އޮންލައިން ނޫސް "އަދަދު" ގެ ހުސައިން ފިޔާޒް އަދި ހަސަން މުހައްމަދުގެ މައްޗަށް ދައުލަތުން އުފުލާފައިވާ ގަޒުފުގެ ދައުވާއާ ގުޅިގެން، އެ މައްސަލައިގައި ހިމެނޭ ޑޮކިއުމަންޓްރީއާ ގުޅޭ އެއްވެސް ވާހަކައެއް ދެއްކުމާއި، އެ ވީޑިއޯ ފެތުރުން މަނާކޮށް ކޯޓުން ވަރުގަދަ އަމުރެއް ނެރެފި އެވެ.
ކޯޓުން މި އަމުރު ނެރެފައިވަނީ މި މައްސަލައިގެ ޝަރީޢަތް ނިމި، ވަކި ގޮތެއް ކަނޑައަޅަންދެން މުޖުތަމަޢުގެ އަހްލާގީ މިންގަނޑުތައް ހިފެހެއްޓުމަށާއި، ޝަރީއަތަށް ނުފޫޒު ފޯރުވިޔަ ނުދިނުމަށެވެ.
ކޯޓު އަމުރުގައި ހިމެނޭ މުހިންމު ނުކުތާތައް:
- ވީޑިއޯ ދައުރުކުރުމާއި ވާހަކަދެއްކުން މަނާކުރުން: މި މައްސަލާގައި ދައުވާ ކުރެވިފައިވާ ހާދިސާއާ ގުޅުންހުރި ވީޑިއޯ ޑޮކިއުމަންޓްރީ މުޖުތަމައުގެ ތެރޭގައި އެއްވެސް ސިފައެއްގައި ދައުރުކުރުން ވަނީ މަނާކޮށްފަ އެވެ. އަދި އެ ޑޮކިއުމަންޓްރީގައި ގެނެސްދީފައިވާ އެއްވެސް ވާހަކައެއް، ސީދާ ގޮތުން ނުވަތަ ނުސީދާ ގޮތުން ވިޔަސް، އެއްވެސް ފަރާތަކުން ދެއްކުން ކޯޓުން ވަނީ މަނާކޮށްފަ އެވެ. މީގެ އިތުރުން، ޝަރީއަތަށް ހުށަހެޅިފައިވާ މި ޑޮކިއުމަންޓްރީއާ ގުޅުވައިގެން މައްސަލައިގެ ހަސްމަކާ ނުވަތަ ކުށުގެ ޝިކާރައަށްވީ މީހާގެ އެއްވެސް ވާހަކައެއް ދެއްކުމަކީވެސް މަނާކަމެއްގެ ގޮތުގައި ވަނީ ކަނޑައަޅާފަ އެވެ.
- ޝަރީޢަތް ސިއްރުކުރުމާއި މައުލޫމާތު ހިފެހެއްޓުން: މި މައްސަލައަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 42 ވަނަ މާއްދާގެ (ނ) ގެ 1 ވަނަ ނަންބަރުގައި ބަޔާންކުރާ ފަދަ، މުޖުތަމައުގެ އަހްލާގީ އުސޫލުތައް ހިފެހެއްޓުމަށްޓަކައި އާންމުކޮށް ހުޅުވާނުލައި ކުރިއަށް ގެންދަންޖެހޭ މައްސަލައެއް ކަމަށް ކޯޓުން ބުނެފައިވެ އެވެ. އެހެންކަމުން، މައްސަލައާ ގުޅިގެން ހުށަހެޅިފައިވާ ލިޔުންތަކާއި ޝަރީއަތުގެ އެއްވެސް މައުލޫމާތެއް ބޭރުގެ ފަރާތްތަކަށް ފެތުރުން ވަނީ މަނާކޮށްފަ އެވެ.
- ކޯޓުގެ ހުރުމަތް ހިފެހެއްޓުން: ކޯޓުން ނެރުނު މި އަމުރުގައި ވަނީ، މަތީގައި ބަޔާންކޮށްފައިވާ ކަންކަމާ ހިލާފަށް ކުރެވޭ ކޮންމެ އަމަލަކީ ކޯޓުގެ ހުރުމަތް ކެނޑުމުގެ އަމަލެއްގެ ގޮތުގައި ބެލެވޭނެ ކަމަށެވެ. އަދި އެފަދަ ފަރާތްތަކާމެދު ގާނޫނީ ގޮތުން ފިޔަވަޅު އެޅޭނެ ކަމުގެ އިންޒާރުވެސް ވަނީ ދީފަ އެވެ.
މި މައްސަލައަކީ ނޫސްވެރިކަމުގެ މިނިވަންކަމާއި، މީހުންގެ އަބުރާއި، އިސްލާމީ އަހްލާގީ މިންގަނޑުތަކާ ގުޅުންހުރި މައްސަލައަކަށް ވާތީ، މައްސަލައިގެ ހުރިހާ މަރުހަލާއެއްގައިވެސް އަދުލުވެރިކަން ދެމެހެއްޓުމަށް ކޯޓުން އިސްކަންދޭނެ ކަމެކެވެ. މި ވަގުތީ އަމުރަކީ ޝަރީއަތުން މައްސަލައިގައި ވަކި ގޮތެއް ނިންމަންދެން ދެމިއޮންނާނެ އަމުރެކެވެ.
