ޗައިނާގެ ޝަންޒީ ޕްރޮވިންސްގައި ހުންނަ ކޮލި ނަގާ މައިނެއްގައި ބާރުގަދަ ގޭސް ގޮވުމެއް ހިނގައި، މަދުވެގެން 90 މީހުން މަރުވެއްޖެއެވެ. މިއީ ފާއިތުވި ދިހަ އަހަރަށްވުރެ ގިނަ ދުވަހުގެ ތެރޭގައި އެ ގައުމުގެ މައިނެއްގައި ހިނގި އެންމެ ނުރައްކާތެރި ހާދިސާއެވެ.
ޗައިނާގެ ދައުލަތުގެ މީޑިއާ، ޒިންހުއާއިން ރިޕޯޓުކޮށްފައިވާ ގޮތުގައި، މި ހާދިސާ ހިނގާފައިވަނީ ހުކުރު ދުވަހު ޝަންޒީ ޕްރޮވިންސްގެ ގިންޔުއާން ކައުންޓީގައި ހުންނަ 'ލިއުޝެންޔޫ' މައިންގައެވެ. މި ހާދިސާ ހިނގި ވަގުތު ބިމުގެ އަޑީގައި 247 މަސައްކަތްތެރިން މަސައްކަތް ކުރަމުންދިޔަ ކަމަށް މައުލޫމާތު ލިބެއެވެ.
މި ގޮވުން ގޮވާފައިވަނީ މައިންގެ ތެރޭގައި ކާބަން މޮނޮކްސައިޑް ގޭސް ހުރި މިންވަރު ނުރައްކާތެރި ދަރަޖައަކަށް މަތިވެފައިވާ ކަމުގެ އިންޒާރެއް ލިބުނުތާ ކުޑަވަގުތުކޮޅެއްގެ ތެރޭގައެވެ. މި ހާދިސާއާ ގުޅިގެން އެ މައިން ބަލަހައްޓާ އިސްވެރިޔާ މިހާރު ވަނީ ހައްޔަރުކުރެވިފައެވެ. ކަމާބެހޭ ފަރާތްތަކުން ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.
Advertisement
ޗައިނާގެ ރައީސް ޝީ ޖިންޕިން ވަނީ މި ހާދިސާއާ ގުޅިގެން ކަންބޮޑުވުން ފާޅުކުރައްވައި، މުޅި ގައުމުގައި މަސައްކަތުގެ މައިދާނުގެ ރައްކާތެރިކަން ކަށަވަރުކުރުމަށް އަންގަވާފައެވެ. "ހުރިހާ ސަރަހައްދުތަކަކުންނާއި އިދާރާތަކުން މި ހާދިސާއިން އިބުރަތް ހާސިލުކުރަންޖެހޭ. މަސައްކަތުގެ މައިދާނުގައި ހުރި ނުރައްކާތައް ދެނެގަނެ، މިފަދަ ބޮޑެތި ހާދިސާތައް ހިނގުން ހުއްޓުވަންޖެހޭ،" ރައީސް ޝީ ވިދާޅުވިއެވެ.
މި ހާދިސާ ހިނގި ޝަންޒީ ޕްރޮވިންސްއަކީ ޗައިނާގައި އެންމެ ގިނައިން ކޮލި އުފައްދާ ސަރަހައްދެވެ. ވޭތުވެދިޔަ އަހަރު އެކަނިވެސް އެ ސަރަހައްދުން އެއް ބިލިއަން ޓަނުގެ ކޮލި ނަގާފައިވެއެވެ. މިއީ ޗައިނާއިން އުފައްދާ ކޮލީގެ ގާތްގަނޑަކަށް ތިންބައިކުޅަ އެއްބަޔެވެ.
ޗައިނާއަކީ ދުނިޔޭގައި އެންމެ ގިނައިން ކޮލި އުފައްދާ އަދި ބޭނުންކުރާ ގައުމެވެ. ނަމަވެސް، ރައްކާތެރިކަމުގެ މިންގަނޑުތައް ދަށްވުމާއި، ގަވާއިދުތަކަށް އަމަލުނުކުރުމުގެ ސަބަބުން ޗައިނާގެ މައިންތަކަކީ ދުނިޔޭގައިވެސް އެންމެ ނުރައްކާތެރި ތަންތަނުގެ ގޮތުގައި ފާހަގަކުރެވެއެވެ. މި ހާދިސާ ހިނގި ސަރަހައްދުގައި އަދިވެސް މީހުން ސަލާމަތްކުރުމުގެ މަސައްކަތްތައް މެދުނުކެނޑި ދަނީ ކުރިއަށެވެ.
