ޒުލްހިއްޖާ މަހުގެ ފުރަތަމަ 10 ދުވަހަކީ މާތް ﷲގެ ހަޒުރަތުގައި އެންމެ ލޮބުވެތިކަން ބޮޑުވެގެންވާ، އަދި ހެޔޮ އަމަލުކުރުމަށް އެންމެ މާތް ދުވަސްތައް ކަމަށް މިއަދުގެ ހުކުރު ހުތުބާގައި ބަޔާންކޮށްފި އެވެ.
ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ހުތުބާ ހާއްސަކޮށްފައިވަނީ "ހައްޖު މަހުގެ ފުރަތަމަ ދިހަ ދުވަހުގެ މާތްކަން" މި މައުޟޫއަށެވެ. ހުތުބާގައި ބަޔާންކޮށްފައިވާ ގޮތުގައި، ދުނިޔެއަށް އަންނަ އެންމެ މާތް ދުވަސްތަކަކީ ހައްޖު މަހުގެ ފުރަތަމަ ދިހަ ދުވަހެވެ. މި ދުވަސްތަކުގެ މަތިވެރިކަން ބަޔާންކުރައްވައި މާތް ﷲ ކީރިތި ގުރުއާނުގައި ގަންދެއްވައި ހުވާ ކުރައްވާފައިވާކަން ހުތުބާގައި ފާހަގަކުރި އެވެ.
ހުތުބާގައި ރަސޫލާ ﷺ ގެ ހަދީޘްފުޅުތަކާ ހަވާލާދީ ބުނެފައިވަނީ، މި ދިހަ ދުވަހަށްވުރެ ﷲގެ ހަޟުރަތުގައި ސާލިހު އަމަލުކުރުމަށް ލޮބުވެތިކަން ބޮޑުވެގެންވާ އެހެން އެއްވެސް ދުވަސްތަކެއް ނުވާ ކަމަށެވެ. އަދި މި ދުވަސްތަކުގައި ކުރާ ހެޔޮ އަމަލުގެ ދަރުމަ، ﷲގެ މަގުގައި ޖިހާދުކުރާ މީހާގެ ދަރުމައަށްވުރެ ވެސް އިތުރުވެގެންވާ ކަމަށް ހުތުބާގައި ބުންޏެވެ.
މި ދުވަސްތަކަކީ އެންމެ ހެޔޮ ދުވަސްތަކަށް ވުމުގެ ސަބަބެއް ކަމުގައި އިލްމުވެރިން ބަޔާންކުރައްވަނީ، އިސްލާމްދީނުގެ އެންމެ މަތިވެރި އަޅުކަންތައް ކަމުގައިވާ ނަމާދާއި، ރޯދައާއި، ސަދަގާތާއި، ހައްޖުގެ އަޅުކަން މި ދުވަސްތަކުގައި ޖަމާވާތީ އެވެ.
މި ދުވަސްތަކުގައި ކުރުމަށް ހުތުބާގައި އިރުޝާދު ދީފައިވާ ކަންކަން:
- ތައުބާވުން: ތެދުވެރި އިހުލާސްތެރި ތައުބާއަކުން ތައުބާވެ މި ދުވަސްތައް ފެށުން.
- ރޯދަހިފުން: ހާއްސަކޮށް އަރަފާތް ދުވަހު (ހައްޖު މަހުގެ 9 ވަނަ ދުވަހު) ރޯދަހިފުން. އެ ދުވަހުގެ ރޯދައަކީ އިސްވެދިޔަ އަހަރާއި ކުރިއަށް އޮތް އަހަރުގެ ފާފަ ފުއްސަވާނޭ ކަމެކެވެ.
- ޒިކުރުކުރުން: ގިނަގިނައިން ތަކުބީރާއި، ތަސްބީހައާއި، ތަހުލީލު ކިޔައި ﷲ ހަނދުމަކުރުން. މަގުތަކާއި ބާޒާރުމަތީގައި ވެސް އަޑުހަރުކޮށް ތަކުބީރު ކިޔުމަކީ ސުންނަތެކެވެ.
- ސަދަގާތްކުރުން: މާތް ﷲގެ މަގުގައި ގިނަގިނައިން ހޭދަކުރުން.
- އުޟުހިޔާ ކަތިލުން: ޢީދު ނަމާދަށްފަހު އުޟުހިޔާ ކަތިލުމަކީ ގަދަވެގެންވާ ސުންނަތެކެވެ.
- ހައްޖުގެ އަޅުކަން: ކުޅަދާނަކަން ލިބިގެންވާ މީހާ ހައްޖުގެ މަތިވެރި އަޅުކަން އަދާކުރުން.
ހުތުބާ ނިންމާލަމުން ވަނީ، މި މަތިވެރި ދުވަސްތަކުގައި ފާފަތަކާއި ނުބައި އަމަލުތަކުން ދުރުހެލިވުމަށް ގޮވާލާފައެވެ. ނެތިމޮށުމާއި، ދެބައޮޑުވުމާއި، ފިތުނަ އުފެއްދުން ފަދަ އަމަލުތަކުން ދުރުހެލިވެ، ﷲ ލޯބިވެވޮޑިގަންނަވާ ކަންކަމުގައި ދެމިތިބުމަށް ހުރިހާ މުސްލިމުންނަށް ހުތުބާގައި ވަނީ ނަސޭހަތްތެރިވެފަ އެވެ.
