ނިދާފައި ހޭލާއިރު ބާލީހުގައި ކުޅު ހުރެފައި، އަނގަމަތި ތެމިފައި ހުރުމަކީ ގިނަ ބަޔަކަށް ތަޖުރިބާ ކުރެވޭ ކަމެކެވެ. މިއީ އާންމުކޮށް ލަދުވެތި ކަމެއްގެ ގޮތުގައި ފާހަގަކުރެވުނު ނަމަވެސް، މިއީ ސިއްހީ ގޮތުން ސަމާލުވާންޖެހޭ މުހިންމު ކަމެއް ކަމަށް މާހިރުން ވިދާޅުވެ އެވެ.
އެމެރިކާގެ ނޯތުވެސްޓަން ޔުނިވަރސިޓީގެ ކްލިނިކަލް އެސިސްޓަންޓް ޕްރޮފެސަރ ޑރ. ލަންޑަން ޑުއިކާ ވިދާޅުވި ގޮތުގައި، ކޮންމެ މީހަކަށްވެސް ކޮންމެވެސް ދުވަސްވަރެއްގައި ނިދީގައި ކުޅުދިޔުމުގެ މައްސަލަ ދިމާވެދާނެ އެވެ. ނަމަވެސް، މިއީ ކޮންމެ ރެއަކު ދިމާވާ ކަމެއްނަމަ އަދި ބާލީސް ވަރަށް ބޮޑަށް ތެމޭނަމަ، ޑޮކްޓަރަކަށް ދެއްކުން މުހިންމެވެ. މިއީ ނިދުމުގެ ސީރިއަސް މައްސަލައެއް ނުވަތަ 'ޕާކިންސަންސް' ފަދަ ނާރުގެ ބައްޔެއްގެ ނިޝާނަކަށް ވެސް ވެދާނެއެވެ.
ނިދީގައި ކުޅުދިޔުމަށް މެދުވެރިވާ ބައެއް މުހިންމު ސަބަބުތައް:
- ސްލީޕް އެޕްނިއާ: މިއީ ނިދީގައި ނޭވާ ހުއްޓޭ ބައްޔެކެވެ. މި ބަލި ހުންނަ މީހުން ނޭވާ ހޯދުމަށް އަނގަ ހުޅުވައިގެން ނޭވާލާއިރު، އަނގަޔަށް ކުޅު އެއްވެ ބޭރުވާން މެދުވެރިވެ އެވެ. މިއީ ފަރުވާ ނުދީފިނަމަ ހިތުގެ ބަލިތަކާއި ސްޓްރޯކަށް މަގުފަހިވާ ކަމެކެވެ.
- އަނގަޔަށް ނޭވާލުން: ނޭފަތުގެ މަގު ހަނިވުމުގެ ސަބަބުން ނުވަތަ ނޭފަތުގެ ކަށިގަނޑު ގުދުވުމުގެ ސަބަބުން ގިނަ ބަޔަކަށް އަނގަޔަށް ނޭވާލެވެއެވެ. މިކަމުގެ ސަބަބުން ނިދީގައި ކުޅުދިޔުމަށް މަގުފަހިވެ އެވެ.
- އެސިޑް ރިފްލަކްސް: ބަނޑުގައި ހުންނަ އެސިޑް މައްޗަށް އެރުމުގެ ސަބަބުން ކަރުތެރޭގައި ކުޅު ގިނަވެ، ނިދީގައި ކުޅު ބޭރުވެ އެވެ.
- އިންފެކްޝަން: އަރިދަފުސް ރޯގާ، ސައިނަސް ނުވަތަ ކަރުގެ އިންފެކްޝަންތަކުގެ ސަބަބުން ނޭފަތް ބެދުމުން އަނގަޔަށް ނޭވާލާން ޖެހުމަކީވެސް މިކަން ދިމާވާ ސަބަބެކެވެ.
- ދަތުގެ މައްސަލަތައް: ދަތްކިރުވުމާއި ދަތްތައް ހުންނަންޖެހޭ ތަރުތީބުން ބޭރުގައި ހުރުމުން އަނގަ ރަނގަޅަށް ނުލެއްޕޭނަމަވެސް މި މައްސަލަ ދިމާވެ އެވެ.
މާހިރުން ލަފާދެއްވާ ގޮތުގައި، މި މައްސަލަ ދިމާވާނަމަ ނިދާ ކޮޅު ނުވަތަ ސްލީޕިން ޕޮސިޝަން ބަދަލުކުރުމަކީ ހައްލަކަށް ވެދާނެ އެވެ. އާންމުކޮށް އަރިއަކަށް ނުވަތަ ބަނޑުވަތަށް ނިދާ މީހުންނަށް މިކަން މެދުވެރިވާލެއް ގިނަ އެވެ. ނަމަވެސް، މިއީ ދާއިމީ ކަމެއްނަމަ ލަސްނުކޮށް ކަރުންމަތީގެ ހާއްސަ ޑޮކްޓަރަކަށް ދައްކައި، ނިދުމުގެ ދިރާސާއެއް ހެދުމަކީ ބަލީގެ އަސްލު ދެނެގަތުމަށް ކުރެވިދާނެ މުހިންމު ކަމެކެވެ.
