ރާއްޖޭގެ މީޑިއާތަކަކީ މާލީގޮތުން މިނިވަން އަދި ބާރުވެރި ތަންތަނަށް ހެދުމަކީ މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަން (އެމްބީބީސީ) ގެ މުހިންމު އަމާޒެއް ކަމަށް އެ ކޮމިޝަނުން ހާމަކޮށްފިއެވެ.
އެ ކޮމިޝަނުން މިހެން ބުނީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ނެރުނު ބަޔާނެއްގައެވެ. މިއަހަރުގެ ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެއަށް 108 ވަނަ ލިބިފައިވާއިރު، މިއީ ވޭތުވެދިޔަ އަހަރާ އަޅާބަލާއިރު ބަދަލުތަކެއް އައިސްފައިވާ ދަރަޖައެއްކަން ކޮމިޝަނުން ވަނީ ފާހަގަކޮށްފައެވެ. އެހެންކަމުން މި ދަރަޖަ މިއަށްވުރެ މަތީ ހަރުފަތަކަށް ގެންގޮސް، ނޫސްވެރިކަމުގެ ދާއިރާ އިތުރަށް ހަރުދަނާކުރުމަށް ހާއްސަ އިސްކަމެއް ދީގެން މަސައްކަތް ކުރަމުންދާ ކަމަށް އެމްބީބީސީން ވިދާޅުވިއެވެ.
ޔުނެސްކޯއިން މިއަހަރުގެ ނޫސްވެރިކަމުގެ ދުވަހަށް ކަނޑައަޅާފައިވާ ޝިއާރަކީ "ސުލްހަވެރި މުސްތަގުބަލެއް ބައްޓަންކުރުން: އިންސާނީ ހައްގުތަކާއި، ތަރައްގީއާއި ސަލާމަތަށްޓަކައި ނޫސްވެރިކަމުގެ މިނިވަންކަން ކުރިއެރުވުން" އެވެ. މި ޝިއާރާ ގުޅޭގޮތުން ކޮމިޝަނުން ބުނީ ނޫސްވެރިކަމުގެ މިނިވަންކަމަކީ މުޖުތަމައުގެ ސުލްހައިގެ ދަންމަރެއް ކަމަށާއި، ނޫސްވެރިންނަކީ ދައުލަތް ޖަވާބުދާރީ ކުރުވައި ރައްޔިތުން ބާރުވެރިކުރުވުމުގައި މަސައްކަތްކުރާ ހަތަރުވަނަ ބާރު ކަމަށެވެ.
Advertisement
މީޑިއާގެ މުސްތަގުބަލު އާ ހަރުފަތަކަށް ގެންދިއުމަށްޓަކައި އާ ސުލޫކީ މިންގަނޑެއް އެކުލަވާލުމާއި، މީޑިއާއާ ގުޅޭ އާ ގަވައިދުތަކާއި އުސޫލުތައް އެކުލަވާލުމުގެ މަސައްކަތް ކުރަމުންދާކަން ކޮމިޝަނުން ފާހަގަކުރެއްވިއެވެ. މީގެ އިތުރުން ނޫސްވެރިންގެ ރައްކާތެރިކަމާއި ޒަމާނީ ތަމްރީނުތައް ހޯދައިދިނުމަކީވެސް އެ ކޮމިޝަނުން ނުހަނު އިސްކަންދޭކަމަށް ބުންޏެވެ.
މައުލޫމާތު ފެތުރުމުގައި ކޮމިޝަނުން ކަނޑައަޅާފައިވާ އަހުލާގީ މިންގަނޑުތަކަށް ބޯލެނބުމަށް އިލްތިމާސްކުރައްވަމުން އެމްބީބީސީން ވިދާޅުވީ، ނޫސްވެރިކަމުގެ މިނިވަންކަމަކީ ބޮޑެތި ޒިންމާތަކެއް އެކުލެވިގެންވާ ކަމެއް ކަމަށެވެ. އަދި ނޫސްވެރިންނަށް ދިމާވާ ގޮންޖެހުންތައް ކަނޑައްތުކުރުމުގައްޔާއި މިނިވަންކަން ކަށަވަރުކޮށްދިނުމުގައި އަބަދުވެސް ނޫސްވެރިންނާއެކު ދެމިތިބޭނެ ކަމުގެ ޔަގީންކަން އެ ކޮމިޝަނުން ވަނީ އަރުވާފައެވެ.
