ސަރުކާރުން މާލެ ސަރަޙައްދުގައި ކުރިޔަށް ގެންދާ ބޯހިޔާވަހިކަމުގެ ބިޔަ މަޝްރޫޢުތަކަށް ފޯމު ހުށަހެޅުމުގެ މުއްދަތު، 15 ޖޫން 2026 ވާ ހޯމަ ދުވަހުގެ ނިޔަލަށް އިތުރުކޮށްފި އެވެ. މި ނިންމުން ނިންމާފައިވަނީ ޢީދު ބަންދާ ގުޅިގެން ގިނަ ރައްޔިތުންނަށް ލިޔެކިއުންތައް ހަމަކުރުމުގައި ދަތިތަކެއް ކުރިމަތިވަމުންދާތީ، އެކަމަށް ލުޔެއް ދިނުމުގެ ގޮތުންނެވެ.

މިދިޔަ ޖެނުއަރީ މަހުގެ 18 ގައި ހުޅުވާލި "އާއިލީ ބޯހިޔާވަހިކަން" ޕްރޮގްރާމްގެ ދަށުން ޖުމްލަ 7،900 ފްލެޓާއި 15،000 ގޯތި ދޫކުރުމަށް ސަރުކާރުން ވަނީ ނިންމަވާފަ އެވެ. މި މަޝްރޫއުގެ ދަށުން ފްލެޓް ދޫކުރުމަށް ހަމަޖެހިފައިވަނީ މާލޭގެ ރަށްވެހިންނަށް 4،000 ފްލެޓް، މާލޭގައި ދިރިއުޅޭ ނަމަވެސް ރަށްވެހިވެފައި ނުވާ ފަރާތްތަކަށް 1،500 ފްލެޓް އަދި ހާއްސަ ކެޓަގަރީތަކަށް 2,400 ފްލެޓެވެ.

މީގެ އިތުރުން، ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފަށްޓަވާފައިވާ ރަސްމާލެ މަޝްރޫއުން 25,000 ގޯތި ދޫކުރުމަށް ވަނީ އަމާޒު ހިފާފަ އެވެ. އޭގެ ތެރެއިން ފުރަތަމަ ބުރުގައި ދޫކުރުމަށް ހަމަޖެހިފައިވަނީ 15,000 ގޯއްޗެވެ.

މި ފަހަރު މުއްދަތު އިތުރުކޮށްދީފައިވާ މުހިންމު ކެޓަގަރީތަކުގެ ތެރޭގައި ހިމެނެނީ:

1. ވެށިފަހި މާލެ ނުވަތަ ހިޔާ މަޝްރޫޢު: ފްލެޓް ލިބޭނެ ކަމުގެ ލިޔުން ލިބި، މިހާތަނަށް ފްލެޓް ޙަވާލުނުކުރެވި ހުރި ފަރާތްތަކަށް ޚާއްޞަ ކެޓަގަރީ.
2. ނުކުޅެދުންތެރިކަން ހުންނަ ފަރާތްތައް: ނުކުޅެދުންތެރިކަން ހުންނަ މީހުންނަށް ފްލެޓަށް އެދި ހުށަހެޅުމަށް ޚާއްޞަކުރެވިފައިވާ ކެޓަގަރީ.
3. މާލޭގެ ރައްޔިތުންނަށް ދޫކުރާ ބިން: މާލޭގައި ދިރިއުޅޭ ރައްޔިތުންނަށް ދިރިއުޅުމަށް ދޫކުރާ ބަންޑާރަ ގޯތި.
4. ބިންވެރިޔާ ސްކީމް (ކެޓަގަރީ 1): ކުރިން ޖޮއިންޓް އެޕްލިކޭޝަން ހުށަހަޅައި ގޯތި ލިބިފައިވާ ފަރާތްތަކުގެ ތެރެއިން ވަކިން ގޯއްޗަށް އެދެން ބޭނުންވާ ފަރާތްތަކަށް.
5. ބިންވެރިޔާ ސްކީމް (ކެޓަގަރީ 2): ކުރިން ފްލެޓެއް އޮތުމުގެ ސަބަބުން ޝަރުޠު ހަމަނުވި ފަރާތްތަކުން، ފްލެޓް ދޫކޮށްލުމަށްފަހު ގޯއްޗަށް އެދި ހުށަހަޅާ ކެޓަގަރީ.

މިނިސްޓްރީން ބަޔާންކުރައްވާފައިވާ ގޮތުގައި، ގިނަ އަދަދެއްގެ ރައްޔިތުން އީދު ބަންދާ ދިމާކޮށް ރަށުން ބޭރުގައި އުޅެންޖެހުމުން، ބޭނުންވާ ލިޔެކިއުންތައް އެއްކުރުމުގައި ވަނީ ބޮޑެތި ގޮންޖެހުންތަކެއް ކުރިމަތިވެފަ އެވެ. އެހެންކަމުން، މި އިތުރުކުރެވުނު މުއްދަތުގެ ތެރޭގައި ހުރިހާ ފަރާތްތަކުންވެސް ޕޯޓަލް މެދުވެރިކޮށް ފޯމު ހުށަހެޅުއްވުމަށް މިނިސްޓްރީން ވަނީ އިލްތިމާސްކުރައްވާފަ އެވެ.

މި އިއުލާނާ ގުޅޭގޮތުން އިތުރު މައުލޫމާތު ސާފުކުރެއްވުމަށް ބޭނުންފުޅުވާ ފަރާތްތަކުން މިނިސްޓްރީގެ ހޮޓްލައިން ނަންބަރުތައް ކަމަށްވާ 860-4004 އިން ފެށިގެން 865-4004 އާ ދެމެދުގެ ނަންބަރުތަކަށް ގުޅުއްވުމަށް ވަނީ އެދިފަ އެވެ.