ޗޭޑްގެ ލޭކް ޗޭޑް ސަރަހައްދުގައި ހުންނަ އަސްކަރީ މަރުކަޒަކަށް ހަތިޔާރު އެޅި ބޯކޯ ހަރާމް ޖަމާއަތުން ދިން ވަރުގަދަ ހަމަލާއެއްގައި އެ ގައުމުގެ މަދުވެގެން 23 ސިފައިން މަރުވެއްޖެއެވެ.
އެ ގައުމުގެ އަސްކަރިއްޔާއިން ނެރުނު ބަޔާނެއްގައި ބުނެފައިވާ ގޮތުގައި، މި ހަމަލާގައި އިތުރު 26 ސިފައިން ވަނީ ޒަޚަމްވެފައެވެ. މި ހަމަލާ ދީފައިވަނީ ހޯމަ ދުވަހު ލޭކް ޗޭޑް ސަރަހައްދުގައި އޮންނަ ބަރްކާ ޓޮލޮރޮމް ކިޔާ ރަށެއްގައި ހުންނަ އަސްކަރީ މަރުކަޒަކަށެވެ. އަސްކަރިއްޔާއިން ބުނީ ހަމަލާދިން މީހުންނަށް ރައްދު ހަމަލާދީ، އޭގެ ތެރެއިން "ގިނަ އަދަދެއްގެ" ބަޔަކު މަރާލާފައިވާ ކަމަށެވެ.
ޗޭޑްގެ ރައީސް މަހާމަތު އިދްރީސް ޑެބީ އިޓްނޯ ފޭސްބުކް މެދުވެރިކުރައްވައި ވިދާޅުވީ، ބޯކޯ ހަރާމްއިން ދީފައިވަނީ ވަރަށް ފިނޑި ހަމަލާއެއް ކަމަށެވެ. އަދި މި ނުރައްކާ އެއްކޮށް ނައްތާލެވެންދެން އާ އަޒުމަކާއެކު ހަނގުރާމަ ކުރިއަށް ގެންދަވާނެ ކަމަށް އެމަނިކުފާނު ވިދާޅުވިއެވެ. މީގެ އިތުރުން މަރުވި ސިފައިންގެ އާއިލާތަކަށް ރައީސް ވަނީ ތައުޒިޔާ ފޮނުއްވާފައެވެ.
Advertisement
ފަހަކަށް އައިސް ލޭކް ޗޭޑް ސަރަހައްދުގައި ބޯކޯ ހަރާމްގެ ހަމަލާތައް ވަނީ ވަރަށް ބޮޑަށް އިތުރުވެފައެވެ. އެގޮތުން 2024 ވަނަ އަހަރުގެ އޮކްޓޫބަރު މަހު ދިން ހަމަލާއެއްގައިވެސް ޗޭޑްގެ 40 އެއްހާ ސިފައިން ވަނީ މަރުވެފައެވެ. އެ ހަމަލާއާ ގުޅިގެން ރައީސް ޑެބީ ވަނީ ބޯކޯ ހަރާމްއާ ދެކޮޅަށް ހާއްސަ އޮޕަރޭޝަނެއް ފައްޓަވައި، އަމަލީ ގޮތުން އެ މަސައްކަތުގައި ބައިވެރިވެވަޑައިގެންފައެވެ.
ލޭކް ޗޭޑް ސަރަހައްދަކީ ކެމަރޫން، ޗޭޑް، ނައިޖަރ އަދި ނައިޖީރިއާ ގުޅޭ ބޯޑަރު ސަރަހައްދަށް ވުމުން، އެ ސަރަހައްދުގައި ހަރަކާތްތެރިވާ ހަތިޔާރު އެޅި ޖަމާއަތްތައް ހުއްޓުވުމަށް އެ ގައުމުތަކަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. ބޯކޯ ހަރާމްގެ އިތުރުން އައި.އެސް.އައި.އެލްއާ ގުޅުން އޮންނަ އައި.އެސް.ޑަބްލިއު.އޭ.ޕީ ޖަމާއަތުންވެސް އެ ސަރަހައްދުގައި ބޮޑެތި ހަމަލާތަކެއް ދެމުންދެއެވެ.
ޗޭޑަކީ ގިނަ އަހަރުތަކެއް ވަންދެން ދާޚިލީ ހަމަނުޖެހުންތަކާއި، ހަތިޔާރު އެޅި ޖަމާއަތްތަކުގެ ނުރައްކަލާ ކުރިމަތިލާން ޖެހިފައިވާ ގައުމެކެވެ. އެ ގައުމަކީ ތެލުގެ މުއްސަނދިކަން އޮތް ގައުމެއް ނަމަވެސް، އިގްތިސާދީ ދަތިތަކާއި މޫސުމީ ބަދަލުތަކުގެ ސަބަބުން އެފްރިކާގެ އެންމެ ފަގީރު ގައުމުތަކުގެ ތެރޭގައި ހިމެނޭ ގައުމެކެވެ.
