މާލެ، ވިލިމާލެ، ގުޅީފަޅު އަދި ތިލަފުށި ގުޅުވާލުމަށް ކުރިއަށްގެންދާ "ތިލަމާލެ ބްރިޖު" ނުވަތަ ގްރޭޓާ މާލެ ކަނެކްޓިވިޓީ ޕްރޮޖެކްޓުގެ މަސައްކަތް ކުރިއަށްދާ ގޮތް، ހައުސިން މިނިސްޓަރު ޑރ. އަބްދުﷲ މުއްތަލިބާއި، އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ހައި ކޮމިޝަނަރު ގޯޕާލް ބަގްލޭ މިއަދު ބައްލަވާލައްވައިފި އެވެ.
މި ޒިޔާރަތުގައި މިނިސްޓަރު މުއްތަލިބާއި ހައި ކޮމިޝަނަރުގެ އަރިހުގައި ދިވެހި ސަރުކާރާއި އިންޑިއާ ސަރުކާރުގެ އިސް އޮފިޝަލުންގެ އިތުރުން، މަޝްރޫއުގެ ކޮންޓްރެކްޓަރު އިންޑިއާގެ އެފްކޮންސް ކުންފުންޏާއި ކޮންސަލްޓަންޓް އޭރަޕްގެ އިސްވެރިން ބައިވެރިވެވަޑައިގަތެވެ.
މި ޒިޔާރަތުގެ ތެރެއިން، މަޝްރޫއުގެ މަސައްކަތް މިހާރު ގޮސްފައިވާ ހިސާބާއި، މިހާތަނަށް ހާސިލްކުރެވިފައިވާ މުހިންމު ލަނޑުދަނޑިތަކާ ގުޅޭގޮތުން އޮފިޝަލުން ވަނީ މިނިސްޓަރާއި ހައި ކޮމިޝަނަރަށް މައުލޫމާތު އަރުވާފަ އެވެ. މީގެ އިތުރުން، ކުރިއަށް ހުރި މަރުހަލާތަކުގެ މަސައްކަތްތައް ރޭވިފައިވާ ގޮތާއި، މަސައްކަތް ތާވަލާ އެއްގޮތަށް ނިންމުމަށްޓަކައި ހުރިހާ ފަރާތްތަކެއްގެ މެދުގައި ގުޅުން ބަދަހިކޮށް ކޯޑިނޭޝަން ވަރުގަދަކުރުމުގެ މުހިންމުކަމާ ގުޅޭގޮތުން މި ބައްދަލުވުމުގައި މަޝްވަރާކުރެވުނެވެ.
ތިލަމާލެ ބްރިޖަކީ މާލެ ސަރަހައްދުގެ ދަތުރުފަތުރާއި އިގްތިސާދަށް އިންގިލާބީ ބަދަލެއް ގެނުވާނެ، ގިނަ ރަށްތަކެއް ގުޅުވާލަދޭ މުހިންމު މަޝްރޫއެކެވެ.
މި މަޝްރޫއުގެ މަސައްކަތް ކުރިއަށްގެންދާ އިންޑިއާގެ އެފްކޮންސް ކުންފުންޏާ މި މަސައްކަތް ހަވާލުކުރީ ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައި، 2021 ވަނަ އަހަރު އެވެ. ނަމަވެސް، މަޝްރޫއުގެ އަމަލީ މަސައްކަތް ފެށިފައިވަނީ އޭގެ ގާތްގަނޑަކަށް އެއް އަހަރު ފަހުންނެވެ.
އެފްކޮންސްއާ ހަވާލުކޮށްގެން ކުރިއަށްގެންދާ މި މަސައްކަތް ނިންމަން އެންމެ ފަހުން ތާވަލުކޮށްފައި އޮތީ މިއަހަރުގެ ސެޕްޓެމްބަރު މަހުގެ ނިޔަލަށެވެ. އެހެންނަމަވެސް، މަސައްކަތް ކުރިއަށްދާ ބާރުމިނަށް ބަލާއިރު އެ ތާރީހަށް މަސައްކަތް އެއްކޮށް ނިންމާލެވޭނެ ކަމަށް ނުބެލެވެ އެވެ. ފާހަގަކޮށްލެވޭ ގޮތުގައި، މިދިޔަ ސަރުކާރުގައި ވެސް އެކި ފަހަރު މަތިން އެކި ތާރީހުތަކަށް ބްރިޖުގެ މަސައްކަތް ނިންމާނެ ކަމަށް އެފްކޮންސްއިން ބުނެފައިވެ އެވެ.
މި މަޝްރޫޢުގެ މަސައްކަތްތައް އަވަސްކޮށް، ވީހާވެސް އަވަހަކަށް ރައްޔިތުންނަށް ބްރިޖުގެ ފައިދާ ލިބޭނެ ގޮތް ހެދުމަށް ގިނަ މަސައްކަތްތަކެއް ސަރުކާރުން ދަނީ ކުރަމުންނެވެ.
