ނިމިދިޔަ އެމްޑީޕީ ސަރުކާރުގެ ދައުރުގައި ހިންގާފައިވާ ވައްކަންތަކުގެ ވާހަކަ ތާރީހުގައި ލިޔެވިގެންދާނެ ކަމަށާއި، އެ ރެކޯޑު ދެން މުގުރައިލެވޭނެ ކަމަށް ގަބޫލުފުޅު ނުކުރައްވާ ކަމަށް ފޭދޫ ދެކުނު ދާއިރާގެ މެމްބަރު އިބްރާހިމް ދީދީ ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން އިބްރާހިމް ދީދީ ވިދާޅުވީ، އަލީ ބާބާއަކާއި 40 ޗޯރުންގެ ވާހަކައަކީ މަޝްހޫރު ވާހަކައެއް ކަމަށާއި، ނަމަވެސް ނިމިދިޔަ ވެރިކަމުގައި ވައްކަންތައް ކޮށްފައިވަނީ އެއަށްވުރެ މާ ނުލަފާކޮށް ކަމަށެވެ. އޭނާ ސިފަކުރެއްވި ގޮތުގައި އެމްޑީޕީއަކީ މުޅި ގައުމު އެއްކޮށް ލޫޓުވާލައި، ރައްޔިތުން ބިރުވެރިކަމެއްގެ ތެރެއަށް ވައްޓާލާފައި ދިޔަ ސަރުކާރެކެވެ.
މަޖިލީހުގައި މިއަދު ކުރިއަށްދިޔަ ބަހުސްގައި، އެމްޑީޕީއަށް ނިސްބަތްވާ މެމްބަރު މީކާއިލް ނަސީމަށް ވަރަށް ބޮޑަށް ފާޑުވިދާޅުވަމުން ދީދީ ވިދާޅުވީ، އެމްޑީޕީ ސަރުކާރުގައި ވެސް މަޖިލިސް މެމްބަރުކަން ކުރެއްވި މެމްބަރަކު މިއަދު މަޖިލީހުގައި ވާހަކަފުޅު ދައްކަވާއިރު، އެބޭފުޅުންގެ ވެރިކަމުގައި ދިވެހި ރައްޔިތުން އުޅުނީ ވަރަށް ދަތި ހާލުގައި ކަމަށެވެ.
ޕީއެސްއެމްއާ ގުޅޭގޮތުން ހުށަހެޅި ގަރާރަށް އިޝާރާތް ކުރައްވައި ދީދީ ވިދާޅުވީ، އެ ގަރާރު މަޖިލިސް ތަޅުމުން ބޭރުކޮށްލީ ކަމަށް ބުނެވޭނެ ޖާގައެއް ނެތް ކަމަށެވެ. އޭނާ ވިދާޅުވި ގޮތުގައި އެމްޑީޕީގެ ފަރާތުން ހުށަހެޅި އެ ގަރާރަށް މަޖިލީހުގެ 90 އިންސައްތަ މެމްބަރުން ތާއީދު ނުކުރެއްވީ ޕީއެސްއެމް ހިންގަމުންދަނީ ރަނގަޅަށް ކަމަށް ގަބޫލުކުރައްވާތީ އެވެ. އަދި ގަރާރަކަށް ބަހުސްކޮށް، އެ ގަރާރު ބަލައިނުގަތުމަށް މަޖިލީހުގެ މެޖޯރިޓީން ވޯޓު ދިނުމަކީ އެ ގަރާރު "ބޭރުކޮށްލުން" ނޫން ކަމަށްވެސް އޭނާ ވިދާޅުވި އެވެ.
މީގެ އިތުރުން، އެމްޑީޕީގެ ފުރަތަމަ ވެރިކަމަށް ވެސް ދީދީ ވަނީ ވަރަށް ބޮޑަށް ފާޑުވިދާޅުވެފަ އެވެ. އޭނާ ސުވާލު އުފެއްދެވީ ވެރިކަމަށް ވަޑައިގަތުމަށްފަހު އަމިއްލަފުޅަށް އިސްތިއުފާ ދެއްވައި، އޭގެ ޖެހިގެން އައި ދުވަހު މުޅި ގައުމުގައި ރޯކޮށްލީ ކޮން ބައެއްތޯ އެވެ.
އިބްރާހިމް ދީދީގެ މި ވާހަކަފުޅުތައް އަމާޒުވެފައިވަނީ، މިއަދުގެ ޖަލްސާގައި، ސަރުކާރު ހިންގާ ޕީއެންސީގެ މެޖޯރިޓީ އޮތް މަޖިލީހުގައި އިދިކޮޅު އެމްޑީޕީން ހުށަހެޅި ގަރާރަކާ ގުޅިގެން އުފެދުނު ބަހުސްގެ ތެރެއިންނެވެ.
