ކުރީގެ ތިން ރައީސުން ކަމަށްވާ ރައީސް މުޙައްމަދު ނަޝީދާއި، ރައީސް ޢަބްދުﷲ ޔާމީން ޢަބްދުލްޤައްޔޫމް އަދި ރައީސް އިބްރާހިމް މުޙައްމަދު ޞާލިޙް ސިޔާސީ ގޮތުން އެއްގަލަކަށް އަރުއްވައި، އެކުގައި މަސައްކަތް ކުރެއްވުމަށް އެއްބަސްވުމެއްގައި ސޮއިކުރެއްވުމާ ގުޅިގެން ފިޝަރީޒް މިނިސްޓަރު އަޙްމަދު ޝިޔާމް ވަރުގަދަ ރައްދެއް ދެއްވައިފި އެވެ.
މިނިސްޓަރު ޝިޔާމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ "ދައްކަވަންހުރި ތަނެއް ދައްކަވާފައި ގެންދަވާނީ!" މިފަދައިންނެވެ. ބެލެވޭ ގޮތުގައި ޝިޔާމް މިފަދަ ޕޯސްޓެއް ކުރެއްވީ، މީގެ ކުރިން ސިޔާސީ ގޮތުން އެންމެ ވާދަވެރި އަދި އެކަކު އަނެކަކަށް ބޮޑެތި ތުހުމަތުތަކެއް ކުރެއްވި ތިން ރައީސުން ކުއްލި ގޮތަކަށް ގުޅިވަޑައިގަތުމާ ގުޅިގެންނެވެ.
ހާއްސަކޮށް ރައީސް ޔާމީނަކީ މީގެ ކުރިން ޕީޕީއެމް/ޕީއެންސީ ފިކުރުގައި ހުންނެވުމަށްފަހު، ސަރުކާރާ ހިޔާލުތަފާތުވެ "ޕީއެންއެފް" ގެ ނަމުގައި އަމިއްލަ ޕާޓީއެއް އުފައްދަވައިގެން ރައީސް ޑރ. މުހައްމަދު މުއިއްޒުގެ ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދަވާ ބޭފުޅެކެވެ. މީގެ ކުރިން އެތައް ފަހަރަކު އެމްޑީޕީއާއެކު ސިޔާސީ މަސައްކަތެއް ނުކުރައްވާނެ ކަމަށް ވިދާޅުވެފައި ވަނިކޮށް، ރޭގެ ވަގުތެއްގައި އެމްޑީޕީގެ އިސްލީޑަރުންނާއެކު އެއްބަސްވުމެއްގައި ސޮއިކުރެއްވުމުން، ޔާމީން ކުރިން ނިސްބަތްވެވަޑައިގެންނެވި ޕީޕީއެމް/ޕީއެންސީގެ ލީޑަރުންނާއި ސަޕޯޓަރުން ދަނީ ނުރުހުން ފާޅުކުރަމުންނެވެ.
މީގެ އިތުރުން، ރައީސް ޔާމީން މިހާރު އުފައްދަވައިގެން އުޅުއްވާ ޕީއެންއެފްގެ ބައެއް ސަޕޯޓަރުންވެސް، އެމަނިކުފާނު ނިންމެވި މި ނިންމެވުމާ މެދު ހިތްހަމަނުޖެހި، ފާޑުކިޔުންތައް އަމާޒުކުރަމުންދާކަން ފާހަގަކުރެވެ އެވެ.
މިނިސްޓަރު އަހްމަދު ޝިޔާމަކީ ޕީޕީއެމްގައި ރައީސް ޔާމީނާއެކު ވަރަށް އަރިހުގައި ސިޔާސީ މަސައްކަތް ކުރެއްވި ބޭފުޅެކެވެ. ހާއްސަކޮށް ރައީސް ޔާމީން ޖަލުގައި އޮންނެވި ދުވަސްވަރު، އެމަނިކުފާނު މިނިވަންކުރުމަށް ގޮވާލައި އެންމެ ބޮޑު މަސައްކަތެއް ކުރެއްވި އެއް ބޭފުޅަކީ ވެސް ޝިޔާމެވެ.
އެއްގަލަކަށް އެރި ތިން ރައީސުންނަކީ ވެސް އެ ބޭފުޅުންގެ ވެރިކަންތަކުގައި އެކަކު އަނެކަކު ޖަލަށްލައި، ސިޔާސީ ގޮތުން ބޮޑެތި އަނިޔާތަކެއް ކޮށްފައިވާ ބޭފުޅުންނެވެ. އަދި އެކަކު އަނެކަކަށް "ވަގަށް" ގޮވައި، ކޮރަޕްޝަނުގެ ބޮޑެތި ތުހުމަތުތައް އެކި ފަހަރު މަތިން ކުރައްވާފައިވާ ބޭފުޅުންނެވެ. އެހެންކަމުން، މި ތިން ރައީސުން އެއްބަސްވުމެއްގައި ސޮއިކުރެއްވުމަކީ ރާއްޖޭގެ ސިޔާސީ މަސްރަހަށް އައި ބޮޑު ލޮޅުމެއްގެ ގޮތުގައި ގިނަ ބަޔަކު ދެކެ އެވެ.
