މި އަހަރުގެ މެއި މަހުގެ 14 ވަނަ ދުވަހުގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި ޖުމްލަ 16.8 ބިލިއަން ރުފިޔާ ލިބިފައިވާ ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން ހާމަކޮށްފި އެވެ.

ފިނޭންސް މިނިސްޓްރީން އެންމެ ފަހުން އާންމުކުރި "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން، މިއީ 2025 ވަނަ އަހަރުގެ އެ މުއްދަތުގައި ލިބުނު 14.9 ބިލިއަން ރުފިޔާއާ އަޅާބަލާއިރު 1.8 ބިލިއަން ރުފިޔާ ނުވަތަ 12.2 އިންސައްތައިގެ ކުރިއެރުމެކެވެ. ދައުލަތުގެ އާމްދަނީގެ އެންމެ ބޮޑު ބައެއް ހިއްސާކުރަނީ ޓެކުހުން ލިބޭ އާމްދަނީ އެވެ. އެގޮތުން ޓެކްސް އާމްދަނީގެ ގޮތުގައި 13.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ އެ މުއްދަތާ އަޅާބަލާއިރު 1.9 ބިލިއަން ރުފިޔާ ނުވަތަ 17.1 އިންސައްތަ އިތުރު އަދަދެކެވެ.

އާމްދަނީ އިތުރުވުމުގެ މައިގަނޑު އެއް ސަބަބެއްގެ ގޮތުގައި ރިޕޯޓުގައި ފާހަގަކޮށްފައިވަނީ ކޯޕަރޭޓް އިންކަމް ޓެކްސްގެ ގޮތުގައި ލިބުނު އާމްދަނީ އިތުރުވުމެވެ. މި މުއްދަތުގައި ކޯޕަރޭޓް އިންކަމް ޓެކްސްގެ ގޮތުގައި 2.7 ބިލިއަން ރުފިޔާ ލިބިފައިވާއިރު، މިއީ 2025 ވަނަ އަހަރާ އަޅާބަލާއިރު 31.3 އިންސައްތައިގެ ބޮޑު ކުރިއެރުމެކެވެ.

ދައުލަތުގެ ޖުމްލަ ހަރަދުތަކަށް ބަލާއިރު، ރިކަރަންޓް އަދި ކެޕިޓަލް ހަަރަދުގެ ގޮތުގައި 16.7 ބިލިއަން ރުފިޔާ ވަނީ ހޭދަވެފައެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 22.4 އިންސައްތައިގެ އިތުރުވުމެކެވެ. މީގެ ތެރެއިން ރިކަރަންޓް ހަރަދު 14.7 ބިލިއަން ރުފިޔާގައި ހުރިއިރު، ކެޕިޓަލް ހަރަދު ވަނީ 2.0 ބިލިއަން ރުފިޔާއަށް އަރާފަ އެވެ. އާމްދަނީއާއި ހަރަދުގެ ތަފާތަށް ބަލާއިރު، ދައުލަތުގެ ބަޖެޓުން 118.2 މިލިއަން ރުފިޔާގެ ސާޕްލަސްއެއް ވަނީ ރެކޯޑުކުރެވިފަ އެވެ.

ހަރަދުތައް އިތުރުވި ދާއިރާތަކުގެ ތެރޭގައި ސަބްސިޑީއަށް ކުރި ޚަރަދު ފާހަގަކޮށްލެވެއެވެ. ސަބްސިޑީއަށް 2.3 ބިލިއަން ރުފިޔާ ހޭދަވެފައިވާއިރު، މިއީ 77.8 އިންސައްތައިގެ ބޮޑު އިތުރުވުމެކެވެ. މި ބަދަލު އައީ މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު އުފުލުމުން، ކަރަންޓު އުފެއްދުމަށް ބޭނުންވާ ތެލުގެ ސަބްސިޑީއަށް ހިނގި ޚަރަދު ބޮޑުވުމުންނެވެ. ނަމަވެސް ސަރުކާރުގެ މި ސިޔާސަތުގެ ސަބަބުން އަސާސީ މުދަލާއި ހަދުމަތްތަކުގެ އަގު ވަނީ އެއްވަރެއްގައި ހިފެހެއްޓިފަ އެވެ.

މީގެ އިތުރުން، މުސާރައާއި އިނާޔަތްތަކަށް ކުރި ހަރަދު 5.3 ބިލިއަން ރުފިޔާއަށް ވަނީ އިތުރުވެފައެވެ. މިއީ ސަރުކާރުގެ މުސާރަތައް އެއްހަމަކުރުމަށް ކުރެވެމުންދާ މަސައްކަތުގެ ދަށުން އައި ބަދަލެކެވެ. ދަރަނި އަދާކުރުމާއި އިންޓަރެސްޓަށް ކުރާ ހަރަދުތައް 2.1 ބިލިއަން ރުފިޔާގައި ހިފެހެއްޓިފައިވާކަންވެސް ރިޕޯޓުން ހާމަވެ އެވެ.

ފިނޭންސް މިނިސްޓްރީގެ ރިޕޯޓުގައި ބަޔާންކޮށްފައިވާ ގޮތުގައި، ބައިނަލްއަގްވާމީ މާސާލާތަކާއި މުސާރައިގެ ސިޔާސަތުތަކުގެ ސަބަބުން ޚަރަދުތައް އިތުރުވި ނަމަވެސް، ޓެކްސް އާމްދަނީ އިތުރުވުމާއި ސަރުކާރުގެ ހަރުދަނާ މާލީ ސިޔާސަތުތަކުގެ ސަބަބުން ދައުލަތުގެ މާލީ ހާލަތު ވަނީ ވަރުގަދަކުރެވިފަ އެވެ.