ރައީސުލްޖުމްހޫރިއްޔާއާ ގުޅުވައި އަބުރާ ބެހޭ ދޮގު މައުލޫމާތު ފެތުރި މައްސަލައެއްގައި 'އަދަދު' ނޫހުގެ އޮފީސް ފުލުހުން ބަލައި ފާސްކުރުމަކީ ނޫސްވެރިކަމަށް ދިން ހަމަލާއެއް ނޫން ކަމަށާއި، އެއީ ރައްޔިތެއްގެ އަބުރު ރައްކާތެރިކުރުމަށްޓަކައި ގާނޫނުއަސާސީން ފުލުހުންގެ މައްޗަށް ލާޒިމްކުރާ ގާނޫނީ ޒިންމާއެއް ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި މިނިސްޓަރު ވިދާޅުވީ، ދޮގު އިލްޒާމްތައް އަޅުވައި ހިންގާ ޖިނާއީ ކުށްތައް ތަހުގީގުކުރުމުގެ ފުރިހަމަ ހައްގާއި ޒިންމާ ދިވެހި ފުލުހުންގެ ހިދުމަތަށް އެބައޮތް ކަމަށެވެ. އަދި ނޫސް އޮފީހެއް ރޭގެ ވަގުތެއްގައި ބަލައި ފާސްކޮށް ބައެއް ތަކެތި ފުލުހުންގެ ބެލުމުގެ ދަށަށް ގެންދިޔައީ ގާނޫނީ އިމުގެ ތެރެއިން، ކަނޑައެޅިގެން ދޮގު ވާހަކަތަކެއް ފެތުރުމުގެ ސަބަބުން ކަމަށް މިނިސްޓަރު ފާހަގަކުރެއްވި އެވެ.
މިނިސްޓަރު އިހުސާން ވިދާޅުވި ގޮތުގައި، ގާނޫނުއަސާސީގެ 27 ވަނަ މާއްދާ އާއި 28 ވަނަ މާއްދާއިން ހިޔާލުފާޅުކުރުމާއި ނޫސްވެރިކަމުގެ މިނިވަންކަން ކަށަވަރުކޮށްދީފައި ވީނަމަވެސް، އެއީ ހައްދެއް ނެތް މިނިވަންކަމެއް ނޫނެވެ. އެ ހައްގުތަކަކީ އިސްލާމްދީނުގެ އަސްލުތަކާ ހިލާފުނުވާ ގޮތަށް އަދި އެހެން މީހުންގެ އަބުރަށް އުނިކަން ނާންނާނެ ފަދަ ޒިންމާދާރު ގޮތެއްގައި ބޭނުންކުރަންޖެހޭ ހައްގުތަކެއްކަން އޭނާ ހަނދާންކޮށްދެއްވި އެވެ.
ވަކިން ހާއްސަކޮށް ގާނޫނުއަސާސީގެ 33 ވަނަ މާއްދާއިން ކޮންމެ ރައްޔިތަކަށްމެ ލިބިދޭ އަބުރު ރައްކާތެރިކުރުމުގެ ހައްގަށް އުނިކަން އަންނަ ގޮތަށް، އެއްވެސް ހެއްކެއް ނެތި ފަތުރާ ދޮގު ތުހުމަތުތަކަކީ ނޫސްވެރިކަމުގެ މިނިވަންކަމުގެ ދަށުން ހިމާޔަތް ލިބޭނެ ކަންކަން ނޫން ކަމަށް މިނިސްޓަރު ވިދާޅުވި އެވެ. ރައީސުލްޖުމްހޫރިއްޔާގެ އާއިލާއަށާއި، އެމަނިކުފާނުގެ އަމިއްލަ އަބުރާއި، އަދި އެ މަގާމުގެ ގަދަރަށް އުނިކަން އަންނަ ގޮތަށް ބޮޑެތި އިލްޒާމްތައް އެޅުވުމަކީ "ޖާނަލިޒަމް" ނުވަތަ ނޫސްވެރިކަން ނޫން ކަމަށް އިހުސާން ސިފަކުރެއްވި އެވެ.
މި ހާދިސާ ހިނގާފައިވަނީ ރައީސް ޑރ. މުހައްމަދު މުއިއްޒާ ގުޅޭގޮތުން 'އަދަދު' ނޫހުން ޝާއިއުކުރި ޑޮކިއުމެންޓްރީއެއްގައި ބޮޑެތި ތުހުމަތުތަކެއް ކޮށްފައިވާ ދަނޑިވަޅެއްގަ އެވެ. މިކަމާ ގުޅިގެން ނޫސްވެރިންގެ ޖަމިއްޔާތަކުންނާއި އިދިކޮޅު ފަރާތްތަކުން ކަންބޮޑުވުން ފާޅުކުރަމުންދާއިރު، މިނިސްޓަރު ވިދާޅުވީ އެއްވެސް މީހަކު ގާނޫނަށްވުރެ މަތީގައި ނުހުންނާނެ ކަމަށެވެ.
މިނިސްޓަރުގެ ޕޯސްޓު ނިންމާލައްވަމުން ވިދާޅުވީ، ދިވެހި ރައްޔިތުން ބޭނުންވަނީ އަބުރު ކަތިލާ ނޫސްވެރިކަމެއް ނޫން ކަމަށާއި، ހަގީގީ މައުލޫމާތު ފޯރުކޮށްދޭ ޒިންމާދާރު މީޑިއާ މާހައުލެއް ކަމަށެވެ. އަދި ނޫސްވެރިކަމުގެ މިނިވަންކަން ދެމިއޮންނާނީ ޖަވާބުދާރީވުމާއި ޒިންމާދާރުކަމާ އެކު ކަމަށްވެސް އޭނާ ވިދާޅުވި އެވެ.