މި މައްސަލައާ ގުޅޭގޮތުން އިތުރަށް ވާހަކަދައްކަވަމުން، ފިލަޑެލްފިއާގެ ތޯމަސް ޖެފަރސަން ޔުނިވަސިޓީގެ ކްލިނިކަލް އެސިސްޓަންޓް ޕްރޮފެސަރު ޑރ. ނީލް ހޮކްސްޓެއިން ފާހަގަކުރެއްވި ގޮތުގައި، ނިދީގައި ކުޅުދިއުމަކީ ހަމައެކަނި އުނދަގޫ ކަމެއް ނޫނެވެ. މިއީ ހަށިގަނޑުގެ އެތެރޭގައި ހިނގާ މުހިންމު ކަންތައްތަކެއްގެ އިޝާރާތެކެވެ.
ހާއްސަކޮށް، އުމުރުން ދުވަސްވީ މީހުންގެ މެދުގައި މިކަމަށް ސަމާލުކަން ދިނުން މުހިންމެވެ. ޑރ. ޑުއިކާ ވިދާޅުވި ގޮތުގައި، އުމުރުން ދުވަސްވުމުން ކަރުތެރޭގެ އިހުސާސްތައް ދަށްވުމުގެ ސަބަބުން، އުއްޑުން އޮވެ ނިދާއިރު އަނގަޔަށް އެއްވާ ކުޅު ފުއްޕާމެޔަށް ދިއުމުގެ ނުރައްކާ އޮވެއެވެ. މިއީ "ސައިލެންޓް އެސްޕިރޭޝަން" ނުވަތަ ހިމޭންކަމާއެކު ފުއްޕާމެޔަށް ތަކެތި ދިއުމުގެ މައްސަލައަށް މަގުފަހިވެ، ނިއުމޯނިއާ ފަދަ ނުރައްކާތެރި ބަލިތަކަށް މީހާ ހުށަހެޅިދާނެ ކަމެކެވެ.
މީގެ އިތުރުން، މިހާރަކަށް އައިސް ސޯޝަލް މީޑިއާގައި މަގުބޫލުވަމުންދާ "މައުތު ޓޭޕިން" ނުވަތަ ނިދާއިރު އަނގަ ބަންދުކުރުމަށް ޓޭޕް އެޅުމަކީ ނުރައްކާތެރި ކަމެއް ކަމަށް މާހިރުން އިންޒާރު ދެއްވަ އެވެ. ވެސްޓަން ޔުނިވަސިޓީގެ ޕްރޮފެސަރު ޑރ. ބްރަޔަން ރޮޓެންބާގް ވިދާޅުވި ގޮތުގައި، އަނގަ ބަންދުކޮށްގެން ނިދުމަކީ ނޭފަތް ބެދިފައި ހުންނަ ވަގުތެއްގައި ނޭވާ ހާސްވެ ފުރާނައަށް ނުރައްކާވެދާނެ ކަމެކެވެ. ސޯޝަލް މީޑިއާގައި މިކަމުގެ ސަބަބުން މޫނުގެ ބައްޓަން ރީތިވާ ކަމަށް ބުނާ ބުނުމަކީ އެއްވެސް ސައިންޓިފިކް ހެއްކެއް އޮތް ވާހަކައެއް ނޫން ކަމަށްވެސް އޭނާ ފާހަގަކުރެއްވި އެވެ.
ޑޮކްޓަރުން ލަފާދެއްވަނީ، ނިދީގައި ކުޅުދިއުމުގެ މައްސަލައާ އެކު، މެންދުރުފަހު ވަރުބަލިވުން، ބޯއެނބުރުން، ނުވަތަ ހެނދުނު ހޭލާއިރު ކަރުތެރެ ރިއްސުން ފަދަ ކަންކަން ދިމާވާނަމަ ލަސްނުކޮށް ސިއްޙީ އެހީތެރިކަން ހޯދުމަށެވެ. ގިނަ ފަހަރަށް މިއީ ނޭފަތުގެ އެލާޖީއަކަށް ބޭނުންކުރާ ބޭހަކުން ނުވަތަ ދަތްޕިލައަށް ލައްވާ އާލާތަކުން ފަސޭހައިން ހައްލުކުރެވޭނެ ކަންކަމެވެ. ނަމަވެސް، މީގެ އަސްލު ދެނެގަނެވޭނީ ތަޖުރިބާކާރު ޑޮކްޓަރެއްގެ ލަފާގެ މަތިން ހަދާ ދިރާސާތަކަކަށް ފަހުގަ އެވެ.
