ހުޅުމާލޭގެ ފޭސް 1 އަދި ފޭސް 2 ގެ މަގުތައް މަރާމާތުކޮށް، ތާރުގަނޑަށް ލިބިފައިވާ ގެއްލުންތައް ރަނގަޅުކުރުމުގެ އަމަލީ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފަށައިފި އެވެ.
މި މަސައްކަތާ ގުޅޭގޮތުން އެޗްޑީސީން ނެރުނު އިއުލާނެއްގައި ބުނެފައިވަނީ، ހުޅުމާލޭގެ ދެ ފޭސްގެ މަގުތައް މަރާމާތުކުރުމުގެ މަސައްކަތް މިހާރު ކުރިއަށްދަނީ ސަރަހައްދުތަކަކަށް ބަހާލައިގެން ކަމަށެވެ. މި މަޝްރޫޢު ރާވާފައިވަނީ މަގުތައް ބޭނުންކުރާ ފަރާތްތަކަށް ދިމާވާނެ ދަތިތައް ވީހާވެސް ކުޑަވާނެ ގޮތަކަށް ބަލައިގެން ކަމަށް އެ ކޯޕަރޭޝަނުން ބުނެ އެވެ.
އާންމުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، މަސައްކަތް ހިނގަމުންދާ ވަގުތުތަކުގައި އެ ސަރަހައްދުތަކުގެ މަގުތައް ވަގުތީގޮތުން ބަންދުކުރަމުންދާނެ ކަމަށް އެޗްޑީސީން މައުލޫމާތުދެ އެވެ. އެހެންކަމުން، ބަންދުކޮށްފައިވާ ސަރަހައްދުތަކަށް އާންމުން ނުވަނުމަށާއި، ޓްރެފިކް މެނޭޖްކުރުމަށް ބަހައްޓާފައިވާ ބޯޑުތަކުގައިވާ އިރުޝާދުތަކާ އެއްގޮތަށް އަމަލުކުރުމަށް އެ ކޯޕަރޭޝަނުން ވަނީ އިލްތިމާސްކޮށްފަ އެވެ.
Advertisement
މި މަސައްކަތުގެ ސަބަބުން ދަތުރުފަތުރުގެ ނިޒާމަށާއި އާންމު ދިރިއުޅުމަށް ދިމާވެދާނެ ދަތިތަކަށްޓަކައި އެޗްޑީސީން ވަނީ ނިހާއަތަށް މާފަށް އެދިފަ އެވެ. އަދި މި މުހިންމު މަސައްކަތުގައި ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް، އެ ކޯޕަރޭޝަނުން ވަނީ އިހްލާސްތެރިކަމާއެކު ޝުކުރު އަދާކޮށްފަ އެވެ.
މަގުތައް މަރާމާތުކުރުމުގެ މި މަސައްކަތަކީ ހުޅުމާލޭގެ އުމްރާނީ ތަރައްގީއަށާއި، މަގުތަކަކީ އެންމެންނަށް އަމާން ތަނަކަށް ހެދުމަށް ސަރުކާރުން ކުރަމުންދާ މަސައްކަތުގެ ދަށުން ކުރިއަށްގެންދާ މުހިންމު މަޝްރޫއެކެވެ.
