ކުރީގެ ތިން ރައީސުން ކަމަށްވާ މުހައްމަދު ނަޝީދާއި، އަބްދުﷲ ޔާމީނާއި، އިބްރާހިމް މުހައްމަދު ސާލިހު އެއްގަލަކަށް އަރުއްވައިގެން އުޅުއްވަނީ 2028 ވަނަ އަހަރުގެ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒާ ވާދަކުރާނެ ކެންޑިޑޭޓަކު ހޯދުމުގެ ބޭނުމުގައި ކަމަށް ސަރުކާރުގެ ޗީފް ސްޕޯކްސްޕާސަން މުހައްމަދު ޝަރީފް (މުންދު) ވިދާޅުވެއްޖެ އެވެ.
ސަރުކާރުން ކޮންމެ ހަފްތާއެއްގެ ބުރާސްފަތި ދުވަހު ބާއްވާ "ޕްރެސާ ވިތު ސްޕޮކްސް" ގައި ޚުލާސާގެ ނޫސްވެރިއަކު ކުރި ސުވާލަކަށް ޖަވާބު ދެއްވަމުން މުންދު ވިދާޅުވީ، މި ތިން ރައީސުންގެ ވެރިކަމުގައި ހިނގާދިޔަ ކަންތައްތައް ހުރިހާ ދިވެހި ރައްޔިތުންވެސް ހަނދުމަފުޅު ހުންނާނެ ކަމަށެވެ. އެގޮތުން ރައީސް ސާލިހުގެ ވެރިކަމުގެ ރަނގަޅާއި ނުބައި މިނެކިރާލަން ކޮންމެ ޒުވާނަކަށްވެސް އެނގޭނެ ކަމަށާއި، ރައީސް ނަޝީދުގެ ވެރިކަމުގެ ހަނދާންތައް ބައެއް ޒުވާނުންގެ ކިބައިން ފަނޑުވެފައި ހުރެދާނެ ކަމަށް އޭނާ ފާހަގަކުރެއްވި އެވެ. އަދި ރައީސް ޔާމީންގެ ސަރުކާރުގައި މުންދު އަމިއްލަފުޅަށް އެކި ދާއިރާތަކުން ހިދުމަތް ކުރައްވާފައިވާކަންވެސް ފާހަގަކުރެއްވި އެވެ.
މުންދު ވިދާޅުވި ގޮތުގައި، މި ތިން ރައީސުންނާއި ވޭތުވެދިޔަ ދެ އަހަރު ދުވަހު ވީނުވީއެއް ނޭނގި ތިއްބެވި ސިޔާސީ ބައެއް ބޭފުޅުން މިހާރު "ހޮރުހޮރުން" ނުކުމެ ބަސް ވިދާޅުވާން ފަށާފައިވަނީ 2028 ގައި ރައީސް މުއިއްޒު ދެވަނަ ދައުރަކަށް ކުރިމަތިލައްވާއިރު، އެމަނިކުފާނާ ވާދަކުރާނެ މީހަކު ހޯދުމުގެ ނިޔަތުގަ އެވެ. މި މަންޒަރު އެމްޑީޕީގެ ތެރެއިންވެސް ފެންނަމުންދާ ކަމަށާއި، އެ ޕާޓީގެ ޗެއާޕާސަންގެ އިންތިހާބަށްފަހު ވަކި ހިސާބަކުން ކޮންމެސް ބޭފުޅަކަށް ރިޔާސީ ޓިކެޓު އަރުވާނެ ކަމަށްވެސް އޭނާ ވިދާޅުވި އެވެ.
Advertisement
"މި ސަރުކާރާ ވާދައަށް އުޅޭ މީހަކު މި ސަރުކާރަށް ފާޑުނުކިޔާނަމަ، އެ ކުޅެވެނީ އެބޭފުޅުންގެ އޯޑިއަންސަކާ ނޫންކަން ސިޔާސީ ކަންކަން މާބޮޑަށް ނޭނގޭ މީހަކަށްވެސް އެނގޭނެ،" މުންދު ވިދާޅުވި އެވެ.
ކުރީގެ ތިން ރައީސުންނަށް ފާޑުވިދާޅުވަމުން މުންދު ވަނީ އެ ބޭފުޅުންނަކީ މީގެ ކުރިން ކިހާ ގާތްކޮށް އުޅުއްވި ބޭފުޅުންތޯ ސުވާލު އުފައްދަވާފަ އެވެ. އޭނާ ވިދާޅުވީ އެއީ އެކަކު އަނެކަކަށް އެންމެ ބޮޑަށް ވާދަކޮށް، އެކަކު އަނެކަކު ހައްޔަރުކޮށް، ސިޔާސީ ގޮތުން އެންމެ ބޮޑު ހަތުރުންގެ ގޮތުގައި ތިއްބެވި ބޭފުޅުން ކަމަށެވެ. ނަމަވެސް މިއަދު އެ ބޭފުޅުން އެއްގަލަކަށް އަރައިގެން އުޅުއްވަނީ ހަމައެކަނި ސިޔާސީ ބޭނުމެއްގައި ކަމަށް މުންދު ތުހުމަތު ކުރެއްވި އެވެ.
