ޕްލާންޓް އެންޑް އެނިމަލް ކަރަންޓީން ޔުނިޓުން ކުރިއަށްގެންދިޔަ އިންސްޕެކްޝަންތަކުގެ މިއަހަރުގެ ތަފާސްހިސާބުތައް މިނިސްޓްރީ އޮފް ފިޝަރީޒް، އެގްރިކަލްޗާ އެންޑް އޯޝަން ރިސޯސަސް އިން އާންމުކޮށްފި އެވެ.
މިނިސްޓްރީން މިއަދު އާންމުކުރި ހިސާބުތަކަކީ 1 ޖަނަވަރީ 2026 އިން ފެށިގެން 20 އޭޕްރީލް 2026 ގެ ނިޔަލަށް އެ ޔުނިޓުން ބަލައި ފާސްކޮށްފައިވާ ތަކެތީގެ ތަފްސީލެވެ. މި މުއްދަތުގެ ތެރޭގައި ގަސްގަހާގެއްސާއި ދިރޭތަކެތީގެ ގިނަ އަދަދެއްގެ ޝިޕްމަންޓްތައް ވަނީ ބަލައި ފާސްކޮށްފަ އެވެ.
ތަފާސްހިސާބުތަކަށް ބަލާއިރު، ބަލައި ފާސްކުރުމަށްފަހު އެންމެ ގިނައިން ދޫކޮށްފައިވަނީ ގަސްގަހާގެއްސާއި ގަހުގެ ބައިތަކެވެ. އެގޮތުން 377 ކޮންސައިންމަންޓެއްގެ ދަށުން 1,625,162 ގަހާއި ގަހުގެ ބައިތައް ވަނީ ދޫކޮށްފަ އެވެ. ނަމަވެސް، އުސޫލުތަކާ އެއްގޮތަށް ނެތުމުގެ ސަބަބުން 66 ކޮންސައިންމަންޓެއްގެ 4,386 ގަސް ވަނީ ހިފަހައްޓާފަ އެވެ. މީގެ ތެރެއިން 65 ކޮންސައިންމަންޓެއްގައި ހިމެނޭ 4,103 ގަސް ނައްތާލާފައިވާއިރު، ހިފެހެއްޓި ތަކެތީގެ ތެރެއިން ދޫކޮށްފައިވަނީ އެންމެ ކޮންސައިންމަންޓެއްގެ 283 ގަހެވެ.
ދިރޭތަކެތީގެ ބާވަތްތަކަށް ބަލާއިރު، ފްރެޝް ވޯޓާ ފިޝްގެ 27 ކޮންސައިންމަންޓެއްގައި ހިމެނޭ 77,345 މަސް ވަނީ ބަލައި ފާސްކުރުމަށްފަހު ދޫކޮށްފައެވެ. އަދި 9 ކޮންސައިންމަންޓެއްގެ 938 ދޫންޏާއި، 5 ކޮންސައިންމަންޓެއްގެ 6,338 ޕޯލްޓްރީ (ކުކުޅު ފަދަ ތަކެތި) ވެސް ވަނީ އެތެރެކުރުމުގެ ހުއްދަ ދީފަ އެވެ.
ގަވާއިދާ ހިލާފުވެގެން ހިފެހެއްޓުނު ދިރޭތަކެތީގެ ތަފްސީލަށް ބަލާއިރު، މައިގަނޑު ގޮތެއްގައި ހިފަހައްޓާފައިވަނީ މަހުގެ ބާވަތްތަކެވެ. އެގޮތުން 5 ކޮންސައިންމަންޓެއްގެ 602 މަސް ހިފަހައްޓާފައިވެއެވެ. މި ހުރިހާ މަހެއްވެސް (5 ކޮންސައިންމަންޓް) މިހާރު ވަނީ ނައްތާލާފަ އެވެ. ގަވާއިދާ ހިލާފުވެގެން ހިފެހެއްޓުނު އެއްވެސް ދިރޭ އެއްޗެއް މި މުއްދަތުގެ ތެރޭގައި ދޫކޮށްފައެއް ނުވެ އެވެ.
މިނިސްޓްރީން މި ތަފާސްހިސާބުތައް އާންމުކޮށްފައިވަނީ، ރާއްޖެއަށް އެތެރެކުރެވޭ ގަސްގަހާގެއްސާއި ދިރޭތަކެތީގެ ރައްކާތެރިކަން ކަށަވަރުކުރުމަށާއި، ބަލިތަކުން ގައުމުގެ ތިމާވެށި ސަލާމަތްކުރުމަށް ކުރަމުންދާ މަސައްކަތްތަކުގެ ދަށުންނެވެ.
