މިއަހަރުގެ މަތިވެރި ހައްޖުގެ އަޅުކަމަށް ރާއްޖެއިންދާ ހައްޖުވެރިންގެ އެންމެ އިސްވެރިޔާ ނުވަތަ އަމީރުލް ހައްޖުގެ ގޮތުގައި އިކޮނޮމިކް މިނިސްޓަރު މުހައްމަދު ސައީދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވައިފި އެވެ.

ކޮންމެ އަހަރަކުވެސް ރާއްޖެއިން ހައްޖަށްދާ މީހުންގެ އެންމެހައި ކަންކަން ބެލެހެއްޓެވުމަށްޓަކައި އަމީރުލް ހައްޖެއް ރައީސުލްޖުމްހޫރިއްޔާ އައްޔަންކުރައްވަ އެވެ. އިސްލާމިކް މިނިސްޓްރީން ހާމަކުރެއްވި ގޮތުގައި، މި އަހަރުގެ އަމީރުލް ހައްޖުގެ މަސްއޫލިއްޔަތު އަދާކުރެއްވުމަށްޓަކައި މިނިސްޓަރު ސައީދު މިއަދު ހެނދުނު ވަނީ އެމިރޭޓްސްގެ މަތިންދާބޯޓެއްގައި ސައުދީ އަރަބިއްޔާއަށް ފުރާވަޑައިގެންފަ އެވެ.

މިދިޔަ 1445 ވަނަ އަހަރު ރާއްޖޭގެ އަމީރުލް ހައްޖުގެ ގޮތުގައި ވަޑައިގެންނެވީ އެޑިއުކޭޝަން މިނިސްޓަރު ޑރ. އިސްމާޢީލް ޝަފީއު އެވެ. އަދި މިއަހަރުގެ ޙައްޖުވެރިންގެ އިސް ޝައިޚެއްގެ ގޮތުގައި ވަޑައިގަންނަވަނީ އިސްލާމީ ފަތުވާދޭ އެންމެ މަތީ މަޖިލީހުގެ މެންބަރު ޑރ. އިލްޔާސް ހުސައިން އެވެ.

މިއަހަރުގެ ހައްޖުގެ އަޅުކަމަށް ރާއްޖެއިން ފުރި ހައްޖުވެރިންގެ އެންމެ ފަހު ގްރޫޕްވެސް މިއަދު ހެނދުނު ވަނީ ފުރާފަ އެވެ. މިއަހަރުވެސް ސައުދީ ސަރުކާރުން ރާއްޖެއަށް ދެއްވި 1000 ކޯޓާގައި، ޖުމްލަ 1000 ދިވެހިން ހައްޖުގެ އަޅުކަން އަދާކުރާނެ އެވެ. މި އެންމެހައި ޙައްޖުވެރިން މިހާރު ވަނީ ސައުދީ އަރަބިއްޔާއަށް ގޮސްފައެވެ. ޙައްޖުވެރިން އުފުލުމަށްޓަކައި މޯލްޑިވިއަންގެ ދެ ފްލައިޓަކާއި ސައުދިއާ އެއާލައިންގެ ދެ ފްލައިޓެއް ބޭނުންކޮށްފައިވެ އެވެ.

ސައުދީގައި ތިބި ދިވެހި ހައްޖުވެރިންގެ ކަންކަން އަމާންކަމާއެކު އިންތިޒާމުކުރުމަށްޓަކައި، ދިވެހި ހައްޖު މިޝަނާއި މޯލްޑިވްސް ހައްޖު ކޯޕަރޭޝަނުން މިހާރު އަންނަނީ މެދުނުކެނޑި މަސައްކަތް ކުރަމުންނެވެ.