ރާއްޖޭގައި މިދިޔަ އޭޕްރީލް މަހު ޑެންގީ ހުމާއި އަރިދަފުސް ރޯގާ ޖެހިގެން ރިޕޯޓުކުރި މީހުންގެ އަދަދު ވަރަށް ބޮޑަށް އިތުރުވެ، ޖުމްލަ 24،000 އަށްވުރެ މައްޗަށް އަރާފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފި އެވެ.
އެޗްޕީއޭ އިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މަދިރީގެ ޒަރީއާއިން ފެތުރޭ ޑެންގީ ހުން ޖެހިގެން ރިޕޯޓުކުރި މިންވަރު ވަނީ މާރިޗު މަހާ އަޅާބަލާއިރު އޭޕްރީލް މަހު އިތުރުވެފަ އެވެ. އެގޮތުން މާރިޗު މަހު 601 ކޭސް ރިޕޯޓުކޮށްފައިވާއިރު، އޭޕްރީލް މަހު އެ އަދަދު ވަނީ 643 އަށް މަތިވެފަ އެވެ. މިކަމާ ގުޅިގެން މަދިރި އާލާވާ ތަންތަން ނައްތާލުމަށާއި، ބަލިން ރައްކާތެރިވުމުގެ ފިޔަވަޅުތައް އެޅުމަކީ މުހިންމު ކަމެއް ކަމަށް އެ އެޗްޕީއޭއިން ފާހަގަކުރި އެވެ.
އަރިދަފުސް ރޯގާގެ ހާލަތަށް ބަލާއިރު، ބަލި ޖެހުނު މީހުންގެ އަދަދު ވަނީ ވަރަށް ބޮޑަށް އުފުލިފަ އެވެ. މާރިޗު މަހު 20,761 މީހުންނަށް ރޯގާ ޖެހިގެން ރިޕޯޓުކުރިއިރު، އޭޕްރީލް މަހު އެ އަދަދު ވަނީ 24,221 އަށް އަރާފަ އެވެ. މީގެ އިތުރުން އިންފްލުއެންޒާ ޖެހޭ މިންވަރުވެސް ވަނީ އިތުރުވެފަ އެވެ. މާރިޗު މަހު އިންފްލުއެންޒާއަށް ފައްސިވެފައިވަނީ އެންމެ 5 މީހުން ނަމަވެސް، އޭޕްރީލް މަހު އެ އަދަދު ވަނީ 62 އަށް އުފުލިފަ އެވެ.
އެޗްޕީއޭގެ ތަފާސްހިސާބުތަކުގައިވާ ގޮތުން، ބޭރަށް ހިނގުމުގެ ބަލި ޖެހިގެންވެސް މިދިޔަ މަހު ގިނަ އަދަދެއްގެ މީހުން ވަނީ ރިޕޯޓުކޮށްފަ އެވެ. އެގޮތުން ޖުމްލަ 3,993 މީހަކު މި ބަލީގައި ފަރުވާ ހޯދާފައިވެ އެވެ.
މި ދުވަސްވަރަކީ ވިއްސާރަ ދުވަސްވަރަކަށްވެފައި، މަދިރީގެ ޒަރިއްޔާއިން ފެތުރޭ ބަލިތަކާއި ނޭވާލާ ނިޒާމުގެ ބަލިތައް އިތުރުވަމުންދާތީ، އާންމު ސާފުތާހިރުކަމަށް ސަމާލުވުމަށާއި ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭ އިން ވަނީ އާމުންނަށް އިލްތިމާސްކޮށްފަ އެވެ. ވަކިން ހާއްސަކޮށް ކޮވިޑް-19 އާއި އިންފްލުއެންޒާ ފަދަ ބަލިތަކުން ރައްކާތެރިވުމަށް މާސްކު އެޅުމާއި ގިނަގިނައިން އަތްދޮވުން ފަދަ އާދަތައް އަށަގެންނެވުމަށް އެ އިދާރާއިން ވަނީ އިރުޝާދުދީފަ އެވެ.
