ހދ. ނޭކުރެންދޫ ބަނދަރު އަޕްގްރޭޑް ކުރުމަށް ސަރުކާރުން ކުރިއަށްގެންދާ މަޝްރޫއުގެ ބޮޑު ބައެއް ނިމިއްޖެ އެވެ.. މި މަޝްރޫއުގެ މަސައްކަތް ކުރިއަށްގެންދާ އެމްޓީސީސީން ހާމަކޮށްފައިވާ ގޮތުގައި، މިހާރު މުޅި މަޝްރޫއުގެ 41 އިންސައްތަ މަސައްކަތް ވަނީ ނިމިފަ އެވެ.
މި މަޝްރޫއަކީ ނޭކުރެންދޫ ރައްޔިތުންނަށް ދިމާވެފައިވާ ލަފާފުރުމުގެ ދަތިތަކަށް ދާއިމީ ހައްލެއް ހޯދައިދިނުމުގެ ގޮތުން ދިވެހި ސަރުކާރުން 31 އޮކްޓޫބަރު 2022 ގައި އެމްޓީސީސީއާ ހަވާލުކޮށްގެން ކުރިއަށްގެންދާ މަޝްރޫއެކެވެ. މި މަސައްކަތް 2022 އަދި 2023 ވަނަ އަހަރު ހުއްޓިފައި އޮތް ނަމަވެސް މަޝްރޫއަށް ބޭނުންވާ ސާމާނާއި ފައިސާ ހަމަޖައްސާފައިވަނީ މި ސަރުކާރުންނެވެ. ރަށުގެ ހުޅަނގު ދެކުނު ފަރާތުގައި ކުރިއަށްދާ މި މަސައްކަތުގެ ތެރެއިން މިހާރު ސައިޓުގައި ކުރިއަށްދަނީ ބޭރުތޮށީގެ ޕްރޮފައިލް ކުރުމުގެ މަސައްކަތެވެ.
ނޭކުރެންދޫ ބޭރު ތޮށީގެ މަސައްކަތް ކުރިއަށްދަނީ. /ފޮޓޯ: އެމްޓީސީސީ
މި މަޝްރޫއުގެ ދަށުން ތަފާތު ގިނަ މަސައްކަތްތަކެއް ކުރުމަށް ވަނީ ހަމަޖެހިފައެވެ. އޭގެ ތެރޭގައި:
- 31,087 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުން.
- 290 މީޓަރުގެ ބޭރުތޮށި ލުމާއި 76 މީޓަރުގެ ސަރަހައްދެއްގައި ޗެނަލް ބްރޭކްވޯޓާ ގާއިމުކުރުން.
- 166 މީޓަރުގެ ރެވެޓްމެންޓް ޖެހުމާއި 212 މީޓަރުގެ އެއްގަމު ތޮށިލުން.
- ރޭމްޕެއް ހެދުމާއި އެކްސެސް ޕްލެޓްފޯމެއް ގާއިމުކުރުން.
- ބަނދަރު ބައްތި އާއި ނެވިގޭޝަނަލް ލައިޓް ހަރުކުރުމާއި، މޫރިން ބޯއީސް ހަރުކުރުން.
- ބަނދަރު ސަރަހައްދުގައި ދުވާރު ހެދުމާއި ފެން ހިންދާ ނިޒާމެއް ގާއިމުކުރުން.
މަޝްރޫއުގެ ތަފްސީލީ ކުރިއެރުމަށް ބަލާއިރު، ގޮނޑުދޮށް ހިމާޔަތްކުރުމަށް 532 މީޓަރުގެ ހިލަ ޖެހުމުގެ މަސައްކަތާއި، އެއްގަމު ތޮށިލުމަށް ބޭނުންވާ 212 މީޓަރުގެ ޕްރީކާސްޓް އެލް-ބްލޮކް ޖެހުމުގެ މަސައްކަތް ހިމެނެ އެވެ. މީގެ އިތުރުން 1859 އަކަމީޓަރުގެ ސަރަހައްދެއްގައި ޕޭވްމަންޓް އެޅުމުގެ މަސައްކަތް ވެސް މި މަޝްރޫއުގެ ދަށުން ކުރިއަށްދާނެ އެވެ.
މި މަސައްކަތް ވީހާވެސް އަވަހަށް ނިންމުމަށް އެމްޓީސީސީން ދަނީ ބާރުސްޕީޑުގައި މަސައްކަތް ކުރަމުންނެވެ.
