ރާއްޖެއިން ނައްތާލާފައިވާ ބައްޔެއްގެ ގޮތުގައި ކަނޑައަޅާފައިވާ ހިމަބިހި (މީސްލްސް) ޖެހިފައިވާ ދެ މީހަކު މާލެ ސަރަހައްދުން ފެނިއްޖެ އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކުރި ގޮތުގައި، ހިމަބިހީގެ މި ދެ ކޭސް ފެނިފައިވަނީ މި ހިނގާ ހަފްތާގެ ތެރޭގަ އެވެ. މިކަމާ ގުޅިގެން ބަލި ފެތުރުން ކޮންޓްރޯލް ކުރުމަށާއި، ބަލި ޖެހުނު ގޮތް ދެނެގަތުމަށްޓަކައި ކުރަންޖެހޭ މަސައްކަތްތައް އެ އެޖެންސީން މިހާރު ވަނީ ފަށާފަ އެވެ.
އެޗްޕީއޭއިން ބުނީ، އާންމުކޮށްވެސް އަމަލުކުރާ އުސޫލުގެ ދަށުން ކޭސްގެ އިންވެސްޓިގޭޝަން ހެދުމާއި، ކޮންޓެކްޓް ޓްރޭސިންގްގެ މަސައްކަތް މިހާރު ކުރިއަށްދާ ކަމަށެވެ. މީގެ އިތުރުން، ބައްޔަށް ޕޮޒިޓިވްވި މީހުންނާ ދިމާވި މީހުން ނުވަތަ "ކޮންޓެކްޓުން" ދެނެގަނެ، އެމީހުންނަށް ވެކްސިން ދިނުމުގެ މަސައްކަތްވެސް ކުރަމުންދާ ކަމަށް އެޗްޕީއޭއިން ބުންޏެވެ.
މިއަހަރުގެ މިހާތަނަށް ރާއްޖެއިން ހިމަބިހީގެ ޖުމްލަ 5 ކޭސް ފެނިފައިވާކަން ފާހަގަކޮށް، އެޗްޕީއޭއިން ބުނީ އޭގެ ތެރެއިން ދެ މީހުންނަކީ ރާއްޖެއިން ބޭރުން އައި މީހުން ކަމަށެވެ. ދުނިޔޭގެ އެކި ސަރަހައްދުތަކުގައި މި ދުވަސްވަރު ހިމަބިހި ފެތުރުން އިތުރުވަމުންދާތީ، ހުން އައިސް ހަށިގަނޑުގައި ރަތް ބިހިތަކެއް ނަގާނަމަ ލަސްނުކޮށް ސިއްހީ ފަރުވާ ހޯދުމަށް އެ އިދާރާއިން ވަނީ އިލްތިމާސްކޮށްފަ އެވެ.
ރާއްޖޭގައި ހިމަބިހިން ރައްކާތެރިވުމަށް 1983 ވަނަ އަހަރުން ފެށިގެން ގައުމީ ވެކްސިން ތާވަލުގައި ހިމަނައިގެން ވެކްސިން ދޭން ފަށާފައިވެ އެވެ. މި މަސައްކަތުގެ ނަތީޖާއެއްގެ ގޮތުން، 2017 ވަނަ އަހަރު ރާއްޖެއަކީ ހިމަބިހި ނައްތާލެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ވަނީ ކަނޑައަޅާފަ އެވެ. އެހެންނަމަވެސް، 2020 ވަނަ އަހަރުވެސް ރާއްޖެއިން ހިމަބިހީގެ ކޭސްތަކެއް ފެނުމާ ގުޅިގެން މުޅި ރާއްޖެއަށް ހުޅުވާލައިގެން އެމްއާރް ވެކްސިން ކެމްޕޭނެއް ކުރިއަށް ގެންގޮސްފައިވެ އެވެ.
