ދިރިއުޅުމުގެ ހުރިހައި މައިދާނެއްގައި ކުރާ ޚަރަދުތަކަކީ ޙަލާލު ގޮތުގައި ހޯދާފައިވާ މުދަލާއި ފައިސާއިން ކުރާ ޚަރަދުތަކެއް ކަމުގައި ވާންޖެހޭނެ ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
މިއަދު ރާއްޖޭގެ މިސްކިތްތަކުގައި އިއްވި ޚުޠުބާ ޚާއްޞަކޮށްފައިވަނީ "ހެއު ގޮތުގައި ވެވޭ ޙައްޖު" މި މައުޟޫޢުގެ މައްޗަށެވެ.
ޚުޠުބާގައި ބަޔާންކޮށްފައިވާ ގޮތުގައި، ޙައްޖު ވާޖިބުވުމަށްފަހު އެކަމަށް ކެރިކުޅަދާނަވެއްޖެ މީހާ، އެ އަޅުކަން އަދާކުރުމަށް އަވަސްވެގަންނަންޖެހެއެވެ. އެއީ މާދަމާ ކަންތައް ދިމާވާނެ ގޮތެއް އެކަކަށްވެސް ނޭނގޭނެތީއެވެ. ޙައްޖުވުމުގެ ކުޅަދާނަކަން ލިބިގެންވަނީ ޞިއްޙީ ގޮތުންނާއި، މާލީ ގޮތުން ތަނަވަސްކަން ހުރުމުގެ އިތުރުން މަގު އަމާންވެގެންވުމެވެ.
މިއަދުގެ ޚުޠުބާގައި އެންމެ ބޮޑު އިސްކަމެއް ދީފައިވަނީ ޙައްޖުގެ އަޅުކަމަށް ކުރާ ޚަރަދާއި، ޢާންމު ދިރިއުޅުމުގެ ޚަރަދުތައް ޙަލާލު ތަކެއްޗަށް ހެދުމުގެ މުހިންމުކަމުގެ މައްޗަށެވެ. "ހަމަކަށަވަރުން މާތް ﷲއީ ހުރިހައި ޢައިބަކުން ހުސްދުރުވެވޮޑިގެންވާ ހުސްޠާހިރުވަންތަ ރަސްކަލާނގެއެވެ. ޠާހިރު އަދި ޙަލާލު ތަކެއްޗާއި ކަންތައް މެނުވީ އެކަލާނގެ ޤަބޫލެއް ނުކުރައްވައެވެ،" ރަސޫލާގެ ޙަދީޘްފުޅެއްގެ މާނަ ބަޔާންކުރައްވަމުން ޚުޠުބާގައި ވިދާޅުވިއެވެ.
ޙައްޖަށް ދިޔުމުގެ ކުރިން އިޚްލާޞްތެރި ތައުބާއަކުން ތައުބާވުމަށާއި، ދަރަނިތަކާއި ލިބެންހުރި ތަކެތި ލިޔެ ބެލެހެއްޓުމަށްވެސް ޚުޠުބާގައި ނަޞޭޙަތްތެރިވެފައިވެއެވެ. އަދި ހެއު ގޮތުގައި ވެވޭ ޙައްޖަކީ (ޙައްޖު މަބްރޫރު) އެކަމުގެ ޖަޒާއަކަށް ސުވަރުގެ ނޫން އެހެން ކަމެއް ނެތް މަތިވެރި އަޅުކަމެއްކަން ފާހަގަކުރެއްވިއެވެ.
ހެއު ގޮތުގައި ޙައްޖު ވެވުނުކަމުގެ ޢަލާމާތަކީ، ޙައްޖުން އެނބުރި އައުމަށްފަހު މީހާގެ ދިރިއުޅުން ހެއު މަގަށް ބަދަލުވެ، މާތް ﷲ މަނާކުރެއްވި ކަންތައްތަކުން ދުރުހެލިވެ، އަމުރުފުޅުތަކަށް ކިޔަމަންތެރިވުން ކަމުގައި ޚުޠުބާގައި ބަޔާންކުރިއެވެ.
ޙައްޖުގެ އަޅުކަމަކީ ޝައްވާލު، ޛުލްޤަޢިދާ އަދި ޛުލްޙިއްޖާ މަހުގެ ފުރަތަމަ ދިހަ ދުވަހުގެ ތެރޭގައި އަދާކުރެވޭ އަޅުކަމެކެވެ. ޚާއްޞަކޮށް ޢަރަފާތް ދުވަހު ޢަރަފާތް ބިމުގައި ހުރުމަކީ ޙައްޖުގެ އެންމެ ބޮޑު ރުކުން ކަމަށާއި، އެ ރުކުން ފުރިހަމަ ނުކޮށްފި މީހަކަށް އެ އަހަރުގެ ޙައްޖު ނުލިބޭނެކަންވެސް މިއަދުގެ ޚުޠުބާގައި ހަނދާންކޮށްދީފައިވެއެވެ.
