ސަރުކާރު ހިންގާ މައި ޕާޓީ، ޕީއެންސީގެ ލީޑަރިޝަން އޮތީ ވަކިނުކުރެވޭނެ ފަދަ ވަރުގަދަ ބަދަހިކަމެއްގައި ކަމަށާއި، އެންމެންގެވެސް އަމާޒަކީ 2028 ވަނަ އަހަރުގެ ރިޔާސީ އިންތިޚާބު ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ކާމިޔާބު ކޮށްދިނުން ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

އަބްދުއްރަހީމް މިހެން ވިދާޅުވީ، ޕީއެންސީގެ ހަރުގެ ޖަލްސާގައި މިރޭ ވާހަކަދައްކަވަމުންނެވެ. އޭނާ ވިދާޅުވީ މި ސަރުކާރު އޮތީ ހައްގުގެ މަގުގައި ކަމަށާއި، އިދިކޮޅުގައި ތިއްބަވައިގެން ވެސް އަދި އެއްކޮޅުގައި ތިއްބަވައިގެން ވެސް މިއަދު ދައްކަވަނީ ހައްގުގެ ވާހަކަ ކަމަށެވެ.

ކުރީގެ ތިން ރައީސުން ގުޅިވަޑައިގެން ސަރުކާރާ ދެކޮޅަށް މަސައްކަތް ކުރެއްވުމަށް ނިންމެވި ނިންމެވުމަށް އިޝާރާތް ކުރައްވައި އަބްދުއްރަހީމް ވިދާޅުވީ، އެ ތިން ރައީސުން އެކީގައި މަސައްކަތް ކުރެއްވި ނަމަވެސް، އެ ބޭފުޅުން އެކަކު އަނެކަކަށް އިތުބާރު ނުކުރައްވާނެ ކަމަށެވެ. އަދި އެ ތިން ވެރިކަމުގައި ވެސް ހިނގާފައިވާ އަނިޔާވެރިކަމުގެ ވާހަކަތައް އޭނާ ހަނދާންކޮށްދެއްވިއެވެ.

"އިންސާނަކަށް ޖެހޭނެ އެންމެ ހިތާމަވެރި ބައްޔަކީ ހަނދާން ނެތޭ ބަލި،" ކުރީގެ ރައީސުންނަށް ފާޑުވިދާޅުވަމުން އަބްދުއްރަހީމް ވިދާޅުވިއެވެ. އޭނާ އިތުރަށް ވިދާޅުވީ ރާއްޖޭގެ ކަނޑުގެ ސަރަހައްދު ވިއްކާލި ކަމަށް ބުނެ ކުރިން ތުހުމަތު ކުރެއްވި ބަޔަކާ އެކު، މިއަދު ރައީސް ޔާމީން ނިކުންނެވުމަކީ ހައިރާންވާންޖެހޭ ކަމެއް ކަމަށެވެ. އެހެންނަމަވެސް، އެ ބޭފުޅުން އެކީގައި މަސައްކަތް ކުރައްވަން ނިކުންނަވާތީ އެކަމަށް މަރުހަބާ ވިދާޅުވާ ކަމަށްވެސް އޭނާ ވިދާޅުވިއެވެ.

ޕީއެންސީގެ އެތެރޭގެ މަސްލަހަތާ ގުޅޭގޮތުން ވާހަކަދައްކަވަމުން މަޖިލިސް ރައީސް ވިދާޅުވީ، ޕާޓީގެ ތެރޭގައި ރިޔާސީ ޓިކެޓު ހޯއްދެވުމުގެ އެއްވެސް ޝައުގުވެރިކަމެއް ނުވަތަ އަޒުމެއް އެއްވެސް ބޭފުޅެއްގެ ކިބައިގައި ނެތް ކަމަށެވެ. އަދި ސަރުކާރުގެ ހުރިހާ ބޭފުޅުންވެސް ތިއްބެވީ 2028 ވަނަ އަހަރު ރައީސް މުއިއްޒަށް ދެވަނަ ދައުރެއް ކާމިޔާބު ކޮށްދެއްވުމުގެ ސާބިތު އަޒުމުގައި ކަމަށް އޭނާ ވިދާޅުވިއެވެ.