ޅ. ނައިފަރުގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެ ދަށުން، ބިން ހިއްކުމުގެ 95 އިންސައްތަ މަސައްކަތް ނިންމާލައިފި އެވެ.

މި މަޝްރޫއު ކުރިއަށްދާ ގޮތް ބައްލަވާލެއްވުމަށްޓަކައި، ކުންފުނީގެ ޑެޕިއުޓީ މެނޭޖިން ޑައިރެކްޓަ މުހައްމަދު ޖަމްޝީދު ވަނީ ނައިފަރަށް ޒިޔާރަތްކުރައްވައި މަސައްކަތްތައް އިންސްޕެކްޓް ކުރައްވާފަ އެވެ. މި ދަތުރުފުޅުގައި ނައިފަރު ދާއިރާގެ އިއްޒަތްތެރި މެންބަރު ޔާސީން އަބްދުﷲ ވެސް ބައިވެރިވެވަޑައިގެން މަސައްކަތް ކުރިއަށްދާ ގޮތް ބައްލަވާލެއްވި އެވެ.

މަޝްރޫއުގެ އެންމެ ފަހުގެ މައުލޫމާތުތަކަށް ބަލާއިރު، ބިން ހިއްކުމުގެ 95 އިންސައްތަ ނިމިފައިވާއިރު، މުޅި މަޝްރޫއުގެ 70 އިންސައްތަ މަސައްކަތް މިހާރު ވަނީ ނިމިފަ އެވެ. އަދި ގޮނޑުދޮށް ހިމާޔަތްކުރުމުގެ މަސައްކަތަށް ބޭނުންވާ ބޮޑުހިލައިގެ ޝިޕްމަންޓް މިހާރު ވަނީ ނައިފަރު ސައިޓަށް ގެންދެވިފަ އެވެ. މި މަޝްރޫއަކީ ތާވަލަށްވުރެ އަވަހަށް، ހަލުވި މިނެއްގައި ކުރިއަށްދާ މަޝްރޫއެއްކަން ފާހަގަކުރެވެ އެވެ.

ދިވެހި ސަރުކާރުން ކުރިއަށްގެންދާ މި މަޝްރޫއުގެ މައިގަނޑު މަގްސަދަކީ ނައިފަރަށް ދިމާވެފައިވާ ބިމުގެ ދަތިކަމަށް ދާއިމީ ހައްލެއް ހޯދައިދިނުމެވެ. މި މަޝްރޫއުގެ ދަށުން ޖުމްލަ 209,500 އަކަމީޓަރުގެ ބިން ހިއްކުމަށް ވަނީ ހަމަޖެހިފަ އެވެ.

މި މަޝްރޫއުގެ ސްކޯޕްގައި ހިމެނޭ މައިގަނޑު މަސައްކަތްތަކަކީ:

1. 2,297,510 ކިއުބިކް މީޓަރުގެ ބިން ހިއްކުން.
2. 1,813 މީޓަރުގެ ބޮޑުހިލައިގެ ރިވެޓްމަންޓް ޖެހުން.
3. 283 މީޓަރުގެ ބޭރު ތޮށިލުން.
4. 520 މީޓަރުގެ ލޯ-ކްރެސްޓެޑް ބްރޭކްވޯޓާ ޤާއިމުކުރުން.
5. 180 މީޓަރުގެ ގްރޮއިން ޖެހުން.

މުޅި މަޝްރޫއުގެ ދަށުން ޖުމްލަ 2,139 މީޓަރުގެ ސަރަހައްދެއްގައި ގޮނޑުދޮށް ހިމާޔަތްކުރުމުގެ މަސައްކަތް ކުރިއަށްދާނެ އެވެ. މި މަޝްރޫއު ނިމުމުން ނައިފަރުގެ ރައްޔިތުންނަށް ދިމާވެފައިވާ ބޯހިޔާވަހިކަމާއި ބިމުގެ ދަތިކަމަށް ބޮޑު ލުޔެއް ލިބިގެންދާނެ އެވެ.