ހައްޖުގެ މަތިވެރި އަޅުކަމަށްފަހު އެނބުރި އަންނައިރު، ރަހިމުގެ ގުޅުމާއި އެކުވެރިކަމާއި އެއްބައިވަންތަކަން ދެމެހެއްޓުމަށް މިއަދުގެ ހުކުރު ހުތުބާގައި ރާއްޖޭގެ އެންމެހައި މުސްލިމުންނަށް ގޮވާލައިފި އެވެ.

މިއަދު ރާއްޖޭގެ މިސްކިތްތަކުގައި އިއްވި ހުތުބާ ހާއްސަކޮށްފައިވަނީ "ހައްޖުގެ އަޅުކަމުން ލިބޭ ފިލާވަޅުތައް" މި މައުޟޫއަށެވެ.

ހުތުބާގައި ބަޔާންކުރި ގޮތުގައި، ހައްޖުގެ އަޅުކަމަކީ އިންސާނާގެ ދުންޔަވީ ހަޔާތުގެ ކުޑަކުޑަ ދަތުރެއްކަން ހަނދާންކޮށްދޭ ކަމެކެވެ. އިހުރާމް ބަންނަ ހިނދުން ފެށިގެން ހައްޖުގެ މަނާސިކުތައް ނިމޭންދެން ހައްޖުވެރިޔާ ކުރިއަށްދާ ފަދައިން، އިންސާނާގެ މުޅި ހަޔާތަކީވެސް އާހިރަތަށްޓަކައި ކުރެވޭ ދަތުރެއްކަން ހުތުބާގައި ފާހަގަކުރިއެވެ. އަދި ދުނިޔޭގެ ދިރިއުޅުމަކީ ވަގުތީ އުފަލެއް ކަމަށާއި، ދެމިހުންނަނިވި އުފަލަކީ އާހިރަތުގެ އުފާކަން ބަޔާންކޮށް، އެކަމަށް ގަދައަޅައި މަސައްކަތް ކުރުމަށް ނަސޭހަތްތެރިވި އެވެ.

ހައްޖުގެ މަނާސިކުތަކަށް އަލިއަޅުވާލަމުން ހުތުބާގައި ބުނީ، ހައްޖަކީ މާތް اللهގެ އަމުރުފުޅުތަކަށް ކިޔަމަންގަތުމަށް ދެވޭ އަމަލީ ތަމްރީނެއް ކަމަށެވެ. އިހުރާމް ބަނުމުގެ ސަބަބުން ކުރިން ހުއްދަ ކަންތައްތަކެއް ހަރާމްވުމަކީ، ނަފުސު ކޮންޓްރޯލްކޮށް الله ހަރާމްކުރެއްވި ކަންތައްތަކާ ދުރުހެލިވުމަށް ލިބޭ ފިލާވަޅެކެވެ. އަދި ހައްޖުގެ ބުރަ އަޅުކަމުގެ ތެރޭގައި ކެތްތެރިކަން އިސްކޮށް، އުރެދުންތަކުން ދުރުހެލިވާ މީހާއަށް އޮތް ޖަޒާއަކީ ސުވަރުގެކަންވެސް ހުތުބާގައި ހަނދާންކޮށްދިނެވެ.

މީގެ އިތުރުން، ހައްޖުގެ އަޅުކަން ފުރިހަމަކުރުމަށްފަހު މުޖުތަމަޢަށް އެނބުރި އަންނަ މީހާއަކީ ރަހިމުގެ ގުޅުމާއި، އެކުވެރިކަމާއި، އެއްބައިވަންތަކަމާއި ޢާއިލީ ގުޅުންތައް ދަމަހައްޓާ މީހަކަށް ވުމަށް ހުތުބާގައި ވަނީ ބާރުއަޅާފަ އެވެ.

ކުރިއަށް އޮތް ބަރަކާތްތެރި އަޟުހާ ޢީދާ ގުޅޭގޮތުން ހުތުބާގައި ބުނީ، އީދުގެ އުފާ ފާޅުކުރާއިރު މުސްލިމުންގެ މެދުގައި އޮންނަންޖެހޭ އެކުވެރިކަމާއި ލޯބީގެ ޝުއޫރުތައް ފާޅުކުރަންޖެހޭ ކަމަށެވެ. އަދި ރުޅިވެރިކަމާއި، ނަފުރަތާއި، ހަސަދަވެރިކަން ދޫކޮށް، އެއްބަނޑު އެއްބަފާ އަހުންތަކެއްގެ ގޮތުގައި އުޅުމަށާއި، އިސްލާމީ އުސޫލުތަކުގެ ތެރޭގައި ޢީދުގެ އުފާ ފާޅުކުރުމަށް މިއަދުގެ ހުތުބާގައި ވަނީ ގޮވާލާފަ އެވެ.