު ދެއެވެ.

މި ހަރަކާތް ނިންމާލާފައިވަނީ ކިހާދޫގެ ރައްޔިތުންގެ ފަރާތުން ސިފައިންނަށް ލިބުނު ފުރިހަމަ އެއްބާރުލުމާއި ތަރުޙީބާ އެކުގައެވެ.