މާލެ ސިޓީގެ މޭޔަރު އާދަމް އާޒިމަށް އަމާޒުކޮށް ރޭ މާލޭގައި ދިން ހަމަލާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެންމެ ހަރުކަށި އިބާރާތުން ކުށްވެރިކުރައްވައިފި އެވެ.

ރައީސުލްޖުމްހޫރިއްޔާގެ އޮފީހުން މިއަދު ނެރުއްވި ނޫސްބަޔާނެއްގައި ވިދާޅުވެފައިވަނީ، މޯލްޑިވިއަން ޑިމޮކްރަޓިކް ޕާޓީ (އެމް.ޑީ.ޕީ) އިން ރޭ މާލޭގައި ބޭއްވި މުޒާހަރާގެ ތެރެއިން މޭޔަރަށް ހަމަލާދޭން މަސައްކަތްކުރާ މަންޒަރު ފެންނަ ވީޑިއޯއެއް ރައީސުލްޖުމްހޫރިއްޔާއަށް ފެނިވަޑައިގެންފައިވާ ކަމަށެވެ. މާލެ ސިޓީގެ މޭޔަރަކީ ރައްޔިތުންގެ ސީދާ ވޯޓަކުން އިންތިހާބުކޮށްފައިވާ ބޭފުޅަކަށް ވާއިރު، އެމަނިކުފާނަށް ނުވަތަ އެއްވެސް ސިޔާސީ ލީޑަރަކަށް ހަމަލާދީ، މަސައްކަތަށް ހުރަސްއެޅުމަކީ ބަލައިގަނެވޭނެ ކަމެއް ނޫންކަމަށް ރައީސް ވިދާޅުވެފައިވެ އެވެ.

މި ހާދިސާއާ ގުޅިގެން ޗީފް ގަވަރންމަންޓް ސްޕޯކްސްޕާސަން މުހައްމަދު ހުސައިން ޝަރީފް ވިދާޅުވީ، މިއީ ސަރުކާރުން ކުރުވި ކަމެއް ކަމަށް ބުނެ މޭޔަރު ކުރައްވާ ތުހުމަތުތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ. އަދި އެފަދަ ދަށު ދަރަޖައިގެ ތުހުމަތުތައް ކުރެއްވުމަކީ ހިތާމަހުރި ކަމެއް ކަމަށާއި، މި ހަމަލާއާ ސަރުކާރާ އެއްވެސް ގުޅުމެއް ނެތް ކަމުގެ ފުރިހަމަ ޔަގީންކަން ތަރުޖަމާނު އެރުއްވި އެވެ.

ތަރުޖަމާނު އިތުރަށް ފާހަގަކުރެއްވި ގޮތުގައި، މި ހާދިސާ ހިނގި ފަހުން މިހާތަނަށް އެމް.ޑީ.ޕީގެ ފަރާތުން ނުވަތަ މާލެ ސިޓީ ކައުންސިލްގެ ފަރާތުންވެސް ރަސްމީކޮށް ފުލުހުންނަށް މައްސަލަ ރިޕޯޓުކޮށްފައެއް ނުވެ އެވެ. ނަމަވެސް، ސޯޝަލް މީޑިއާއިން ވީޑިއޯ ފެނުނު ހިސާބުން ފެށިގެން ފުލުހުން އަމިއްލަ އިސްނެންގެވުމުގެ މަތިން މި މައްސަލަ ތަހުގީގު ކުރައްވަން ފައްޓަވާފައިވާ ކަމަށް އޭނާ ވިދާޅުވި އެވެ.

މީގެ އިތުރުން، މާލެ ސިޓީގެ މޭޔަރަކީ އެދިވަޑައިގެންފި ނަމަ ދައުލަތުން ސެކިއުރިޓީ ފޯރުކޮށްދޭންޖެހޭ ބޭފުޅެއްކަން ފާހަގަކުރައްވައި، ތަރުޖަމާނު ވިދާޅުވީ ދައުލަތުގެ އިސް ބޭފުޅުންގެ "ތްރެޓް އެސެސްމަންޓް" ފުލުހުން އަބަދުވެސް ހައްދަވަމުން ގެންދަވާނެ ކަމަށެވެ. އަދި އެއްވެސް ބޭފުޅަކަށް ނުރައްކަލެއް އޮތްކަން ފާހަގަކުރެވިއްޖެ ނަމަ، ފުލުހުން އިސްވެ ސެކިއުރިޓީގެ ކަންކަން ހަމަޖައްސަވާނެ ކަމުގެ ޔަޤީންކަންވެސް ސަރުކާރުން ވަނީ ދެއްވާފަ އެވެ.

ރައީސުލްޖުމްހޫރިއްޔާ ޑރ. މުޢިއްޒުގެ އަމާޒަކީ ކޮންމެ ރައްޔިތަކަށްމެ ބިރުވެރިކަމެއް ނެތް، އަމާން މާހައުލެއް ގާއިމުކޮށްދިނުން ކަމަށްވެސް ރައީސް އޮފީހުގެ ބަޔާނުގައި ބުނެފައިވެ އެވެ.