ނުކުޅެދުންތެރިކަން ހުންނަ ފަރާތްތަކުގެ ކެޓަގަރީގެ ދަށުން، އެފަދަ ފަރާތްތަކުގެ ބަދަލުގައި އެ ފަރާތްތަކުގެ ބެލެނިވެރިންނަށް ފުލެޓަށް އެދި ހުށަހެޅުމުގެ ފުރުސަތު މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓުން މިއަދު ހުޅުވާލައިފި އެވެ.
މިނިސްޓްރީން އާންމުކޮށްފައިވާ އުސޫލުގައިވާ ގޮތުން، އަމިއްލައަށް ފޯމު ފުރުމަށް ދަތިވާ ފަރާތްތަކާއި، 18 އަހަރު ފުރިފައިނުވާ ކުދިންގެ ބަދަލުގައި، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގައި ރަޖިސްޓްރީވެފައިވާ އެ ފަރާތްތަކުގެ ބެލެނިވެރިންނަށް ދެން ފުލެޓަށް އެދި ހުށަހެޅޭނެ އެވެ. މިއީ ނުކުޅެދުންތެރިކަން ހުންނަ ފަރާތްތަކަށް ބޯހިޔާވަހިކަމުގެ ފުރުސަތުތައް ފަހިކޮށްދިނުމަށް ސަރުކާރުން ނިންމި މުހިންމު ނިންމުމެކެވެ.
މި މަޝްރޫއުގެ ދަށުން ފޯމު ހުށަހެޅުމުގެ ފުރުސަތު ހުޅުވާލާނީ 20 މެއި ވާ ބުދަ ދުވަހުގެ ހެނދުނު 11:00 އިން ފެށިގެންނެވެ. އަދި މި ފުރުސަތު 15 ޖޫން 2026 ވާ ހޯމަ ދުވަހުގެ ރޭގަނޑު 23:59 އާ ހަމައަށް އޮންނާނެ ކަމަށް މިނިސްޓްރީން މައުލޫމާތު ދެ އެވެ.
މި ސަރުކާރުން ކުރިއަށްގެންދާ "އެންމެނަށް ބޯހިޔާވަހިކަން" މަޝްރޫއުގެ ދަށުން، މާލެ ސަރަހައްދުން 7،900 ފުލެޓަށް އެދި ހުށަހެޅުމުގެ ފުރުސަތު ވަނީ ހުޅުވާލާފަ އެވެ. މީގެ އިތުރުން، ބޯހިޔާވަހިކަމުގެ ބޮޑު މަޝްރޫއެއްގެ ގޮތުގައި ރަސްމާލެއިން 15،000 ގޯއްޗަށް އެދި ހުށަހެޅުމުގެ ފުރުސަތު ވެސް ސަރުކާރުން ވަނީ އާންމުންނަށް ހުޅުވާލާފަ އެވެ.
މިއީ ދިވެހި އާއިލާތަކަށާއި، ހާއްސަކޮށް އަޅާލުން ބޭނުންވާ ފަރާތްތަކަށް އިންސާފުވެރިކަމާއެކު ބޯހިޔާވަހިކަން ކަށަވަރުކޮށްދިނުމަށް ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ.
