މުޖުތަމައުގައި އަންހެނުން ބާރުވެރިކޮށް، ފަންނީ ދާއިރާތަކުން ތަމްރީނީ ފުރުސަތުތައް ފަހިކޮށްދިނުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން "ވިލުންވެރި ކަނބަލުން" ޕްރޮގްރާމްގެ އައު ބުރެއް ފެށުމަށް ތައްޔާރުވެއްޖެ އެވެ.
މި ޕްރޮގްރާމަކީ ގޭތެރޭގައި ހިފާގެންގުޅޭ ކަރަންޓު ސާމާނަށް ދިމާވާ ކުދިކުދި މައްސަލަތައް އަމިއްލައަށް ހައްލުކުރުމުގެ ހުނަރު އަންހެނުންނަށް އުނގަންނައިދިނުމަށް ކުރިއަށްގެންދާ ހާއްސަ ތަމްރީނުތަކެކެވެ. ގިނަ ފަހަރަށް ގޭތެރޭގެ އިލެކްޓްރޯނިކް ސާމާނަކަށް ކުޑަ މައްސަލައެއް ދިމާވިޔަސް، އެހެން މީހެއްގެ އެހީތެރިކަމަށް އިންތިޒާރުކުރަން ޖެހުމުގެ ބަދަލުގައި، އަމިއްލަ ނަފްސަށް އޮންނަ އިތުބާރު ބޮޑުކޮށް، މިފަދަ ހާލަތްތަކަށް ކަނބަލުން ތައްޔާރުކުރުމަކީ މި ޕްރޮގްރާމްގެ މައިގަނޑު މަގްސަދެވެ.
2023 ވަނަ އަހަރު މި ޕްރޮގްރާމް ފެށިގެން އައިއިރު، ޖުމްލަ 323 ކަނބަލުން ވަނީ ތަމްރީނު ފުރިހަމަކޮށްފަ އެވެ. އެ އަހަރު ލިބުނު ބޮޑު ތަރުހީބަށް ބަލައި، އެޗްޑީސީން ވަނީ މިއަހަރުގެ ތެރޭގައި މި ސިލްސިލާގެ އިތުރު ކްލާސްތަކެއް ކުރިއަށް ގެންދަން ނިންމާފަ އެވެ. މިގޮތުން، ޑޮމެސްޓިކް އެޕްލައެންސް މަރާމާތުކުރުމުގެ އިތުރުން، ސައިކަލުތަކަށް ދިމާވާ ކުދިކުދި މައްސަލަތައް ހައްލުކުރަން ދަސްކޮށްދޭ ހާއްސަ ތަމްރީނެއްވެސް މިއަހަރުގެ ތެރޭގައި ބޭއްވުމަށް ވަނީ ތާވަލުކޮށްފަ އެވެ.
މިއަހަރުގެ ކްލާސްތައް ފެށުމަށް ހަމަޖެހިފައިވަނީ 07 މެއި ގައެވެ. މި ކްލާސްތަކުގައި ބައިވެރިވާން އެދޭ ފަރާތްތަކަށް ރަޖިސްޓްރީވުމުގެ ފުރުސަތު އެޗްޑީސީގެ ސޯޝަލް މީޑިއާ ޕްލެޓްފޯމްތައް މެދުވެރިކޮށް ވަނީ ހުޅުވާލާފަ އެވެ. ބައިވެރިވުމަށް ރަޖިސްޓްރީކުރުމުގެ އެންމެ ފަހު ސުންގަޑިއަކީ 03 މެއި 2026 އެވެ.
މީގެ އިތުރުން، އެޗްޑީސީއާއި އެމްއައިޓީއާ ދެމެދު ވެފައިވާ އެއްބަސްވުމުގެ ދަށުން، ނުކުޅެދުންތެރިކަން ހުންނަ ފަރާތްތަކަށް އަމާޒުކޮށްގެން ހިންގާ ތަމްރީނުތަކާއި، ޒުވާނުން ހުނަރުވެރިކުރުމަށް ހާއްސަ ޕްރޮގްރާމްތަކެއްވެސް ކުރިއަށް ގެންދިއުމަށް ވަނީ ރޭވިފަ އެވެ. މިފަދަ ފަންނީ ހުނަރުތަކަކީ މާލެ ސަރަހައްދުގައި ދިރިއުޅޭ ކަނބަލުންނަށް ދިރިއުޅުމުގެ އަމަލީ މައިދާނުގައި ބޭނުންތެރި، އަދި އެކަނބަލުންނަކީ ވިލުންވެރި ބަޔަކަށް ހެދުމަށް ލިބޭ މުހިންމު ފުރުސަތެކެވެ.
